ਪਤੀ ਵਿਦਿਆਰਥੀ ਹੋਵੇ ਜਾਂ ਬੇਰੁਜ਼ਗਾਰ, ਪਤਨੀ ਨੂੰ ਦੇਣਾ ਪਵੇਗਾ ਗੁਜ਼ਾਰਾ ਭੱਤਾ: ਹਾਈ ਕੋਰਟ ਦਾ ਸਖ਼ਤ ਸੰਦੇਸ਼

ਚੰਡੀਗੜ੍ਹ, 15 ਅਪ੍ਰੈਲ – ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੇ ਇਕ ਮਹੱਤਵਪੂਰਨ ਫ਼ੈਸਲੇ ਵਿਚ ਸਪਸ਼ਟ ਕੀਤਾ ਹੈ ਕਿ ਪਤੀ ਅਪਣੀ ਪਤਨੀ ਦੇ ਗੁਜ਼ਾਰਾ ਭੱਤੇ ਦੀ ਕਾਨੂੰਨੀ ਜ਼ਿੰਮੇਵਾਰੀ ਤੋਂ ਸਿਰਫ਼ ਇਸ ਆਧਾਰ ’ਤੇ ਮੁਕਤ ਨਹੀਂ ਹੋ ਸਕਦਾ ਕਿ ਉਹ ਵਿਦਿਆਰਥੀ ਹੈ ਜਾਂ ਆਰਥਕ ਤੌਰ ’ਤੇ ਕਮਜ਼ੋਰ ਹੈ। ਅਦਾਲਤ ਨੇ ਕਿਹਾ ਕਿ ਜੇ ਪਤੀ ਸਰੀਰਕ ਤੌਰ ’ਤੇ ਤੰਦਰੁਸਤ ਹੈ ਅਤੇ ਕਮਾਈ ਦੀ ਸਮਰੱਥਾ ਰਖਦਾ ਹੈ, ਤਾਂ ਉਸ ਦਾ ਫ਼ਰਜ਼ ਪੂਰਾ ਅਤੇ ਲਾਜ਼ਮੀ ਹੈ। ਇਹ ਟਿਪਣੀ ਜਸਟਿਸ ਸ਼ਾਲਿਨੀ ਸਿੰਘ ਨਾਗਪਾਲ ਦੀ ਬੈਂਚ ਨੇ 22 ਸਾਲ ਦੇ ਇਲੈਕਟਿ੍ਰਕਲ ਇੰਜੀਨੀਅਰਿੰਗ ਦੇ ਵਿਦਿਆਰਥੀ ਦੀ ਅਪੀਲ ਖਾਰਜ ਕਰਦੇ ਹੋਏ ਕੀਤੀ।

ਅਪੀਲਕਰਤਾ ਨੂੰ ਫਰੀਦਾਬਾਦ ਦੀ ਫੈਮਿਲੀ ਕੋਰਟ ਨੇ ਅਗੱਸਤ 2025 ’ਚ ਵੱਖ ਰਹਿ ਰਹੀ ਪਤਨੀ ਨੂੰ 2500 ਰੁਪਏ ਮਹੀਨਾਵਾਰ ਗੁਜ਼ਾਰਾ ਭੱਤਾ ਦੇਣ ਦੇ ਹੁਕਮ ਦਿਤੇ ਗਏ ਸਨ। ਦੋਹਾਂ ਦਾ ਵਿਆਹ ਜੂਨ 2020 ਵਿਚ ਹੋਇਆ ਸੀ, ਜਦੋਂ ਪਤੀ ਨਾਬਾਲਿਗ ਸੀ ਅਤੇ ਪਤਨੀ 25 ਸਾਲ ਦੀ ਸੀ। ਬਾਅਦ ਵਿਚ ਪਤੀ ਨੇ 2023 ਵਿਚ ਵਿਆਹ ਰੱਦ ਕਰਨ ਲਈ ਅਰਜ਼ੀ ਦਿਤੀ, ਜਿਸ ਤੋਂ ਬਾਅਦ ਪਤਨੀ ਨੇ ਗੁਜ਼ਾਰਾ-ਭੱਤੇ ਦੀ ਮੰਗ ਕੀਤੀ। ਅਦਾਲਤ ਨੇ ਕਿਹਾ ਕਿ ‘ਆਮਦਨ ਨਹੀਂ’ ਦਾ ਤਰਕ ਸਿਰਫ਼ ਇਕ ਬਹਾਨਾ ਹੈ, ਜਿਸ ਨੂੰ ਕਾਨੂੰਨ ਵਿਚ ਮਨਜ਼ੂਰ ਨਹੀਂ ਕੀਤਾ ਜਾ ਸਕਦਾ।