Google One ਤੇ Gemini AI ਪਲਾਨ ‘ਤੇ ਮਿਲ ਰਿਹੈ 50% ਡਿਸਕਾਊਂਟ

ਨਵੀਂ ਦਿੱਲੀ, 25 ਦਸੰਬਰ – ਗੂਗਲ ਨੇ ਬੁੱਧਵਾਰ ਨੂੰ ਯੋਗ ਯੂਜ਼ਰਜ਼ ਲਈ ਇੱਕ ਨਵੇਂ ਆਫਰ ਦੀ ਘੋਸ਼ਣਾ ਕੀਤੀ ਹੈ, ਜਿਸ ਨਾਲ Google AI Pro ਸਾਲਾਨਾ ਪਲਾਨ ਦੀ ਕੀਮਤ 50 ਫੀਸਦੀ ਘੱਟ ਗਈ ਹੈ। ਇਹ ਇੱਕ ਸੀਮਤ ਸਮੇਂ ਦਾ ਆਫਰ ਹੈ ਤੇ ਇਸ ਵਿੱਚ ਕੁਝ ਸ਼ਰਤਾਂ ਹਨ ਕਿ ਕੌਣ ਇਸਦਾ ਫਾਇਦਾ ਉਠਾ ਸਕਦਾ ਹੈ ਅਤੇ ਕੌਣ ਨਹੀਂ। ਨਵੀਂ ਕੀਮਤ ਦੇ ਨਾਲ ਕੰਪਨੀ ਲੋਕਾਂ ਨੂੰ ਆਪਣੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਫੀਚਰਜ਼ ਦੇ ਪੂਰੇ ਸੈੱਟ ਨੂੰ ਵਧੇਰੇ ਲਿਮਿਟ ਦੇ ਨਾਲ ਵਰਤਣ ਦਾ ਮੌਕਾ ਦੇ ਰਹੀ ਹੈ, ਉਹ ਵੀ ਜੇਬ ‘ਤੇ ਜ਼ਿਆਦਾ ਬੋਝ ਪਾਏ ਬਿਨਾਂ। ਇਸ ਤੋਂ ਇਲਾਵਾ ਇੱਕ ਰਿਪੋਰਟ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ Google One ਦੇ ਸਾਲਾਨਾ ਪਲਾਨ ‘ਤੇ ਵੀ ਇਸੇ ਤਰ੍ਹਾਂ ਦੀ ਛੋਟ ਦਿੱਤੀ ਜਾ ਰਹੀ ਹੈ।

Google One ਤੇ Google AI Pro ਪਲਾਨ ਹੋਏ ਸਸਤੇ

X (ਪਹਿਲਾਂ ਟਵਿੱਟਰ) ‘ਤੇ ਇੱਕ ਪੋਸਟ ਵਿੱਚ, ਜੈਮਿਨੀ (Gemini) ਦੇ ਅਧਿਕਾਰਤ ਹੈਂਡਲ ਨੇ ਸਾਲਾਨਾ Google AI Pro ਪਲਾਨ ‘ਤੇ 50 ਫੀਸਦੀ ਫਲੈਟ ਡਿਸਕਾਊਂਟ ਦੀ ਘੋਸ਼ਣਾ ਕੀਤੀ। ਇਹ ਆਫਰ ਸਿਰਫ ਨਵੇਂ ਸਬਸਕ੍ਰਾਈਬਰਸ ਲਈ ਉਪਲਬਧ ਹੈ, ਜਿਸਦਾ ਮਤਲਬ ਹੈ ਕਿ ਉਨ੍ਹਾਂ ਨੇ ਪਹਿਲਾਂ ਉਸ ਗੂਗਲ ਅਕਾਊਂਟ ਤੋਂ ਇਹ ਪਲਾਨ ਨਹੀਂ ਖਰੀਦਿਆ ਹੋਣਾ ਚਾਹੀਦਾ। ਇਸ ਤੋਂ ਇਲਾਵਾ, ਇਹ ਡਿਸਕਾਊਂਟ ਸਿਰਫ ਕੁਝ ਖਾਸ ਖੇਤਰਾਂ (ਜਿਵੇਂ ਕਿ ਅਮਰੀਕਾ) ਵਿੱਚ ਉਪਲਬਧ ਹੈ। ਇਹ ਆਫਰ ਸਿਰਫ 15 ਜਨਵਰੀ ਤੱਕ ਵੈਧ ਹੈ। ਫਿਲਹਾਲ ਇਹ ਸਾਫ ਨਹੀਂ ਹੈ ਕਿ ਇਹ ਭਾਰਤ ਵਿੱਚ ਉਪਲਬਧ ਹੈ ਜਾਂ ਨਹੀਂ।

ਅਮਰੀਕਾ ਵਿੱਚ ਇੱਕ ਨਵੇਂ ਸਬਸਕ੍ਰਾਈਬਰ ਲਈ, 12 ਮਹੀਨਿਆਂ ਦਾ Google AI Pro ਪਲਾਨ, ਜਿਸਦੀ ਕੀਮਤ ਆਮ ਤੌਰ ‘ਤੇ $199.99 (ਲਗਪਗ 17,950 ਰੁਪਏ) ਹੁੰਦੀ ਹੈ, ਹੁਣ $99.99 (ਲਗਪਗ 9,000 ਰੁਪਏ) ਵਿੱਚ ਮਿਲ ਰਿਹਾ ਹੈ। ਆਫਰ ਪੀਰੀਅਡ ਤੋਂ ਬਾਅਦ, ਅਗਲੇ ਸਾਲ $239.88 ਚਾਰਜ ਕੀਤੇ ਜਾਣਗੇ। ਦੱਸ ਦੇਈਏ ਕਿ ਸਬਸਕ੍ਰਿਪਸ਼ਨ ਆਪਣੇ ਆਪ ਰੀਨਿਊ ਹੋ ਜਾਵੇਗੀ, ਇਸ ਲਈ ਜੋ ਯੂਜ਼ਰਜ਼ ਜਾਰੀ ਨਹੀਂ ਰੱਖਣਾ ਚਾਹੁੰਦੇ, ਉਨ੍ਹਾਂ ਨੂੰ ਆਟੋ-ਪੇਅ ਬੰਦ ਕਰਨਾ ਹੋਵੇਗਾ।

ਸਬਸਕ੍ਰਿਪਸ਼ਨ ਦੇ ਫਾਇਦੇ

Google AI Pro ਸਬਸਕ੍ਰਿਪਸ਼ਨ ਦੇ ਨਾਲ, ਯੂਜ਼ਰਜ਼ ਨੂੰ ਇਹ ਫਾਇਦੇ ਮਿਲਣਗੇ:

Gemini 3 Pro AI ਮਾਡਲ ਅਤੇ Nano Banana Pro ਦਾ ਐਕਸੈਸ। Deep Research ਅਤੇ ਵੀਡੀਓ ਜਨਰੇਸ਼ਨ ਲਈ Veo 3.1 Fast ਦੀ ਸਹੂਲਤ। ਗੂਗਲ ਵਰਕਸਪੇਸ ਪ੍ਰੋਡਕਟਸ ਵਿੱਚ ਜੈਮਿਨੀ ਚੈਟਬੋਟ ਦੀ ਵਧੇਰੇ ਵਰਤੋਂ। ਗੂਗਲ ਡਰਾਈਵ, ਫੋਟੋਜ਼ ਤੇ ਜੀਮੇਲ (Gmail) ‘ਤੇ 2TB ਕਲਾਊਡ ਸਟੋਰੇਜ। ਇਸ ਤੋਂ ਇਲਾਵਾ, ‘9to5Google’ ਦੀ ਰਿਪੋਰਟ ਅਨੁਸਾਰ, Google One ਵੀ ਅਜਿਹਾ ਹੀ ਆਫਰ ਚਲਾ ਰਿਹਾ ਹੈ। ਬੇਸਿਕ 100GB ਪਲਾਨ $19.99 ਦੀ ਬਜਾਏ $9.99 (ਲਗਪਗ 900 ਰੁਪਏ) ਵਿੱਚ ਮਿਲੇਗਾ।