ਇਜ਼ਰਾਈਲ-ਈਰਾਨ ਜੰਗ ਕਾਰਨ ਤੇਲ ਦੀਆਂ ਕੀਮਤਾਂ ’ਚ 10% ਵਾਧਾ

ਨਵੀਂ ਦਿੱਲੀ, 14 ਜੂਨ – ਇਜ਼ਰਾਈਲ ਵੱਲੋਂ ਈਰਾਨ ਉੱਤੇ ਹਮਲੇ ਦੀ ਖ਼ਬਰ ਆਉਣ ਦੇ ਕੁਝ ਹੀ ਪਲਾਂ ਬਾਅਦ ਵਿਸ਼ਵ ਪੱਧਰੀ ਤੇਲ ਮਾਰਕੀਟਾਂ ਵਿੱਚ ਹਲਚਲ ਮਚ ਗਈ। ਬੈਂਚਮਾਰਕ ਬ੍ਰੈਂਟ ਕ੍ਰੂਡ ਦੀ ਕੀਮਤ ਵਿੱਚ 10% ਤੋਂ ਵੱਧ ਦੀ ਤੇਜ਼ੀ ਆਈ, ਜੋ ਕਿ ਕਈ ਮਹੀਨਿਆਂ ਵਿੱਚ ਸਭ ਤੋਂ ਵੱਡਾ ਵਾਧਾ ਸੀ। ਕੁਝ ਸਮੇਂ ਬਾਅਦ ਕੀਮਤਾਂ ਵਿੱਚ ਥੋੜ੍ਹੀ ਕਮੀ ਆਈ, ਪਰ ਫਿਰ ਵੀ ਬ੍ਰੈਂਟ ਕ੍ਰੂਡ $74-75 ਪ੍ਰਤੀ ਬੈਰਲ ਦੇ ਆਸ-ਪਾਸ ਵਪਾਰ ਕਰ ਰਿਹਾ ਸੀ, ਜੋ ਪਿਛਲੇ ਦਿਨ ਦੇ ਮੁਕਾਬਲੇ 5% ਵੱਧ ਹੈ।

ਭਾਰਤ ਦੇ ਪੈਟਰੋਲੀਅਮ ਮੰਤਰੀ ਦਾ ਬਿਆਨ
ਭਾਰਤ ਦੇ ਪੈਟਰੋਲੀਅਮ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਇਸ ਸਥਿਤੀ ‘ਤੇ ਕਿਹਾ ਕਿ ਚਿੰਤਾ ਕਰਨ ਦੀ ਕੋਈ ਲੋੜ ਨਹੀਂ। ਉਨ੍ਹਾਂ ਦੱਸਿਆ ਕਿ ਭਾਰਤ ਕੋਲ ਆਉਣ ਵਾਲੇ ਮਹੀਨਿਆਂ ਲਈ ਕਾਫ਼ੀ ਊਰਜਾ ਭੰਡਾਰ ਹੈ ਅਤੇ ਊਰਜਾ ਉਪਲਬਧਤਾ ਨੂੰ ਲੈ ਕੇ ਪੈਟਰੋਲੀਅਮ ਉਦਯੋਗ ਦੇ ਮੁੱਖ ਅਧਿਕਾਰੀਆਂ ਨਾਲ ਸਮੀਖਿਆ ਕੀਤੀ ਗਈ ਹੈ। ਉਨ੍ਹਾਂ ਨੇ ਕਿਹਾ ਕਿ ਭਾਰਤ ਦੀ ਸਪਲਾਈ ਲਾਈਨ ਮਜ਼ਬੂਤ ਹੈ ਅਤੇ ਲੋੜ ਪੈਣ ‘ਤੇ ਹੋਰ ਵੱਖ-ਵੱਖ ਸਰੋਤਾਂ ਤੋਂ ਵੀ ਤੇਲ ਮੰਗਵਾਇਆ ਜਾ ਸਕਦਾ ਹੈ।