ਟਰੰਪ ਨੇ ਕੈਨੇਡਾ ‘ਤੇ ਵਧਾਇਆ 10% ਟੈਰਿਫ਼

ਵਾਸ਼ਿੰਗਟਨ, 27 ਅਕਤੂਬਰ – ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸਾਬਕਾ ਰਾਸ਼ਟਰਪਤੀ ਰੋਨਾਲਡ ਰੀਗਨ ਦੀ ਵਿਸ਼ੇਸ਼ਤਾ ਵਾਲੇ ‘ਫਰਜ਼ੀ’ ਇਸ਼ਤਿਹਾਰ, ਜੋ ਐੱਮ ਐੱਲ ਬੀ ਵਰਲਡ ਸੀਰੀਜ਼ ਦੌਰਾਨ ਪ੍ਰਸਾਰਤ ਕੀਤਾ ਗਿਆ ਸੀ, ਨੂੰ ਲੈ ਕੇ ਕੈਨੇਡਾ ‘ਤੇ ਪਹਿਲਾਂ ਤੋਂ ਲਾਗੂ ਟੈਕਸਾਂ ਤੋਂ ਇਲਾਵਾ 10 ਫੀਸਦੀ ਦਾ ਵਾਧਾ ਕਰ ਦਿੱਤਾ ਹੈ | ਏਅਰ ਫੋਰਸ ਵਨ ‘ਤੇ ਸਵਾਰ ਟਰੰਪ ਨੇ ਟਰੂਥ ਸੋਸ਼ਲ ‘ਤੇ ਪੋਸਟ ਕੀਤਾ—’ਰੋਨਾਲਡ ਰੀਗਨ ਕੌਮੀ ਸੁਰੱਖਿਆ ਅਤੇ ਆਰਥਿਕਤਾ ਦੇ ਉਦੇਸ਼ਾਂ ਲਈ ਟੈਕਸਾਂ ਨੂੰ ਪਸੰਦ ਕਰਦੇ ਸਨ, ਪਰ ਕੈਨੇਡਾ ਨੇ ਕਿਹਾ ਕਿ ਉਹ ਨਹੀਂ ਕਰਦੇ ਸਨ! ਉਨ੍ਹਾਂ (ਕੈਨੇਡਾ) ਦੇ ਇਸ਼ਤਿਹਾਰ ਨੂੰ ਤੁਰੰਤ ਹਟਾ ਦਿੱਤਾ ਜਾਣਾ ਚਾਹੀਦਾ ਸੀ, ਪਰ ਉਨ੍ਹਾਂ ਇਸ ਨੂੰ ਕੱਲ੍ਹ ਰਾਤ ਵਰਲਡ ਸੀਰੀਜ਼ ਦੌਰਾਨ ਚੱਲਣ ਦਿੱਤਾ, ਇਹ ਜਾਣਦੇ ਹੋਏ ਕਿ ਇਹ ਇੱਕ ਧੋਖਾ ਸੀ | ਤੱਥਾਂ ਦੀ ਗੰਭੀਰ ਗਲਤ ਪੇਸ਼ਕਾਰੀ ਅਤੇ ਦੁਸ਼ਮਣੀ ਵਾਲੀ ਕਾਰਵਾਈ ਕਾਰਨ ਮੈਂ ਕੈਨੇਡਾ ‘ਤੇ ਲਾਗੂ ਟੈਕਸਾਂ ਵਿੱਚ 10 ਫੀਸਦੀ ਦਾ ਵਾਧਾ ਕਰ ਰਿਹਾ ਹਾਂ, ਜੋ ਉਹ ਹੁਣ ਅਦਾ ਕਰ ਰਹੇ ਹਨ, ਉਸ ਤੋਂ ਇਲਾਵਾ | ਇਸ ਮਾਮਲੇ ‘ਤੇ ਤੁਹਾਡੇ ਧਿਆਨ ਲਈ ਧੰਨਵਾਦ!’ ਕਈ ਕੈਨੇਡੀਅਨ ਉਤਪਾਦਾਂ ‘ਤੇ ਪਹਿਲਾਂ ਹੀ 35 ਫੀਸਦੀ ਟੈਕਸ ਲੱਗ ਚੁੱਕਾ ਹੈ |