ਸਰਪੰਚਾਂ ਨੇ 500 ਕੁੱਤਿਆਂ ਨੂੰ ਜ਼ਹਿਰ ਦੇ ਕੇ ਮਰਵਾਇਆ

ਤੇਲੰਗਾਨਾ, 14 ਜਨਵਰੀ – ਵੋਟਾਂ ਹਾਸਲ ਕਰਨ ਲਈ ਚੋਣਾਂ ਵਿੱਚ ਕੀ-ਕੀ ਵਾਅਦੇ ਨਹੀਂ ਕੀਤੇ ਜਾਂਦੇ? ਮੁਫ਼ਤ ਸਹੂਲਤਾਂ ਤੋਂ ਲੈ ਕੇ ਹਰ ਚੀਜ਼ ਦੀ ਪੇਸ਼ਕਸ਼ ਕੀਤੀ ਜਾਂਦੀ ਹੈ। ਪਰ ਤੇਲੰਗਾਨਾ ਵਿੱਚ ਇੱਕ ਚੋਣ ਵਾਅਦੇ ਨੇ 500 ਕੁੱਤਿਆਂ ਦੀ ਜਾਨ ਲੈ ਲਈ। ਵੋਟਾਂ ਹਾਸਲ ਕਰਨ ਲਈ ਹੀ ਇਕ ਅਜਿਹਾ ਵਾਅਦਾ ਕੀਤਾ ਗਿਆ ਸੀ। ਪੰਚਾਇਤੀ ਚੋਣਾਂ ਖਤਮ ਹੁੰਦੇ ਹੀ ਆਵਾਰਾ ਕੁੱਤਿਆਂ ਤੋਂ ਆਜ਼ਾਦੀ ਦਾ ਵਾਅਦਾ ਕਰਨ ਵਾਲੇ ਸਰਪੰਚਾਂ ਨੇ ਕਾਨੂੰਨ, ਹਮਦਰਦੀ ਅਤੇ ਮਨੁੱਖਤਾ ਦੀ ਅਣਦੇਖੀ ਕੀਤੀ। ਨਤੀਜਾ ਇਹ ਹੋਇਆ ਕਿ ਸਿਰਫ਼ ਇੱਕ ਹਫ਼ਤੇ ਵਿੱਚ ਲਗਭਗ 500 ਕੁੱਤਿਆਂ ਨੂੰ ਜ਼ਹਿਰ ਦੇ ਕੇ ਮਾਰ ਦਿੱਤਾ ਗਿਆ। ਲਾਸ਼ਾਂ ਨੂੰ ਫਿਰ ਪਿੰਡਾਂ ਦੇ ਬਾਹਰ ਦਫ਼ਨਾਇਆ ਗਿਆ। ਤੇਲੰਗਾਨਾ ਦੇ ਕਾਮਾਰੇਡੀ ਅਤੇ ਹਨਮਕੋਂਡਾ ਜ਼ਿਲ੍ਹਿਆਂ ਤੋਂ ਇਹ ਰਿਪੋਰਟ ਦੱਸਦੀਆਂ ਹਨ ਕਿ ਕਿਵੇਂ ਸਰਪੰਚਾਂ ਨੇ ਜਨਤਕ ਮੰਗ ਦੇ ਨਾਮ ‘ਤੇ ਕਾਨੂੰਨ ਨੂੰ ਆਪਣੇ ਹੱਥਾਂ ਵਿੱਚ ਲਿਆ। ਪੁਲਿਸ ਨੇ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਫੋਰੈਂਸਿਕ ਜਾਂਚ ਚੱਲ ਰਹੀ ਹੈ।

ਤੇਲੰਗਾਨਾ ਪੁਲਿਸ ਦੇ ਅਨੁਸਾਰ ਪਿਛਲੇ ਹਫ਼ਤੇ ਕਾਮਾਰੇਡੀ ਜ਼ਿਲ੍ਹੇ ਦੇ ਕਈ ਪਿੰਡਾਂ ਵਿੱਚ ਲਗਭਗ 200 ਅਵਾਰਾ ਕੁੱਤਿਆਂ ਨੂੰ ਜ਼ਹਿਰ ਦੇ ਕੇ ਮਾਰ ਦਿੱਤਾ ਗਿਆ। ਇਸ ਤੋਂ ਪਹਿਲਾਂ, ਹਨਮਕੋਂਡਾ ਜ਼ਿਲ੍ਹੇ ਦੇ ਸ਼ਿਆਮਪੇਟ ਅਤੇ ਅਰੇਪੱਲੀ ਪਿੰਡਾਂ ਵਿੱਚ ਲਗਭਗ 300 ਕੁੱਤਿਆਂ ਦੀ ਮੌਤ ਦੀ ਪੁਸ਼ਟੀ ਹੋਈ ਸੀ, ਜਿਸ ਨਾਲ ਕੁੱਲ ਗਿਣਤੀ ਲਗਭਗ 500 ਹੋ ਗਈ। ਪੁਲਿਸ ਸੂਤਰਾਂ ਦਾ ਕਹਿਣਾ ਹੈ ਕਿ ਕਈ ਚੁਣੇ ਹੋਏ ਸਰਪੰਚ ਇਨ੍ਹਾਂ ਹੱਤਿਆਵਾਂ ਵਿੱਚ ਸਿੱਧੇ ਤੌਰ ‘ਤੇ ਸ਼ਾਮਲ ਹਨ। ਦੋਸ਼ ਹੈ ਕਿ ਇਹ ਕਾਰਵਾਈ ਪੰਚਾਇਤ ਚੋਣਾਂ ਤੋਂ ਪਹਿਲਾਂ ਕੀਤੇ ਗਏ ਵਾਅਦਿਆਂ ਨੂੰ ਪੂਰਾ ਕਰਨ ਲਈ ਕੀਤੀ ਗਈ ਸੀ। ਕਾਮਾਰੇਡੀ ਪੁਲਿਸ ਨੇ ਇਸ ਮਾਮਲੇ ਵਿੱਚ ਛੇ ਲੋਕਾਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ। ਰਿਪੋਰਟਾਂ ਤੋਂ ਪਤਾ ਚੱਲਦਾ ਹੈ ਕਿ ਇਸ ਘਟਨਾ ਵਿੱਚ ਪੰਜ ਸਰਪੰਚ ਸ਼ਾਮਲ ਹਨ। ਹਨਮਕੋਂਡਾ ਜ਼ਿਲ੍ਹੇ ਵਿੱਚ ਦਰਜ ਪਹਿਲੇ ਮਾਮਲੇ ਵਿੱਚ ਨੌਂ ਲੋਕਾਂ ਨੂੰ ਦੋਸ਼ੀ ਵਜੋਂ ਨਾਮਜ਼ਦ ਕੀਤਾ ਗਿਆ ਹੈ: ਦੋ ਮਹਿਲਾ ਸਰਪੰਚ, ਉਨ੍ਹਾਂ ਦੇ ਪਤੀ, ਪਿੰਡ ਪੰਚਾਇਤ ਸਕੱਤਰ ਅਤੇ ਠੇਕਾ ਕਰਮਚਾਰੀ। ਭਾਰਤੀ ਦੰਡ ਸੰਹਿਤਾ ਦੀਆਂ ਧਾਰਾਵਾਂ ਅਤੇ ਜਾਨਵਰਾਂ ਪ੍ਰਤੀ ਬੇਰਹਿਮੀ ਰੋਕਥਾਮ ਐਕਟ ਦੀ ਵਰਤੋਂ ਕੀਤੀ ਗਈ ਹੈ।