599 ਸਕੂਲਾਂ ‘ਚ ਬੁਨਿਆਦੀ ਢਾਂਚੇ ਦੇ ਉਦਘਾਟਨਾਂ ਮੌਕੇ ਲੱਗਣਗੇ ਨੇਤਾਵਾਂ ਦੇ ਨਾਮ ਵਾਲੇ ਗ੍ਰੇਨਾਈਟ ਪੱਥਰ

ਫ਼ਰੀਦਕੋਟ, 23 ਅਕਤੂਬਰ – ਪੰਜਾਬ ਸਰਕਾਰ ਨੇ ਨਿਰਦੇਸ਼ ਦਿੱਤੇ ਹਨ ਕਿ ਪੰਜਾਬ ਸਿੱਖਿਆ ਕ੍ਰਾਂਤੀ ਤਹਿਤ ਰਾਜ ਪੱਧਰੀ ਉਦਘਾਟਨੀ ਮੁਹਿੰਮ ਦੌਰਾਨ 599 ਸਰਕਾਰੀ ਸਕੂਲਾਂ ਵਿੱਚ ਮੁੱਖ ਮੰਤਰੀ, ਸਿੱਖਿਆ ਮੰਤਰੀ ਅਤੇ ਸਥਾਨਕ ਵਿਧਾਇਕਾਂ ਦੇ ਨਾਂ ਵਾਲੀਆਂ ਗ੍ਰੇਨਾਈਟ ਦੇ ਉਦਘਾਟਨੀ ਪੱਥਰ ਲਗਾਏ ਜਾਣ। ਇਸ ’ਤੇ ਲਗਪਗ 30 ਲੱਖ ਰੁਪਏ ਦੀ ਲਾਗਤ ਆਉਣ ਦੀ ਸੰਭਾਵਨਾ ਹੈ। ਕੱਲ੍ਹ ਜਾਰੀ ਕੀਤੇ ਗਏ ਇੱਕ ਪੱਤਰ ਵਿੱਚ ਸਕੂਲ ਸਿੱਖਿਆ ਵਿਭਾਗ ਨੇ ਜ਼ਿਲ੍ਹਾ ਸਿੱਖਿਆ ਅਫ਼ਸਰਾਂ (ਸੈਕੰਡਰੀ) ਅਤੇ ਬਲਾਕ ਪ੍ਰਾਇਮਰੀ ਸਿੱਖਿਆ ਅਫ਼ਸਰਾਂ ਨੂੰ 27 ਅਕਤੂਬਰ ਤੋਂ 7 ਨਵੰਬਰ ਦੇ ਵਿਚਕਾਰ ਉਦਘਾਟਨ ਸਮਾਗਮ ਕਰਵਾਉਣ ਲਈ ਕਿਹਾ ਹੈ। ਇਨ੍ਹਾਂ ਸਮਾਗਮਾਂ ਦੌਰਾਨ ਨਵੇਂ ਉਸਾਰੇ ਗਏ ਬੁਨਿਆਦੀ ਢਾਂਚੇ ਨੂੰ ਲੋਕਾਂ ਨੂੰ ਸਮਰਪਿਤ ਕੀਤੇ ਜਾਣਗੇ, ਜਿਸ ਵਿੱਚ ਵਾਧੂ ਕਲਾਸਰੂਮ, ਵਿਗਿਆਨ ਅਤੇ ਗਣਿਤ ਪ੍ਰਯੋਗਸ਼ਾਲਾਵਾਂ, ਕਲਾ ਅਤੇ ਦਸਤਕਾਰੀ ਕਮਰੇ, ਕਿੱਤਾਮੁਖੀ ਵਰਕਸ਼ਾਪਾਂ ਅਤੇ ਲਾਇਬ੍ਰੇਰੀਆਂ ਸ਼ਾਮਲ ਹਨ। ਸਰਕਾਰ ਨੇ ਇਨ੍ਹਾਂ ਬੁਨਿਆਦੀ ਢਾਂਚੇ ਦੇ ਕੰਮਾਂ ਲਈ 83.67 ਕਰੋੜ ਰੁਪਏ ਜਾਰੀ ਕੀਤੇ ਸਨ।

ਸਮਾਗਮਾਂ ਲਈ ਦਿੱਤੀ ਜਾਣ ਵਾਲੀ ਗ੍ਰਾਂਟ—ਜੋ ਐਲੀਮੈਂਟਰੀ ਸਕੂਲਾਂ ਲਈ 5,000 ਰੁਪਏ ਤੋਂ ਲੈ ਕੇ ਸੀਨੀਅਰ ਸੈਕੰਡਰੀ ਸਕੂਲਾਂ ਲਈ 20,000 ਰੁਪਏ ਤੱਕ ਹੈ—ਤੋਂ ਇਲਾਵਾ, ਵਿਭਾਗ ਨੇ ਤਖ਼ਤੀਆਂ (plaque) ਦੇ ਡਿਜ਼ਾਈਨ ਅਤੇ ਲਗਾਉਣ ਲਈ ਪ੍ਰਤੀ ਸਕੂਲ 5,000 ਰੁਪਏ ਮਨਜ਼ੂਰ ਕੀਤੇ ਹਨ। ਕੁੱਲ 599 ਸਕੂਲਾਂ ਲਈ ਇਹ ਰਕਮ 29.95 ਲੱਖ ਰੁਪਏ ਬਣਦੀ ਹੈ। ਸਟੈਂਡਰਡ ਓਪਰੇਟਿੰਗ ਪ੍ਰੋਸੀਜਰ (SOP) ਅਤੇ ਨਿਰਧਾਰਤ ਲੇਆਊਟ ਦੇ ਅਨੁਸਾਰ ਹਰੇਕ 30″x24″ ਦੀ ਗ੍ਰੇਨਾਈਟ ਦੇ ਉਦਘਾਟਨੀ ਪੱਥਰ ‘ਤੇ ਮੁੱਖ ਮੰਤਰੀ ਭਗਵੰਤ ਮਾਨ, ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਅਤੇ ਸਥਾਨਕ ਵਿਧਾਇਕ ਦੇ ਨਾਂ ਅਤੇ ਅਹੁਦੇ ਦਰਸਾਏ ਜਾਣੇ ਜ਼ਰੂਰੀ ਹਨ। ਪੰਜਾਬ ਗਵਰਨਮੈਂਟ ਸਕੂਲ ਟੀਚਰਜ਼ ਯੂਨੀਅਨ ਦੇ ਸੀਨੀਅਰ ਮੈਂਬਰ ਪ੍ਰੇਮ ਚਾਵਲਾ ਨੇ ਇਸ ਖ਼ਰਚੇ ਦੀ ਆਲੋਚਨਾ ਕੀਤੀ। ਉਨ੍ਹਾਂ ਕਿਹਾ, “ਇਹ ਅਫ਼ਸੋਸਜਨਕ ਹੈ ਕਿ ਜਨਤਾ ਦਾ ਪੈਸਾ ਸਿਆਸੀ ਬ੍ਰਾਂਡਿੰਗ ਅਤੇ ਉਦਘਾਟਨੀ ਪੱਥਰਾਂ ‘ਤੇ ਸਿਆਸਤਦਾਨਾਂ ਦੇ ਨਾਂ ਦਿਖਾਉਣ ਲਈ ਵਰਤਿਆ ਜਾ ਰਿਹਾ ਹੈ, ਜਦੋਂ ਕਿ ਸਕੂਲ ਅਕਸਰ ਬੁਨਿਆਦੀ ਵਿਕਾਸ ਜ਼ਰੂਰਤਾਂ ਨਾਲ ਜੂਝਦੇ ਹਨ।”