ਸਵੱਛ ਸਰਵੇਖਣ ਪੁਰਸਕਾਰ 2025-26: ਜੰਮੂ, ਸ਼ੋਪੀਆਂ ਚੋਟੀ ਦੇ ਸਾਫ਼ ਹਿਮਾਲਿਆਈ ਸ਼ਹਿਰਾਂ ਵਿੱਚ ਸ਼ਾਮਲ

ਜੰਮੂ, 12 ਨਵੰਬਰ – ਸਫ਼ਾਈ ਸੁਧਾਰਾਂ, ਨਾਗਰਿਕਾਂ ਦੀ ਸ਼ਮੂਲੀਅਤ ਅਤੇ ਬੁਨਿਆਦੀ ਢਾਂਚੇ ਦੇ ਆਧੁਨਿਕੀਕਰਨ ਲਈ ਕੀਤੇ ਗਏ ਨਿਰੰਤਰ ਯਤਨਾਂ ਨੂੰ ਮਾਨਤਾ ਦਿੰਦੇ ਹੋਏ, ਜੰਮੂ ਨੇ ‘ਸਵੱਛ ਸਰਵੇਖਣ ਅਵਾਰਡ 2025-26’ ਦੇ 10ਵੇਂ ਸੰਸਕਰਣ ਵਿੱਚ ‘ਸਵੱਛ ਹਿਮਾਲੀਅਨ ਸ਼ਹਿਰ’ ਸ਼੍ਰੇਣੀ ਤਹਿਤ ਰਾਸ਼ਟਰੀ ਪੱਧਰ ‘ਤੇ ਦੂਜਾ ਸਥਾਨ ਹਾਸਲ ਕੀਤਾ ਹੈ। ਇਹ ਰਾਸ਼ਟਰੀ ਪੁਰਸਕਾਰ ਭਾਰਤ ਦੇ ਮਾਣਯੋਗ ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਵੱਲੋਂ ਨਵੀਂ ਦਿੱਲੀ ਦੇ ਵਿਗਿਆਨ ਭਵਨ ਵਿਖੇ ਆਯੋਜਿਤ ਇੱਕ ਸ਼ਾਨਦਾਰ ਸਮਾਰੋਹ ਵਿੱਚ ਪ੍ਰਦਾਨ ਕੀਤੇ ਗਏ। ਇਹ ਸਮਾਰੋਹ “ਸਵੱਛਤਾ ਦੀ ਨਵੀਂ ਪਹਿਲ – ਵਧਾਈਏ ਹੱਥ, ਕਰੀਏ ਸਫ਼ਾਈ ਨਾਲ-ਨਾਲ” ਦੇ ਪ੍ਰੇਰਨਾਦਾਇਕ ਵਿਸ਼ੇ (ਥੀਮ) ਹੇਠ ਮਨਾਇਆ ਗਿਆ। ਸ਼ਹਿਰ ਦੀ ਤਰਫ਼ੋਂ ਇਹ ਵੱਕਾਰੀ ਰਾਸ਼ਟਰੀ ਸਨਮਾਨ ਸਵੀਕਾਰ ਕਰਨ ਵਾਲਿਆਂ ਵਿੱਚ ਸ਼ਾਮਲ ਸਨ : ਆਯੂਸ਼ੀ ਸੂਦਨ (IAS), ਮਿਸ਼ਨ ਡਾਇਰੈਕਟਰ, ‘ਸਵੱਛ ਭਾਰਤ ਮਿਸ਼ਨ-ਸ਼ਹਿਰੀ’ ਅਤੇ ਕਮਿਸ਼ਨਰ, ਜੰਮੂ ਨਗਰ ਨਿਗਮ; ਅਬਦੁਲ ਸੱਤਾਰ, ਸੰਯੁਕਤ ਕਮਿਸ਼ਨਰ (ਸਿਹਤ ਅਤੇ ਸਫ਼ਾਈ), ਜੰਮੂ ਨਗਰ ਨਿਗਮ; ਅਤੇ ਡਾ. ਸ਼ਾਹਿਦ ਹੁਸੈਨ, ਸਿਹਤ ਅਧਿਕਾਰੀ, ਜੰਮੂ ਨਗਰ ਨਿਗਮ।

ਰਾਸ਼ਟਰੀ ਰਾਜਧਾਨੀ ਵਿੱਚ ਉਨ੍ਹਾਂ ਦੀ ਮੌਜੂਦਗੀ ਨੇ ਉਸ ਮਜ਼ਬੂਤ ​​ਪ੍ਰਸ਼ਾਸਕੀ ਅਗਵਾਈ ਅਤੇ ਸਮਰਪਣ ਨੂੰ ਉਜਾਗਰ ਕੀਤਾ, ਜੋ ਜੰਮੂ ਦੇ ਸ਼ਹਿਰੀ ਕਾਇਆਕਲਪ ਨੂੰ ਅੱਗੇ ਵਧਾ ਰਹੀ ਹੈ।ਇਹ ਵੱਕਾਰੀ ਸਨਮਾਨ ਠੋਸ ਰਹਿੰਦ-ਖੂੰਹਦ ਦੇ ਟਿਕਾਊ ਪ੍ਰਬੰਧਨ, ਘਰ-ਘਰ ਜਾ ਕੇ ਕੂੜੇ ਨੂੰ ਚਾਰ ਸ਼੍ਰੇਣੀਆਂ ਵਿੱਚ ਵੱਖ-ਵੱਖ ਕਰਨ , ਇੱਕ ਵਾਰ ਵਰਤੋਂ ਵਿੱਚ ਆਉਣ ਵਾਲੇ ਪਲਾਸਟਿਕ (single-use plastic) ਨੂੰ ਖਤਮ ਕਰਨ, ਅਤੇ ਭਾਈਚਾਰੇ ਦੀ ਅਗਵਾਈ ਵਿੱਚ ਚਲਾਏ ਗਏ ਵਿਆਪਕ ਸਫ਼ਾਈ ਅਭਿਆਨਾਂ ਵਿੱਚ ਜੰਮੂ ਦੁਆਰਾ ਕੀਤੀ ਗਈ ਮਿਸਾਲੀ ਤਰੱਕੀ ਨੂੰ ਦਰਸਾਉਂਦਾ ਹੈ। ਜੰਮੂ ਨਗਰ ਨਿਗਮ ਦੀ ਅਗਵਾਈ ਹੇਠ, ‘ਹਾਊਸਿੰਗ ਅਤੇ ਸ਼ਹਿਰੀ ਵਿਕਾਸ ਵਿਭਾਗ’ ਦੇ ਨਾਲ ਨੇੜਲੇ ਤਾਲਮੇਲ ਅਤੇ ਨਾਗਰਿਕ ਸਮਾਜ ਦੀ ਸਰਗਰਮ ਭਾਗੀਦਾਰੀ ਨਾਲ, ਸ਼ਹਿਰ ਨੇ ਸਖ਼ਤ ਸਫ਼ਾਈ ਨਿਯਮਾਂ ਅਤੇ ਨਵੀਨਤਾਕਾਰੀ ਜਾਗਰੂਕਤਾ ਮੁਹਿੰਮਾਂ ਰਾਹੀਂ ਆਪਣੇ ਸ਼ਹਿਰੀ ਸਰੂਪ ਨੂੰ ਸਫਲਤਾਪੂਰਵਕ ਬਦਲ ਦਿੱਤਾ ਹੈ।