ਚੀਨ ਨੇ ਪਿਛਲੇ ਸਾਲ ਭਾਰਤ ਨਾਲ ਹੋਏ ਟਕਰਾਅ ਦੌਰਾਨ ਪਾਕਿਸਤਾਨ ਨੂੰ ਤਕਨੀਕੀ ਮਦਦ ਦੀ ਕਬੂਲੀ ਗੱਲ

ਝਾਂਗ ਨੇ ਕਿਹਾ, “ਸਪੋਰਟ ਬੇਸ ‘ਤੇ ਸਾਨੂੰ ਅਕਸਰ ਲੜਾਕੂ ਜਹਾਜ਼ਾਂ ਦੇ ਉੱਡਣ ਦਾ ਸ਼ੋਰ ਅਤੇ ਹਵਾਈ ਹਮਲੇ ਦੇ ਸਾਇਰਨਾਂ ਦੀਆਂ ਆਵਾਜ਼ਾਂ ਸੁਣਾਈ ਦਿੰਦੀਆਂ ਸਨ। ਮਈ ਦੇ ਮਹੀਨੇ ਦੁਪਹਿਰ ਤੱਕ ਤਾਪਮਾਨ 50 ਡਿਗਰੀ ਸੈਲਸੀਅਸ ਦੇ ਕਰੀਬ ਪਹੁੰਚ ਜਾਂਦਾ ਸੀ। ਇਹ ਸਾਡੇ ਲਈ ਮਾਨਸਿਕ ਅਤੇ ਸਰੀਰਕ ਤੌਰ ‘ਤੇ ਇੱਕ ਵੱਡੀ ਪ੍ਰੀਖਿਆ ਸੀ। ਝਾਂਗ ਨੇ ਦੱਸਿਆ ਕਿ ਉਨ੍ਹਾਂ ਦੀ ਟੀਮ ਦਾ ਮਕਸਦ ਮੌਕੇ ‘ਤੇ ਵਧੀਆ ਸਹਾਇਤਾ ਦੇਣਾ ਸੀ ਤਾਂ ਜੋ ਉਨ੍ਹਾਂ ਦੇ ਹਥਿਆਰ ਆਪਣੀ ਪੂਰੀ ਤਾਕਤ ਦਿਖਾ ਸਕਣ। ਉਨ੍ਹਾਂ ਕਿਹਾ, “ਇਹ ਸਿਰਫ਼ ਜੇ-10ਸੀਈ (J-10CE) ਜਹਾਜ਼ ਦੀ ਸਫ਼ਲਤਾ ਨਹੀਂ ਸੀ, ਸਗੋਂ ਇਹ ਸਾਡੇ ਉਸ ਡੂੰਘੇ ਰਿਸ਼ਤੇ ਦਾ ਸਬੂਤ ਵੀ ਸੀ ਜੋ ਅਸੀਂ ਦਿਨ-ਰਾਤ ਮੋਢੇ ਨਾਲ ਮੋਢਾ ਜੋੜ ਕੇ ਕੰਮ ਕਰਦਿਆਂ ਬਣਾਇਆ ਸੀ।”

ਚੀਨੀ ਵਿਦੇਸ਼ ਮੰਤਰਾਲੇ ਅਤੇ ਫੌਜੀ ਅਧਿਕਾਰੀਆਂ ਨੇ ਜੰਗ ਦੌਰਾਨ ਪਾਕਿਸਤਾਨ ਦੀ ਮਦਦ ਕਰਨ ਦੇ ਦੋਸ਼ਾਂ ਨੂੰ ਜਾਂ ਤਾਂ ਟਾਲ ਦਿੱਤਾ ਸੀ ਜਾਂ ਫਿਰ ਬਹੁਤ ਮਾਮੂਲੀ ਦੱਸਿਆ ਸੀ। ਭਾਰਤੀ ਫੌਜ ਦੇ ਡਿਪਟੀ ਚੀਫ ਲੈਫਟੀਨੈਂਟ ਜਨਰਲ ਰਾਹੁਲ ਆਰ ਸਿੰਘ ਦੇ ਉਸ ਦਾਅਵੇ ‘ਤੇ ਵੀ ਕੋਈ ਅਧਿਕਾਰਤ ਜਵਾਬ ਨਹੀਂ ਆਇਆ, ਜਿਸ ਵਿੱਚ ਉਨ੍ਹਾਂ ਕਿਹਾ ਸੀ ਕਿ ਚੀਨ ਨੇ ‘ਅਪਰੇਸ਼ਨ ਸਿੰਧੂਰ’ ਦੌਰਾਨ ਪਾਕਿਸਤਾਨ ਨੂੰ ਸਿੱਧੀ ਫੌਜੀ ਮਦਦ ਦਿੱਤੀ ਅਤੇ ਇਸ ਜੰਗ ਨੂੰ ਆਪਣੇ ਹਥਿਆਰਾਂ ਦੀ ਪਰਖ ਕਰਨ ਲਈ ਇੱਕ “ਲਾਈਵ ਲੈਬ” ਵਜੋਂ ਵਰਤਿਆ।

ਚੇਂਗਦੂ ਇੰਸਟੀਚਿਊਟ ਦੇ ਇੱਕ ਹੋਰ ਕਰਮਚਾਰੀ ਸ਼ੂ ਨੇ (ਜਿਸ ਨੇ ਜੰਗ ਦੌਰਾਨ ਪਾਕਿਸਤਾਨ ਦੀ ਮਦਦ ਕੀਤੀ ਸੀ) ਜੇ-10ਸੀਈ ਜਹਾਜ਼ ਦੀ ਤੁਲਨਾ ਇੱਕ “ਬੱਚੇ” ਨਾਲ ਕੀਤੀ। ਸ਼ੂ ਨੇ ਕਿਹਾ, “ਅਸੀਂ ਇਸ ਨੂੰ ਤਿਆਰ ਕੀਤਾ, ਇਸ ਦੀ ਦੇਖਭਾਲ ਕੀਤੀ ਅਤੇ ਫਿਰ ਵਰਤੋਂਕਾਰ ਨੂੰ ਸੌਂਪ ਦਿੱਤਾ। ਹੁਣ ਇਹ ਇੱਕ ਵੱਡੀ ਪ੍ਰੀਖਿਆ ਵਿੱਚੋਂ ਗੁਜ਼ਰ ਰਿਹਾ ਸੀ।” ਉਨ੍ਹਾਂ ਕਿਹਾ ਕਿ ਜਹਾਜ਼ ਨੇ ਜੋ ਸ਼ਾਨਦਾਰ ਨਤੀਜੇ ਦਿੱਤੇ, ਉਹ ਉਨ੍ਹਾਂ ਲਈ ਕੋਈ ਹੈਰਾਨੀ ਵਾਲੀ ਗੱਲ ਨਹੀਂ ਸੀ। ਉਨ੍ਹਾਂ ਮੁਤਾਬਕ ਜਹਾਜ਼ ਨੂੰ ਸਿਰਫ਼ ਇੱਕ ਸਹੀ ਮੌਕੇ ਦੀ ਲੋੜ ਸੀ ਅਤੇ ਜਦੋਂ ਉਹ ਸਮਾਂ ਆਇਆ, ਤਾਂ ਇਸ ਨੇ ਸਾਡੀ ਉਮੀਦ ਮੁਤਾਬਕ ਹੀ ਪ੍ਰਦਰਸ਼ਨ ਕੀਤਾ। ਪਾਕਿਸਤਾਨ ਚੀਨ ਤੋਂ ਇਲਾਵਾ ਜੇ-10ਸੀ ਜਹਾਜ਼ਾਂ ਦੀ ਵਰਤੋਂ ਕਰਨ ਵਾਲਾ ਇਕਲੌਤਾ ਦੇਸ਼ ਹੈ। ਇਸ ਨੇ 2020 ਵਿੱਚ 250 ਪੀਐਲ-15 (PL-15) ਮਿਜ਼ਾਈਲਾਂ ਦੇ ਨਾਲ 36 ਲੜਾਕੂ ਜਹਾਜ਼ਾਂ ਦਾ ਆਰਡਰ ਦਿੱਤਾ ਸੀ।