CNG ਅਤੇ PNG ਵਿੱਚ ਮਿਕਸ ਕੀਤੀ ਜਾਵੇਗੀ ਬਾਇਓਗੈਸ

ਨਵੀਂ ਦਿੱਲੀ, 7 ਅਗਸਤ – ਈਥਾਨੌਲ-ਅਧਾਰਤ ਪੈਟਰੋਲ ਤੋਂ ਬਾਅਦ ਹੁਣ ਕੇਂਦਰ ਸਰਕਾਰ ਨੇ CNG ਅਤੇ PNG (ਰਸੋਈ ਗੈਸ) ਵਿੱਚ ਬਾਇਓਗੈਸ ਮਿਲਾਉਣ ਦੀ ਤਿਆਰੀ ਕਰ ਲਈ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪ੍ਰਧਾਨਗੀ ਹੇਠ ਹੋਈ ਕੈਬਨਿਟ ਮੀਟਿੰਗ ਦੌਰਾਨ ₹23,731 ਕਰੋੜ ਦੇ ਬਜਟ ਵਾਲੀ ‘ਗੋਬਰਧਨ’ ਯੋਜਨਾ ਦੇ ਪ੍ਰਸਤਾਵ ਨੂੰ ਪ੍ਰਵਾਨਗੀ ਦੇ ਦਿੱਤੀ ਗਈ ਹੈ। ਸੂਚਨਾ ਅਤੇ ਪ੍ਰਸਾਰਣ ਮੰਤਰੀ ਅਸ਼ਵਨੀ ਵੈਸ਼ਨਵ ਅਨੁਸਾਰ, ਇਸ ਯੋਜਨਾ ਦਾ ਉਦੇਸ਼ ਅਗਲੇ 10 ਸਾਲਾਂ ਵਿੱਚ ਖੇਤੀਬਾੜੀ ਰਹਿੰਦ-ਖੂੰਹਦ, ਗੋਬਰ ਅਤੇ ਜੈਵਿਕ ਕੂੜੇ ਨੂੰ ਸਾਫ਼ ਬਾਲਣ ਅਤੇ ਜੈਵਿਕ ਖਾਦ ਵਿੱਚ ਬਦਲਣਾ ਹੈ।

ਯੋਜਨਾ ਦੇ ਤਹਿਤ ਵਿੱਤੀ ਸਾਲ 2026-27 ਤੋਂ CNG ਅਤੇ PNG ਵਿੱਚ ਬਾਇਓਗੈਸ ਦੀ ਬਲੈਂਡਿੰਗ ਸ਼ੁਰੂ ਹੋਵੇਗੀ, ਜੋ 2027-28 ਤੱਕ 3% ਅਤੇ 2028-29 ਤੱਕ 5% ਤੱਕ ਵਧਾਈ ਜਾਵੇਗੀ। ਸਰਕਾਰ ਦਾ ਟੀਚਾ ਦੇਸ਼ ਵਿੱਚ ਬਾਇਓਗੈਸ ਉਤਪਾਦਨ ਨੂੰ 10 ਗੁਣਾ ਵਧਾਉਣਾ ਅਤੇ ਹਰ ਸਾਲ 600 ਤੋਂ 700 ਨਵੇਂ ਬਾਇਓਗੈਸ ਪਲਾਂਟ ਸਥਾਪਤ ਕਰਨਾ ਹੈ। 10 ਅਗਸਤ ਨੂੰ ‘ਵਿਸ਼ਵ ਬਾਇਓਫਿਊਲ ਦਿਵਸ’ ‘ਤੇ ਇਸ ਦਾ ਅਧਿਕਾਰਤ ਐਲਾਨ ਹੋਣ ਦੀ ਉਮੀਦ ਹੈ, ਜਿਸ ਨਾਲ ਨਿਵੇਸ਼ਕਾਂ ਨੂੰ ਸਬਸਿਡੀ ਮਿਲੇਗੀ ਅਤੇ ਦੇਸ਼ ਦੀ ਊਰਜਾ ਸੁਰੱਖਿਆ ਮਜ਼ਬੂਤ ਹੋਵੇਗੀ।