ਨੀਟ ਪੇਪਰ ਲੀਕ ਹੋਣ ‘ਤੇ ਅੰਦੋਲਨ ਕਰ ਰਹੇ ਦਿੱਲੀ ਵਿੱਚ ਵਿਦਿਆਰਥੀਆਂ ‘ਤੇ ਹੋਏ ਤਸ਼ੱਦਦ ਖਿਲਾਫ ਹਲਕਾ ਦੱਖਣੀ ਦੇ ਕਾਂਗਰਸੀ ਵਰਕਰ ਬਾਵਾ ਦੀ ਅਗਵਾਈ ਵਿੱਚ ਸੜਕਾਂ ‘ਤੇ ਉਤਰੇ- ਹੱਥਾਂ ਵਿੱਚ ਫੜੇ ਸਲੋਗਨ

ਲੁਧਿਆਣਾ, 23 ਜੁਲਾਈ (ਗਿਆਨ ਸਿੰਘ/ਏ.ਡੀ.ਪੀ ਨਿਊਜ਼) – ਦਿੱਲੀ ਵਿੱਚ ਨੌਜਵਾਨ ਵਿਦਿਆਰਥੀਆਂ ‘ਤੇ ਅੰਨ੍ਹੇਵਾਦ ਤਸ਼ੱਦਦ ਦੀਆਂ ਤਸਵੀਰਾਂ ਨੇ ਹਰ ਮਨੁੱਖ ਦਾ ਦਿਲ ਦਹਿਲਾ ਦਿੱਤਾ ਪਰ ਭਾਜਪਾ ਦੀ ਕੇਂਦਰ ਸਰਕਾਰ ਨੇ ਅੱਤਿਆਚਾਰ ਦੀਆਂ ਸਭ ਹੱਦਾਂ ਬੰਨੇ ਟੱਪੇ। ਇਹ ਸ਼ਬਦ ਅੱਜ ਸੀਨੀਅਰ ਕਾਂਗਰਸੀ ਨੇਤਾ ਕ੍ਰਿਸ਼ਨ ਕੁਮਾਰ ਬਾਵਾ ਕੋਆਰਡੀਨੇਟਰ ਏ.ਆਈ.ਸੀ.ਸੀ (ਓ.ਬੀ.ਸੀ) ਇੰਚਾਰਜ ਹਿਮਾਚਲ ਪ੍ਰਦੇਸ਼ ਨੇ ਦਿੱਲੀ ਤਸ਼ੱਦਦ ਖਿਲਾਫ ਹਲਕਾ ਦੱਖਣੀ ਵਿੱਚ ਸੜਕਾਂ ‘ਤੇ ਵਿਰੋਧ ਜਿਤਾਉਂਦੇ ਕਾਂਗਰਸੀ ਵਰਕਰਾਂ ਨੂੰ ਸੰਬੋਧਨ ਕਰਦੇ ਹੋਏ ਮੀਡੀਆ ਸਾਹਮਣੇ ਕਹੇ ਜਦੋਂ ਉਹਨਾਂ ਦੇ ਹੱਥਾਂ ਵਿੱਚ ਤਸ਼ੱਦਦ ਦੀਆਂ ਤਸਵੀਰਾਂ ਦੇ ਪੋਸਟਰ ਪਕੜੇ ਹੋਏ ਸਨ। ਸ੍ਰੀ ਬਾਵਾ ਨੇ ਕਿਹਾ ਕਿ ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਅਤੇ ਪ੍ਰਿਅੰਕਾ ਗਾਂਧੀ ਵੱਲੋਂ ਸੜਕਾਂ ‘ਤੇ ਉੱਤਰ ਕੇ ਸ਼ਾਂਤਮਈ

ਅੰਦੋਲਨ ਕਰ ਰਹੇ ਵਿਦਿਆਰਥੀਆਂ ਨਾਲ ਖੜ ਕੇ ਗ੍ਰਿਫਤਾਰੀਆਂ ਦਿੱਤੀਆਂ ਅਤੇ ਨੌਜਵਾਨ ਬੱਚਿਆਂ ਦੀਆਂ ਮੰਗਾਂ ਨੂੰ ਪੂਰਨ ਸਮਰਥਨ ਦੇ ਕੇ ਭਾਜਪਾ ਦੀ ਅੰਨ੍ਹੀ ਬੋਲੀ ਕਠੋਰ ਦਿਲ ਸਰਕਾਰ ਖਿਲਾਫ ਸਖਤ ਸਟੈਂਡ ਲਿਆ।

ਉਹਨਾਂ ਕਿਹਾ ਕਿ ਦੇਸ਼ ਦੇ ਕੋਨੇ ਕੋਨੇ ਤੋਂ ਆਏ ਸਟੂਡੈਂਟ ਬੇਟੇ ਅਤੇ ਬੇਟੀਆਂ ‘ਤੇ ਦਿੱਲੀ ਪੁਲਸ ਵੱਲੋਂ ਕੀਤੇ ਤਸ਼ੱਦਦ ਨੇ ਹਰ ਇਨਸਾਨ ਦੀ ਅੱਖ ਵਿੱਚ ਅੱਥਰੂ ਲਿਆ ਦਿੱਤੇ। ਆਖਿਰ ਉਹ ਕੀ ਕਹਿ ਰਹੇ ਸਨ..? ਸਿਰਫ ਇਨਸਾਫ ਹੀ ਤਾਂ ਮੰਗ ਰਹੇ ਸਨ। ਸਿੱਖਿਆ ਮੰਤਰੀ ਦਾ ਅਸਤੀਫਾ ਨੀਟ ਪੇਪਰ ਲੀਕ ਦੇ ਮੁੱਦੇ ‘ਤੇ ਮੰਗ ਰਹੇ ਸਨ ਪਰ ਸਰਕਾਰ ਅੰਦਰ ਜਨਰਲ ਡਾਇਰ ਦੀ ਰੂਹ ਪ੍ਰਵੇਸ਼ ਕਰਨਾ, ਆਪਣੇ ਹੀ ਬੱਚਿਆਂ ‘ਤੇ ਲਾਠੀਆਂ ਚਲਾਉਣਾ, ਅਥਰੂ ਗੈਸ ਦੇ ਗੋਲੇ ਛੱਡਣਾ, ਨੰਨ੍ਹੀਆਂ ਬੇਟੀਆਂ ‘ਤੇ ਪੁਲਿਸ ਕਰਮੀਆਂ ਦੇ ਡੰਡੇ ਚਲਾਉਣ ‘ਤੇ ਹਰ ਔਲਾਦ ਵਾਲਾ ਇਨਸਾਨ ਰਹਿਮ ਕਰੇਗਾ ਪਰ ਸਾਡਾ ਹਾਕਮ ਬਿਨਾਂ ਔਲਾਦ ਵਾਲਾ ਹੈ। ਸ਼ਾਇਦ ਇਸ ਲਈ ਹੀ ਤਸ਼ੱਦਦ ਕਰਵਾ ਰਿਹਾ ਹੈ। ਉਹਨਾਂ ਕਿਹਾ ਕਿ ਗੁਰਦੁਆਰਾ ਬੰਗਲਾ ਸਾਹਿਬ (ਦਿੱਲੀ) ਦੇ ਪ੍ਰਬੰਧਕਾਂ ਵੱਲੋਂ ਨੌਜਵਾਨ ਬੱਚੇ ਬੱਚਿਆਂ ਨੂੰ ਅੰਦਰ ਬੁਲਾ ਕੇ ਲੰਗਰ ਪਾਣੀ ਦੇ ਨਾਲ ਨਾਲ ਦਵਾਈ ਅਤੇ ਠਹਿਰਨ ਲਈ ਢਾਰਸ ਦੇਣਾ ਸਰਾਨਾਯੋਗ ਹੈ। ਗੁਰੂ ਸਾਹਿਬਾਨ ਦੇ ਦਰਸਾਏ ਰਸਤੇ ‘ਤੇ ਚੱਲਣਾ ਹੈ।

ਇਸ ਸਮੇਂ ਵਰਿੰਦਰ ਭੱਲਾ, ਮਮਤਾ ਰਾਣੀ, ਗੁਰਨਾਮ ਸਿੰਘ ਕਲੇਰ, ਮਾ. ਹਰਦੇਵ ਬਾਵਾ, ਕਿਰਨ ਕਪੂਰ, ਅਮਰਜੀਤ ਕੌਰ, ਨਿਧੀ ਕਪੂਰ, ਵੀਨਾ ਰਾਣੀ, ਰੇਖਾ ਰਾਣੀ, ਲਲਿਤਾ ਦੇਵੀ, ਗੌਰੀ ਰਾਣੀ, ਮਨਦੀਪ ਸਿੰਘ, ਵੀਰਪਾਲ ਸਿੰਘ, ਮਨਜੀਤ ਕੌਰ ਸਰੋਏ, ਮਨਿੰਦਰ ਸਿੰਘ ਊਬੀ, ਗੌਰਵ ਸਰੋਏ, ਗਗਨਦੀਪ ਕੌਰ, ਰਾਜਵਿੰਦਰ ਕੌਰ, ਮਮਤਾ ਰਾਣੀ ਭੱਟੀ, ਹਰਸ਼ ਸ੍ਰੀਵਾਸਤਵ, ਨੰਦਨ ਤਿਵਾਰੀ, ਪਰਮਾਤਮਾ ਤਿਵਾੜੀ, ਅਮਨਦੀਪ ਸਿੰਘ, ਗਗਨਦੀਪ ਸਿੰਘ, ਸੁਖਵਿੰਦਰ ਜਗਦੇਵ, ਅਮਰਪਾਲ ਸਿੰਘ, ਪੀ.ਐਨ ਗੁਲਾਟੀ, ਹਰਜੀਤ ਸਿੰਘ, ਗੁਰਵਿੰਦਰ ਸਿੰਘ, ਦੀਪ ਗਿੱਲ, ਜਸਮੀਤ ਸਿੰਘ, ਮਨਦੀਪ ਸਿੰਘ, ਜਸਵੀਰ ਸਿੰਘ, ਜਤਿੰਦਰ ਵਰਮਾ, ਅਭੀਜੀਤ ਆਦਿ ਹਾਜਰ ਸਨ।