PGI ‘ਤੇ ਕਰੋੜਾਂ ਦਾ ਬਕਾਇਆ ਪ੍ਰਾਪਰਟੀ ਟੈਕਸ ਤੁਰੰਤ ਭੁਗਤਾਨ ਦੇ ਹੁਕਮ

ਚੰਡੀਗੜ੍ਹ, 31 ਅਕਤੂਬਰ – ਪੀਜੀਆਈ ਤੋਂ ਪ੍ਰਾਪਰਟੀ ਟੈਕਸ ਦੇ 24 ਕਰੋੜ ਰੁਪਏ ਦੇ ਬਕਾਏ ਦੀ ਵਸੂਲੀ ਲਈ ਚੰਡੀਗੜ੍ਹ ਨਗਰਨਿਗਮ ਐਕਸ਼ਨ ਵਿਚ ਆ ਗਿਆ ਹੈ। ਨਿਗਮ ਨੇ ਪੀਜੀਆਈ ਨੂੰ ਬਕਾਇਆ ਟੈਕਸਾਂ ਦਾ ਤੁਰੰਤ ਭੁਗਤਾਨ ਕਰਨ ਦੇ ਆਰਡਰ ਦਿੱਤੇ ਹਨ। ਇਸ ਤੋਂ ਇਲਾਵਾ, ਬਕਾਇਆ ਪਾਣੀ ਦੇ ਬਿੱਲਾਂ, ਫਾਇਰ ਸੇਫਟੀ, ਕਚਰਾ ਪ੍ਰਬੰਧਨ ਅਤੇ ਪੀਜੀਆਈ ਕੈਂਪਸ ਵਿੱਚ ਸੀਵਰੇਜ ਟ੍ਰੀਟਮੈਂਟ ਪਲਾਂਟ (ਐਸਟੀਪੀ) ਦੀ ਸਥਾਪਨਾ ਵਰਗੇ ਮੁੱਦਿਆਂ ਨੂੰ ਹੱਲ ਕਰਨ ਲਈ ਇੱਕ ਰਣਨੀਤੀ ਤਿਆਰ ਕੀਤੀ ਗਈ ਹੈ।

ਅੱਜ, ਨਗਰ ਨਿਗਮ ਕਮਿਸ਼ਨਰ ਅਮਿਤ ਕੁਮਾਰ ਨੇ ਪੀਜੀਆਈ ਅਧਿਕਾਰੀਆਂ ਨਾਲ ਮੀਟਿੰਗ ਕੀਤੀ। ਇਸ ਮੌਕੇ ‘ਤੇ ਚੀਫ ਫਾਇਰ ਅਫਸਰ ਨੇ ਦੱਸਿਆ ਕਿ ਪੀਜੀਆਈ ਦੀਆਂ ਕਈ ਇਮਾਰਤਾਂ ਜ਼ਰੂਰੀ ਫਾਇਰ ਸੇਫਟੀ ਸਿਸਟਮ ਅਤੇ ਸਰਟੀਫਿਕੇਟਾਂ ਤੋਂ ਬਿਨਾਂ ਕੰਮ ਕਰ ਰਹੀਆਂ ਹਨ। ਪੀਜੀਆਈ ਅਧਿਕਾਰੀਆਂ ਨੇ ਦੱਸਿਆ ਕਿ ਸੀਬੀਆਰਆਈ, ਰੁੜਕੀ ਵੱਲੋਂ ਫਾਇਰ ਸੇਫਟੀ ਆਡਿਟ ਕੀਤਾ ਜਾ ਰਿਹਾ ਹੈ ਅਤੇ ਹੁਣ ਤੱਕ 16 ਇਮਾਰਤਾਂ ਦਾ ਨਿਰੀਖਣ ਪੂਰਾ ਹੋ ਗਿਆ ਹੈ। ਸੰਸਥਾ ਨੇ ਭਰੋਸਾ ਦਿੱਤਾ ਕਿ ਉਹ ਦੋ ਮਹੀਨਿਆਂ ਦੇ ਅੰਦਰ ਫਾਇਰ ਵਿਭਾਗ ਦੇ ਸਾਰੇ ਨਿਰਦੇਸ਼ਾਂ ਦੀ ਪਾਲਣਾ ਕਰਨਗੇ।9-10 ਅਕਤੂਬਰ, 2023 ਨੂੰ ਪੀਜੀਆਈ ਵਿੱਚ ਅੱਗ ਲੱਗ ਗਈ। ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਇਸ ਦੌਰਾਨ UPS ਰੂਮ (100 ਬੈਟਰੀਆਂ) ਸੜ ਕੇ ਸੁਆਹ ਹੋ ਗਈ ਸੀ।