ਨਵੀਂ ਦਿੱਲੀ, 19 ਅਕਤੂਬਰ – ਮਹਿੰਦਰਾ ਦੀ IT ਕੰਪਨੀ Tech ਮਹਿੰਦਰਾ ਨੇ ਜੁਲਾਈ ਤੋਂ ਸਤੰਬਰ ਤਿਮਾਹੀ ਦੇ ਨਤੀਜਿਆਂ ਦਾ ਐਲਾਨ ਕਰ ਦਿੱਤਾ ਹੈ। ਕੰਪਨੀ ਨੇ ਇਨ੍ਹਾਂ ਨਤੀਜਿਆਂ ‘ਚ ਆਪਣੇ ਵਿੱਤੀ ਪ੍ਰਦਰਸ਼ਨ ਦੀ ਜਾਣਕਾਰੀ ਦਿੱਤੀ ਹੈ। ਤਿਮਾਹੀ ਨਤੀਜਿਆਂ ਦਾ ਅਸਰ ਸੋਮਵਾਰ ਨੂੰ ਸ਼ੇਅਰਾਂ ‘ਤੇ ਵੀ ਦੇਖਣ ਨੂੰ ਮਿਲੇਗਾ। ਆਓ, ਜਾਣਦੇ ਹਾਂ ਕਿ ਇਸ ਚਾਲੂ ਕਾਰੋਬਾਰੀ ਸਾਲ ਦੀ ਦੂਜੀ ਤਿਮਾਹੀ ‘ਚ ਕੰਪਨੀ ਦੀ ਵਿੱਤੀ ਸਥਿਤੀ ਕਿਵੇਂ ਰਹੀ।
ਕਿਵੇਂ ਹੈ ਕੰਪਨੀ ਦੀ ਵਿੱਤੀ ਹਾਲਤ?
ਆਈਟੀ ਸੇਵਾ ਪ੍ਰਦਾਤਾ ਟੈਕ ਮਹਿੰਦਰਾ ਨੇ ਸਟਾਕ ਐਕਸਚੇਂਜ ਨੂੰ ਸੂਚਿਤ ਕੀਤਾ ਕਿ ਸਤੰਬਰ ਤਿਮਾਹੀ ਵਿੱਚ ਉਸਦਾ ਸ਼ੁੱਧ ਲਾਭ ਦੋ ਗੁਣਾ ਤੋਂ ਵੱਧ ਵਧ ਕੇ 1,250 ਕਰੋੜ ਰੁਪਏ ਹੋ ਗਿਆ ਹੈ। ਪਿਛਲੇ ਵਿੱਤੀ ਸਾਲ ਦੀ ਇਸੇ ਮਿਆਦ ‘ਚ ਇਹ 493.9 ਕਰੋੜ ਰੁਪਏ ਸੀ। ਕੰਪਨੀ ਦੀ ਆਮਦਨ ਵੀ ਇਸ ਤਿਮਾਹੀ ‘ਚ 3.49 ਫੀਸਦੀ ਵਧ ਕੇ 13,313.2 ਕਰੋੜ ਰੁਪਏ ਹੋ ਗਈ। ਜਦਕਿ ਪਿਛਲੇ ਸਾਲ ਇਸੇ ਤਿਮਾਹੀ ‘ਚ ਇਹ 12,863.9 ਕਰੋੜ ਰੁਪਏ ਸੀ। ਸਟਾਕ ਐਕਸਚੇਂਜ ਫਾਈਲਿੰਗ ਵਿੱਚ ਦਿੱਤੀ ਗਈ ਜਾਣਕਾਰੀ ਦੇ ਅਨੁਸਾਰ, ਕੰਪਨੀ ਦੀ ਹੋਰ ਆਮਦਨ ਵਿੱਚ 4,502 ਮਿਲੀਅਨ ਰੁਪਏ ਦਾ ਲਾਭ ਸ਼ਾਮਲ ਹੈ। ਇਹ ਮੁਨਾਫਾ ਜਾਇਦਾਦ ਦੀ ਵਿਕਰੀ ਤੋਂ ਹੋਇਆ ਹੈ। ਕੰਪਨੀ ਨੇ ਫਰੀਹੋਲਡ ਜ਼ਮੀਨ ਅਤੇ ਇਸ ਨਾਲ ਜੁੜੀਆਂ ਇਮਾਰਤਾਂ ਦੇ ਨਾਲ-ਨਾਲ ਫਰਨੀਚਰ ਅਤੇ ਫਿਕਸਚਰ ਵੇਚ ਕੇ 5,350 ਮਿਲੀਅਨ ਰੁਪਏ ਇਕੱਠੇ ਕੀਤੇ ਹਨ।
ਪ੍ਰੋਜੈਕਟ ਫੋਰਟੀਅਸ ਦਾ ਕੀਤਾ ਉਦਘਾਟਨ
ਟੈਕ ਮਹਿੰਦਰਾ ਦੇ ਸੀਈਓ ਮੋਹਿਤ ਜੋਸ਼ੀ ਨੇ ਇਸ ਸਾਲ ਅਪ੍ਰੈਲ ਵਿੱਚ ਪ੍ਰੋਜੈਕਟ ਫੋਰਟਿਸ ਦਾ ਉਦਘਾਟਨ ਕੀਤਾ ਸੀ। ਇਸ ਪ੍ਰੋਜੈਕਟ ਦੇ ਜ਼ਰੀਏ, ਕੰਪਨੀ ਆਉਣ ਵਾਲੇ ਤਿੰਨ ਸਾਲਾਂ ਵਿੱਚ 15 ਪ੍ਰਤੀਸ਼ਤ ਓਪਰੇਟਿੰਗ ਮਾਰਜਿਨ ਪ੍ਰਾਪਤ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਪ੍ਰੋਜੈਕਟ ਫੋਰਟਿਅਸ ਦੇ ਤਹਿਤ, ਅਸੀਂ ਆਪਣੇ ਗਾਹਕਾਂ ਲਈ ਪਾਰਟਨਰ ਈਕੋਸਿਸਟਮ ਨੂੰ ਮਜ਼ਬੂਤ ਅਤੇ ਵਿਸਤਾਰ ਕਰਨ ‘ਤੇ ਕੇਂਦ੍ਰਿਤ ਹਾਂ। ਇਸ ਪ੍ਰੋਜੈਕਟ ਦੇ ਨਾਲ, ਅਸੀਂ ਉਮੀਦ ਕਰਦੇ ਹਾਂ ਕਿ ਕੰਪਨੀ ਦਾ ਮਾਰਜਿਨ ਤੀਜੀ ਤਿਮਾਹੀ ਤੱਕ ਵਧੇਗਾ। ਭਾਵੇਂ IT ਸੇਵਾਵਾਂ ਉਦਯੋਗ ਮੰਦੀ ਦਾ ਸਾਹਮਣਾ ਕਰ ਰਿਹਾ ਹੈ, ਅਸੀਂ ਆਪਣੇ ਰਣਨੀਤਕ ਸੁਧਾਰ ਦੇ ਯਤਨਾਂ ‘ਤੇ ਤਰੱਕੀ ਕਰਨਾ ਜਾਰੀ ਰੱਖਦੇ ਹਾਂ।
ਕਰਮਚਾਰੀਆਂ ਦੀ ਗਿਣਤੀ ’ਚ ਵਾਧਾ
Tech ਮਹਿੰਦਰਾ ਦਾ ਮੁੱਖ ਦਫਤਰ ਪੁਣੇ ਵਿੱਚ ਸਥਿਤ ਹੈ। ਕੰਪਨੀ ਨੇ ਕਿਹਾ ਕਿ ਉਸ ਨੇ ਸਮੀਖਿਆ ਅਧੀਨ ਤਿਮਾਹੀ ਦੌਰਾਨ 6,653 ਕਰਮਚਾਰੀ ਸ਼ਾਮਲ ਕੀਤੇ ਹਨ। ਇਸ ਤੋਂ ਬਾਅਦ ਕੰਪਨੀ ਦੇ ਕੁੱਲ ਕਰਮਚਾਰੀਆਂ ਦੀ ਗਿਣਤੀ 1,54,273 ਹੋ ਗਈ।
ਟੈੱਕ ਮਹਿੰਦਰਾ ਦੇ ਸ਼ੇਅਰਾਂ ਦੀ ਹਾਲਤ
ਪਿਛਲੇ ਕਾਰੋਬਾਰੀ ਸੈਸ਼ਨ ‘ਚ ਬੀਐੱਸਈ ‘ਤੇ ਟੈੱਕ ਮਹਿੰਦਰਾ ਦਾ ਸ਼ੇਅਰ 0.68 ਫੀਸਦੀ ਦੀ ਗਿਰਾਵਟ ਨਾਲ 1,688 ਰੁਪਏ ਪ੍ਰਤੀ ਸ਼ੇਅਰ ‘ਤੇ ਬੰਦ ਹੋਇਆ। ਜੇ ਕੰਪਨੀ ਦੇ ਸਟਾਕ ਦੇ ਪ੍ਰਦਰਸ਼ਨ ਦੀ ਗੱਲ ਕਰੀਏ ਤਾਂ ਸਟਾਕ ਨੇ ਪਿਛਲੇ ਇਕ ਸਾਲ ‘ਚ 43.77 ਫੀਸਦੀ ਦਾ ਸਕਾਰਾਤਮਕ ਰਿਟਰਨ ਦਿੱਤਾ ਹੈ। ਕੰਪਨੀ ਦੇ ਸ਼ੇਅਰ ਇਸ ਸਾਲ ਅਪ੍ਰੈਲ ਤੋਂ ਹੁਣ ਤੱਕ 41.18 ਫੀਸਦੀ ਵਧੇ ਹਨ।
