20 ਮਿੰਟਾਂ ਵਿਚ 7 ਧਮਾਕਿਆਂ ਨਾਲ ਦਹਿਲਿਆ ਦੁਬਈ ਸ਼ਹਿਰ

ਤਹਿਰਾਨ, 6 ਅਗਸਤ – ਈਰਾਨੀ ਮੀਡੀਆ ਰਿਪੋਰਟਾਂ ਮੁਤਾਬਕ ਬੁੱਧਵਾਰ ਤੜਕੇ ਦੁਬਈ ਦੇ ਜੇਬਲ ਅਲੀ ਇੰਡਸਟ੍ਰੀਅਲ ਏਰੀਏ ਵਿੱਚ 20 ਮਿੰਟਾਂ ਦੇ ਅੰਦਰ ਘੱਟੋ-ਘੱਟ ਸੱਤ ਧਮਾਕੇ ਸੁਣੇ ਗਏ । ਸੋਸ਼ਲ ਮੀਡੀਆ ‘ਤੇ ਸਾਂਝੇ ਕੀਤੇ ਗਏ ਵੀਡੀਓਜ਼ ਵਿੱਚ ਸੰਘਣੇ ਧੂੰਏਂ ਦੇ ਵੱਡੇ-ਵੱਡੇ ਗੁਬਾਰ ਅਸਮਾਨ ਵੱਲ ਉੱਠਦੇ ਦਿਖਾਈ ਦਿੱਤੇ। ਅਧਿਕਾਰੀਆਂ ਨੇ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਕਿ ਧਮਾਕੇ ਕਿਸੇ ਹਮਲੇ ਕਾਰਨ ਹੋਏ ਜਾਂ ਕਿਸੇ ਸਨਅਤੀ ਹਾਦਸੇ ਕਾਰਨ। ਘਟਨਾ ਨੂੰ ਰਿਕਾਰਡ ਕਰਨ ਦੇ ਦੋਸ਼ ਵਿੱਚ ਦੋ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।

ਦੱਖਣ-ਪੱਛਮੀ ਦੁਬਈ ਵਿੱਚ ਸਥਿਤ ਜੇਬਲ ਅਲੀ ਖੇਤਰ ਮਹੱਤਵਪੂਰਨ ਲੌਜਿਸਟਿਕਸ, ਵਪਾਰਕ ਅਤੇ ਸਨਅਤੀ ਕੇਂਦਰ ਵਜੋਂ ਕੰਮ ਕਰਦਾ ਹੈ। ਇਸ ਖੇਤਰ ਵਿੱਚ ਜੇਬਲ ਅਲੀ ਬੰਦਰਗਾਹ ਅਤੇ ਜੇਬਲ ਅਲੀ ਫ੍ਰੀ ਜ਼ੋਨ (ਜਾਫਜ਼ਾ) ਸ਼ਾਮਲ ਹਨ, ਜੋ ਕਿ 1985 ਵਿੱਚ ਸਥਾਪਤ ਇੱਕ ਕੌਮਾਂਤਰੀ ਵਪਾਰ ਕੇਂਦਰ ਹੈ, ਜਿਸ ਵਿੱਚ ਵਰਤਮਾਨ ਵਿੱਚ 150 ਤੋਂ ਵੱਧ ਦੇਸ਼ਾਂ ਦੀ ਨੁਮਾਇੰਦਗੀ ਕਰਨ ਵਾਲੀਆਂ 11,000 ਤੋਂ ਵੱਧ ਕੰਪਨੀਆਂ ਹਨ।