OYO ਕੰਪਨੀ ਨੇ ਗੌਤਮ ਸਵਰੂਪ ਨੂੰ ਬਣਾਇਆ ਨਵਾਂ ਚੀਫ ਬਿਜ਼ਨਸ ਅਫ਼ਸਰ

ਨਵੀਂ ਦਿੱਲੀ, 1 ਜੁਲਾਈ – Swiggy ਦੀ ਮਲਕੀਅਤ ਵਾਲੇ ਕੁਇੱਕ ਕਾਰੋਬਾਰ ਪਲੇਟਫਾਰਮ ‘ਇੰਸਟਾਮਾਰਟ’ ਨੇ ਅੱਜ ਪ੍ਰਾਹੁਣਚਾਰੀ ਖੇਤਰ ਦੀ ਪ੍ਰਮੁੱਖ ਕੰਪਨੀ (OYO) ਦੇ ਸਾਬਕਾ ਸੀਨੀਅਰ ਅਧਿਕਾਰੀ ਗੌਤਮ ਸਵਰੂਪ ਨੂੰ ਆਪਣਾ ਨਵਾਂ ਚੀਫ ਬਿਜ਼ਨਸ ਅਫ਼ਸਰ (CBO) ਨਿਯੁਕਤ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਨਿਯੁਕਤੀ ਅਜਿਹੇ ਸਮੇਂ ਹੋਈ ਹੈ ਜਦੋਂ ਹਾਲ ਹੀ ਵਿੱਚ ਇੰਸਟਾਮਾਰਟ ਦੇ ਸੀਬੀਓ ਹਰੀ ਕੁਮਾਰ ਅਤੇ ਚੀਫ ਓਪਰੇਟਿੰਗ ਅਫ਼ਸਰ (COO) ਅੰਕਿਤ ਜੈਨ ਨੇ ਆਪਣੇ ਅਹੁਦਿਆਂ ਤੋਂ ਅਸਤੀਫ਼ਾ ਦੇ ਦਿੱਤਾ ਸੀ। ਕੰਪਨੀ ਮੁਤਾਬਕ ਗੌਤਮ ਸਵਰੂਪ ਦੀ ਨਿਯੁਕਤੀ ਲੀਡਰਸ਼ਿਪ ਟੀਮ ਨੂੰ ਹੋਰ ਮਜ਼ਬੂਤ ਕਰਨ ਦੀ ਵਿਆਪਕ ਰਣਨੀਤੀ ਦਾ ਹਿੱਸਾ ਹੈ।

ਕੰਪਨੀ ਵੱਲੋਂ ਜਾਰੀ ਬਿਆਨ ਅਨੁਸਾਰ, ਇਸ ਨਵੀਂ ਭੂਮਿਕਾ ਵਿੱਚ ਗੌਤਮ ਸਵਰੂਪ ਇੰਸਟਾਮਾਰਟ ਦੇ ਵਪਾਰਕ ਸੰਚਾਲਨ (Commercial Operations) ਦੀ ਦੇਖਰੇਖ ਕਰਨਗੇ, ਜਿਸ ਵਿੱਚ ਗਾਹਕਾਂ ’ਤੇ ਕੇਂਦ੍ਰਿਤ ਕਾਰੋਬਾਰੀ ਵਿਕਾਸ, ਕੈਟਾਗਰੀ ਮੈਨੇਜਮੈਂਟ, ਬ੍ਰਾਂਡਾਂ ਨਾਲ ਸਾਂਝੇਦਾਰੀ ਅਤੇ ਕਾਰੋਬਾਰ ਦਾ ਵਿਸਤਾਰ ਸ਼ਾਮਲ ਹੈ। ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਓਯੋ ਦੇ ਕੌਮਾਂਤਰੀ ਕਾਰੋਬਾਰ ਦੇ ਸੀਈਓ ਵਜੋਂ ਸਵਰੂਪ ਨੇ ਅਮਰੀਕਾ, ਬ੍ਰਿਟੇਨ, ਯੂਰਪ, ਚੀਨ ਅਤੇ ਲਾਤੀਨੀ ਅਮਰੀਕਾ (LATAM) ਵਰਗੇ ਵੱਡੇ ਬਾਜ਼ਾਰਾਂ ਦੇ ਪੋਰਟਫੋਲੀਓ ਨੂੰ ਮੁਨਾਫ਼ੇ ਵਿੱਚ ਲਿਆਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ।

ਟੀਮ ਵਿੱਚ ਹੋਰ ਵੀ ਕਈ ਨਵੇਂ ਚਿਹਰੇ ਸ਼ਾਮਲ

ਸਵਿਗੀ ਨੇ ਦੱਸਿਆ ਕਿ ਗੌਤਮ ਤੋਂ ਇਲਾਵਾ ਲੀਡਰਸ਼ਿਪ ਨੂੰ ਵਧੇਰੇ ਕੁਸ਼ਲ ਬਣਾਉਣ ਲਈ ਕੁਝ ਹੋਰ ਸੀਨੀਅਰ ਨਿਯੁਕਤੀਆਂ ਵੀ ਕੀਤੀਆਂ ਗਈਆਂ ਹਨ। ਇਨ੍ਹਾਂ ਵਿੱਚ ਸ੍ਰੀਕਰ ਅਦਾਵੀ ਨੂੰ ਵਾਈਸ ਪ੍ਰੈਜ਼ੀਡੈਂਟ (Ad Monetisation) ਅਤੇ ਹਰਦੀਪ ਕੌਰ ਨੂੰ ਐਸੋਸੀਏਟ ਵਾਈਸ ਪ੍ਰੈਜ਼ੀਡੈਂਟ (Category – FMCG) ਵਜੋਂ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਸਵਿਗੀ ਦੇ ਮੁੱਖ ਮਨੁੱਖੀ ਸਰੋਤ ਅਫ਼ਸਰ (CHRO) ਗਿਰੀਸ਼ ਮੈਨਨ ਨੇ ਕਿਹਾ ਕਿ ਇੰਸਟਾਮਾਰਟ ਇਸ ਵੇਲੇ ਇੱਕ ਬਹੁਤ ਹੀ ਦਿਲਚਸਪ ਮੋੜ ’ਤੇ ਹੈ, ਜਿੱਥੇ ਕੰਪਨੀ ਵੱਖ-ਵੱਖ ਵਰਗਾਂ ਵਿੱਚ ਆਪਣੀਆਂ ਸੇਵਾਵਾਂ ਦਾ ਵਿਸਤਾਰ ਕਰ ਰਹੀ ਹੈ। ਉਨ੍ਹਾਂ ਉਮੀਦ ਜਤਾਈ ਕਿ ਗੌਤਮ ਸਵਰੂਪ ਦਾ ਦੋ ਦਹਾਕਿਆਂ ਤੋਂ ਵੱਧ ਦਾ ਤਜਰਬਾ ਖਪਤਕਾਰਾਂ ਨੂੰ ਬਿਹਤਰ ਸਹੂਲਤਾਂ ਦੇਣ ਵਿੱਚ ਮਦਦਗਾਰ ਸਾਬਤ ਹੋਵੇਗਾ।

ਗੌਤਮ ਸਵਰੂਪ ਦਾ ਸ਼ਾਨਦਾਰ ਪਿਛੋਕੜ

ਗੌਤਮ ਸਵਰੂਪ ਕੋਲ ਕੰਸਲਟਿੰਗ, ਫਾਰਮਾਸਿਊਟੀਕਲ ਅਤੇ ਟੈਕਨਾਲੋਜੀ ਖੇਤਰਾਂ ਵਿੱਚ 20 ਸਾਲਾਂ ਤੋਂ ਵੱਧ ਦਾ ਵੱਡਾ ਤਜਰਬਾ ਹੈ। ਉਨ੍ਹਾਂ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਵਿਸ਼ਵ ਪ੍ਰਸਿੱਧ ਕੰਪਨੀ ‘ਮੈਕਕਿਨਸੇ ਐਂਡ ਕੰਪਨੀ’ (McKinsey & Company) ਤੋਂ ਕੀਤੀ ਸੀ, ਜਿੱਥੇ ਉਨ੍ਹਾਂ ਨੇ ਰਣਨੀਤੀ ਅਤੇ ਕਾਰਜ ਪ੍ਰਣਾਲੀ ਦੇ ਬਦਲਾਅ ’ਤੇ 10 ਸਾਲ ਕੰਮ ਕੀਤਾ। ਇਸ ਤੋਂ ਬਾਅਦ ਉਹ ‘ਡਾਕਟਰ ਰੈਡੀਜ਼ ਲੈਬਾਰਟਰੀਜ਼’ (Dr. Reddy’s Laboratories) ਵਿੱਚ ਸ਼ਾਮਲ ਹੋਏ, ਜਿੱਥੇ ਉਨ੍ਹਾਂ ਨੇ ਉੱਭਰਦੇ ਬਾਜ਼ਾਰਾਂ (Emerging Markets) ਦੇ ਕਾਰੋਬਾਰੀ ਮਾਲੀਏ ਨੂੰ 37 ਮਿਲੀਅਨ ਡਾਲਰ ਤੋਂ ਵਧਾ ਕੇ 190 ਮਿਲੀਅਨ ਡਾਲਰ ਤੱਕ ਪਹੁੰਚਾਇਆ। ਆਪਣੀ ਨਵੀਂ ਨਿਯੁਕਤੀ ’ਤੇ ਖੁਸ਼ੀ ਜ਼ਾਹਰ ਕਰਦਿਆਂ ਸਵਰੂਪ ਨੇ ਕਿਹਾ ਕਿ ਉਹ ਇੰਸਟਾਮਾਰਟ ਦੇ ਇਸ ਵਿਕਾਸ ਪੜਾਅ ‘ਤੇ ਟੀਮ ਨਾਲ ਮਿਲ ਕੇ ਗਾਹਕਾਂ ਅਤੇ ਭਾਈਵਾਲਾਂ ਦੇ ਤਜ਼ਰਬੇ ਨੂੰ ਹੋਰ ਬਿਹਤਰ ਬਣਾਉਣ ਲਈ ਤਤਪਰ ਹਨ।