ਅਮਰੀਕੀ ਡਾਕ ਸੇਵਾ ਵੱਲੋਂ ਦੀਵਾਲੀ ਨੂੰ ਸਮਰਪਿਤ ਡਾਕ ਟਿਕਟ ਜਾਰੀ
ਵਾਸ਼ਿੰਗਟਨ, 22 ਅਕਤੂਬਰ – ਅਮਰੀਕੀ ਡਾਕ ਸੇਵਾ (ਯੂ.ਐੱਸ.ਪੀ.ਐੱਸ.) ਨੇ ਹਿਊਸਟਨ ਦੀ ਕਲਾਕਾਰ ਸੰਗੀਤਾ ਭੁਟਾੜਾ ਦੁਆਰਾ ਤਿਆਰ ਕੀਤੇ ਗਏ ਇੱਕ ਰੰਗੋਲੀ ਪੈਟਰਨ ਨੂੰ ਦਰਸਾਉਂਦੀ ਦੀਵਾਲੀ ਦੇ ਤਿਉਹਾਰ ਨੂੰ ਯਾਦਗਾਰ ਬਣਾਉਣ ਵਾਲੀ ਇੱਕ ਡਾਕ ਟਿਕਟ ਜਾਰੀ ਕੀਤੀ ਹੈ। ਸੰਯੁਕਤ ਰਾਜ ਅਮਰੀਕਾ ਵਿੱਚ ਭਾਰਤ ਦੇ ਰਾਜਦੂਤ ਵਿਨੈ ਮੋਹਨ ਕਵਾਤਰਾ, ਯੂ.ਐੱਸ.ਪੀ.ਐੱਸ. ਦੇ ਸੀਨੀਅਰ ਮੀਤ ਪ੍ਰਧਾਨ ਸ਼ਿਬਾਨੀ ਗੰਭੀਰ ਅਤੇ ਭੁਟਾੜਾ ਨੇ ਬੁੱਧਵਾਰ ਸ਼ਾਮ ਨੂੰ ਇੱਥੇ ਭਾਰਤੀ ਦੂਤਾਵਾਸ ਵਿੱਚ ਇੱਕ ਸਮਾਰੋਹ ਵਿੱਚ ਇਸ ਟਿਕਟ ਤੋਂ ਪਰਦਾ ਹਟਾਇਆ। ਯੂ.ਐੱਸ.ਪੀ.ਐੱਸ. ਨੇ ਰੰਗੋਲੀ ਨੂੰ ਇੱਕ ਜੀਵੰਤ ਫਰਸ਼ ਪੈਟਰਨ ਵਜੋਂ ਵਰਣਨ ਕੀਤਾ ਹੈ ਜੋ ਰਵਾਇਤੀ ਤੌਰ ‘ਤੇ ਰੰਗੀਨ ਚਾਵਲ ਦੇ ਪਾਊਡਰ, ਚਾਕ ਅਤੇ ਫੁੱਲਾਂ ਦੀਆਂ ਪੱਤੀਆਂ ਵਰਗੀਆਂ ਸਮੱਗਰੀਆਂ ਤੋਂ ਬਣਾਇਆ ਜਾਂਦਾ ਹੈ ਅਤੇ ਮੰਨਿਆ ਜਾਂਦਾ ਹੈ ਕਿ ਇਹ ਚੰਗੀ ਕਿਸਮਤ ਲਿਆਉਂਦਾ ਹੈ। ਭੁਟਾੜਾ ਭਾਰਤ ਦੇ ਮੂਲ ਨਿਵਾਸੀ ਹਨ ਅਤੇ ਹਿਊਸਟਨ ਖੇਤਰ ਵਿੱਚ ਲੰਮੇ ਸਮੇਂ ਤੋਂ ਰਹਿਣ ਵਾਲੇ ਹਨ। ਉਨ੍ਹਾਂ ਨੇ ਲਗਪਗ 30 ਸਾਲਾਂ ਤੋਂ ਰੰਗੋਲੀ ਦੀ ਪ੍ਰਾਚੀਨ ਲੋਕ ਕਲਾ ਦਾ ਅਭਿਆਸ ਕੀਤਾ ਹੈ। ਇਸ ਟਿਕਟ ਨੂੰ ਜੇਨਿਫਰ ਅਰਨੋਲਡ ਵੱਲੋਂ ਡਿਜ਼ਾਈਨ ਕੀਤਾ ਗਿਆ ਸੀ ਅਤੇ ਵਿਲੀਅਮ ਜੇ ਗਿੱਕਰ ਆਰਟ ਡਾਇਰੈਕਟਰ ਸਨ। ਭੁਟਾੜਾ ਨੇ ਦੱਸਿਆ ਕਿ ਯੂ.ਐੱਸ.ਪੀ.ਐੱਸ. ਨੇ ਇੱਕ ਸਾਲ ਤੋਂ ਵੱਧ ਸਮਾਂ ਪਹਿਲਾਂ ਟਿਕਟ ਬਣਾਉਣ ਲਈ ਉਨ੍ਹਾਂ ਨਾਲ ਸੰਪਰਕ ਕੀਤਾ ਸੀ।
Share this content:
Post Comment