84 ਭਾਰਤੀਆਂ ਨੂੰ ਸੁਰੱਖਿਅਤ ਬਚਾਇਆ, ਭਾਰਤ ਨੇ ਰਸੁਵਾ ਭੇਜੀ ਵਿਸ਼ੇਸ਼ ਮੈਡੀਕਲ ਅਤੇ ਟਨਲ ਰੈਸਕਿਊ ਟੀਮ

ਨਵੀਂ ਦਿੱਲੀ, 29 ਅਗਸਤ 2026- ਨੇਪਾਲ ਦੇ ਭੋਟੇ ਕੋਸ਼ੀ ਅਤੇ ਤ੍ਰਿਸ਼ੂਲੀ ਨਦੀ ਖੇਤਰਾਂ ਵਿੱਚ ਆਏ ਭਿਆਨਕ ਹੜ੍ਹਾਂ ਤੋਂ ਬਾਅਦ ਜਾਰੀ ਬਚਾਅ ਕਾਰਜਾਂ ਦੌਰਾਨ 84 ਭਾਰਤੀ ਨਾਗਰਿਕਾਂ ਨੂੰ ਸਫਲਤਾਪੂਰਵਕ ਬਚਾ ਲਿਆ ਗਿਆ ਹੈ। ਵਿਦੇਸ਼ ਮੰਤਰਾਲੇ (MEA) ਦੇ ਬੁਲਾਰੇ ਰਣਧੀਰ ਜੈਸਵਾਲ ਨੇ ਜਾਣਕਾਰੀ ਦਿੱਤੀ ਕਿ ਬਚਾਏ ਗਏ ਲੋਕਾਂ ਵਿੱਚ ਤਾਮਿਲਨਾਡੂ ਦੇ 21 ਨਾਗਰਿਕ ਅਤੇ ਤ੍ਰਿਸ਼ੂਲੀ-1 ਪਣਬਿਜਲੀ ਪ੍ਰੋਜੈਕਟ ‘ਤੇ ਤਾਇਨਾਤ 63 ਕਰਮਚਾਰੀ ਸ਼ਾਮਲ ਹਨ। ਇਸ ਤੋਂ ਇਲਾਵਾ, 149 ਭਾਰਤੀ ਨਾਗਰਿਕ ਚੀਨ ਸਰਹੱਦ ਰਾਹੀਂ ਸੁਰੱਖਿਅਤ ਨੇਪਾਲ ਵਿੱਚ ਦਾਖਲ ਹੋਏ ਹਨ, ਜਦਕਿ ਸੰਚਾਰ ਠੱਪ ਹੋਣ ਕਾਰਨ ਲਗਭਗ 320 ਭਾਰਤੀ ਅਜੇ ਵੀ ਸੰਪਰਕ ਤੋਂ ਬਾਹਰ ਹਨ। ਭਾਰਤ ਨੇ ਨੇਪਾਲ ਵਿੱਚ ਰਾਹਤ ਕਾਰਜਾਂ ਨੂੰ ਹੋਰ ਮਜ਼ਬੂਤ ਕਰਨ ਲਈ ਭਾਰਤੀ ਹਵਾਈ ਸੈਨਾ ਦੇ ਤੀਜੇ ਵਿਸ਼ੇਸ਼ ਜਹਾਜ਼ ਰਾਹੀਂ 11 ਮੈਂਬਰੀ ਮੈਡੀਕਲ ਅਤੇ ਸੁਰੰਗ (ਟਨਲ) ਬਚਾਅ ਟੀਮ ਰਸੁਵਾ ਭੇਜੀ ਹੈ। ਵਿਦੇਸ਼ ਮੰਤਰੀ ਡਾ. ਐਸ. ਜੈਸ਼ੰਕਰ ਨੇ ਦੱਸਿਆ ਕਿ ਇਹ ਟੀਮ ਅਤੇ ਰਾਹਤ ਸਮੱਗਰੀ ਨੇਪਾਲੀ ਪ੍ਰਸ਼ਾਸਨ ਨੂੰ ਸੌਂਪ ਦਿੱਤੀ ਗਈ ਹੈ। ਨੇਪਾਲ ਦੇ ਪ੍ਰਧਾਨ ਮੰਤਰੀ ਬਲੇਨ ਸ਼ਾਹ ਅਨੁਸਾਰ, ਖੋਜ ਅਤੇ ਬਚਾਅ ਕਾਰਜਾਂ ਲਈ 15,000 ਤੋਂ ਵੱਧ ਸੁਰੱਖਿਆ ਕਰਮਚਾਰੀ ਅਤੇ ਹੈਲੀਕਾਪਟਰ ਲਗਾਤਾਰ ਤਾਇਨਾਤ ਹਨ, ਜਿਨ੍ਹਾਂ ਨੇ ਹੁਣ ਤੱਕ 4,451 ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢਿਆ ਹੈ।