ਦਿੱਲੀ ਪ੍ਰੀਮੀਅਰ ਲੀਗ ਵਿਚ ਭਿੜੇ ਨਿਤੀਸ਼ ਰਾਣਾ ਤੇ ਦਿਗਵੇਸ਼ ਰਾਠੀ

ਨਵੀਂ ਦਿੱਲੀ, 30 ਅਗਸਤ – ਨਿਤੀਸ਼ ਰਾਣਾ ਦੇ ਸ਼ਾਨਦਾਰ ਸੈਂਕੜੇ ਨੇ ਦਿੱਲੀ ਪ੍ਰੀਮੀਅਰ ਲੀਗ (ਡੀ.ਪੀ.ਐਲ.) 2025 ਦੇ ਐਲੀਮੀਨੇਟਰ ਮੈਚ ਵਿਚ ਵੈਸਟ ਦਿੱਲੀ ਲਾਇਨਜ਼ ਨੂੰ ਜਿਤ ਦਿਵਾਈ। ਹਾਲਾਂਕਿ, ਰਾਣਾ ਅਤੇ ਸਪਿਨਰ ਦਿਗਵੇਸ਼ ਰਾਠੀ ਵਿਚਕਾਰ ਤਿੱਖੀ ਬਹਿਸ ਕਾਰਨ ਇਹ ਮੈਚ ਸੁਰਖੀਆਂ ਵਿਚ ਵੀ ਆਇਆ। ਇਨ੍ਹਾਂ ਖਿਡਾਰੀਆਂ ਵਿਚਕਾਰ ਹੋਈ ਲੜਾਈ ਨੇ ਸੋਸ਼ਲ ਮੀਡੀਆ ‘ਤੇ ਹੰਗਾਮਾ ਮਚਾ ਦਿਤਾ। ਦੋਵੇਂ ਖਿਡਾਰੀ ਟ੍ਰੈਂਡ ਕਰ ਰਹੇ ਹਨ। ਅਰੁਣ ਜੇਤਲੀ ਸਟੇਡੀਅਮ ਵਿਚ ਖੇਡੇ ਗਏ ਇਸ ਮੈਚ ਵਿਚ, ਵੈਸਟ ਦਿੱਲੀ ਲਾਇਨਜ਼ ਵਲੋਂ ਖੇਡ ਰਹੇ ਨਿਤੀਸ਼ ਰਾਣਾ ਨੇ 55 ਗੇਂਦਾਂ ਵਿਚ 134 ਦੌੜਾਂ ਦੀ ਅਜੇਤੂ ਪਾਰੀ ਖੇਡੀ। ਉਨ੍ਹਾਂ ਦੀ ਹਮਲਾਵਰ ਪਾਰੀ ਵਿਚ 15 ਛੱਕੇ ਅਤੇ 8 ਚੌਕੇ ਸ਼ਾਮਲ ਸਨ।

ਰਾਣਾ ਦੇ ਤੂਫਾਨੀ ਪ੍ਰਦਰਸ਼ਨ ਦੀ ਬਦੌਲਤ, ਵੈਸਟ ਦਿੱਲੀ ਨੇ 17.1 ਓਵਰਾਂ ਵਿਚ 7 ​​ਵਿਕਟਾਂ ਨਾਲ 202 ਦੌੜਾਂ ਦਾ ਟੀਚਾ ਪ੍ਰਾਪਤ ਕਰ ਲਿਆ। ਰਾਣਾ ਅਤੇ ਰਾਠੀ ਵਿਚਕਾਰ ਤਣਾਅ ਉਦੋਂ ਸ਼ੁਰੂ ਹੋਇਆ ਜਦੋਂ ਰਾਠੀ ਅਪਣਾ ਪਹਿਲਾ ਓਵਰ ਸੁੱਟਣ ਆਇਆ। ਰਾਣਾ ਨੇ ਇਕ ਜ਼ੋਰਦਾਰ ਛੱਕਾ ਮਾਰਿਆ, ਜਿਸ ਤੋਂ ਬਾਅਦ ਉਹ ਹਮਲਾਵਰ ਢੰਗ ਨਾਲ ਰਾਠੀ ਵੱਲ ਵਧਿਆ ਅਤੇ ਉਸ ਨੂੰ ਕੁੱਝ ਗੱਲਾਂ ਕਹੀਆਂ। ਇਸ ਵਿਵਾਦ ਨੂੰ ਸ਼ਾਂਤ ਕਰਨ ਲਈ, ਦੋਵਾਂ ਟੀਮਾਂ ਦੇ ਖਿਡਾਰੀਆਂ ਅਤੇ ਮੈਚ ਅਧਿਕਾਰੀਆਂ ਨੂੰ ਦਖ਼ਲ ਦੇਣਾ ਪਿਆ। ਇਸ ਘਟਨਾ ਦੀ ਵੀਡੀਉ ਤੁਰਤ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਗਈ।

ਦਰਅਸਲ, ਦਿਗਵੇਸ਼ ਰਾਠੀ ਗੇਂਦ ਸੁੱਟਣ ਜਾ ਰਿਹਾ ਸੀ ਜਦੋਂ ਉਸ ਨੂੰ ਲੱਗਿਆ ਕਿ ਨਿਤੀਸ਼ ਰਾਣਾ ਉਸ ਗੇਂਦ ‘ਤੇ ਵੱਡਾ ਸ਼ਾਟ ਖੇਡਣ ਜਾ ਰਿਹਾ ਹੈ, ਇਸ ਲਈ ਉਹ ਰੁਕ ਗਿਆ। ਨਿਤੀਸ਼ ਰਾਣਾ ਨੂੰ ਇਹ ਪਸੰਦ ਨਹੀਂ ਆਇਆ। ਹਾਲਾਂਕਿ, ਰਾਣਾ ਨੇ ਉਸ ਸਮੇਂ ਕੁੱਝ ਨਹੀਂ ਕਿਹਾ। ਇਸ ਤੋਂ ਬਾਅਦ, ਜਦੋਂ ਦਿਗਵੇਸ਼ ਰਾਠੀ ਦੁਬਾਰਾ ਗੇਂਦ ਸੁੱਟਣ ਲਈ ਤਿਆਰ ਹੋਇਆ, ਤਾਂ ਨਿਤੀਸ਼ ਰਾਣਾ ਦੂਰ ਚਲਾ ਗਿਆ ਅਤੇ ਉਸ ਨੇ ਮਾਮਲਾ ਹੋਰ ਵਧਾ ਦਿਤਾ।

ਰਾਠੀ ਦੁਬਾਰਾ ਗੇਂਦ ਸੁੱਟਣ ਲਈ ਤਿਆਰ ਹੋਇਆ ਅਤੇ ਨਿਤੀਸ਼ ਰਾਣਾ ਨੇ ਉਸ ਗੇਂਦ ‘ਤੇ ਇਕ ਲੰਮਾ ਛੱਕਾ ਮਾਰਿਆ। ਇਸ ਤੋਂ ਬਾਅਦ, ਰਾਣਾ ਨੇ ਦਿਗਵੇਸ਼ ਰਾਠੀ ਦੇ ਸਟਾਈਲ ਦੀ ਨਕਲ ਕੀਤੀ ਅਤੇ ਅਪਣੇ ਬੱਲੇ ‘ਤੇ ਦਸਤਖ਼ਤ ਕੀਤੇ, ਇਹ ਦੇਖ ਕੇ ਦਿਗਵੇਸ਼ ਰਾਠੀ ਗੁੱਸੇ ਵਿਚ ਆ ਗਿਆ ਅਤੇ ਦੋਵਾਂ ਖਿਡਾਰੀਆਂ ਵਿਚਕਾਰ ਤਿੱਖੀ ਬਹਿਸ ਹੋ ਗਈ। ਇਹ ਮੈਚ ਰਾਠੀ ਲਈ ਨਿਰਾਸ਼ਾਜਨਕ ਸੀ, ਜੋ ਲਖਨਊ ਸੁਪਰ ਜਾਇੰਟਸ ਲਈ ਵੀ ਖੇਡਦਾ ਹੈ।