19 ਸਾਲਾ ਪੂਜਾ ਨੇ ਏਸ਼ੀਅਨ ਅੰਡਰ-20 ਚੈਂਪੀਅਨਸ਼ਿਪ ਵਿੱਚ ਜਿੱਤਿਆ ਸੋਨ ਤਗਮਾ
ਹਾਂਗਕਾਂਗ, 30 ਮਈ – ਏਸ਼ੀਆਈ ਅੰਡਰ-20 ਐਥਲੈਟਿਕਸ ਚੈਂਪੀਅਨਸ਼ਿਪ ਦੇ ਦੂਜੇ ਦਿਨ ਭਾਰਤ ਦੀ 19 ਸਾਲਾ ਪੂਜਾ ਸਿੰਘ ਨੇ ਉੱਚੀ ਕੂਦ ਵਿੱਚ ਨਾ ਸਿਰਫ਼ ਸੋਨ ਤਗ਼ਮਾ ਜਿੱਤਿਆ, ਸਗੋਂ 14 ਸਾਲਾਂ ਤੋਂ ਚੱਲੇ ਆ ਰਹੇ ਸੀਨੀਅਰ ਨੈਸ਼ਨਲ ਰਿਕਾਰਡ ਨੂੰ ਵੀ ਤੋੜ ਦਿੱਤਾ। ਪੂਜਾ ਨੇ 1.93 ਮੀਟਰ ਦੀ ਛਾਲ ਲਗਾ ਕੇ ਸਹਾਨਾ ਕੁਮਾਰੀ ਵੱਲੋਂ 2012 ਵਿੱਚ ਬਣਾਏ ਗਏ 1.92 ਮੀਟਰ ਦੇ ਸੀਨੀਅਰ ਨੈਸ਼ਨਲ ਰਿਕਾਰਡ ਨੂੰ ਮਾਤ ਦਿੱਤੀ। ਇਸ ਮੁਕਾਬਲੇ ਤੋਂ ਪਹਿਲਾਂ ਪੂਜਾ ਦਾ ਨਿੱਜੀ ਸਰਵੋਤਮ ਪ੍ਰਦਰਸ਼ਨ 1.90 ਮੀਟਰ ਸੀ। ਇਸ ਲਈ ਪੂਜਾ ਵੱਲੋਂ ਨਵਾਂ ਰਾਸ਼ਟਰੀ ਰਿਕਾਰਡ ਬਣਾਉਣਾ ਕੋਈ ਹੈਰਾਨੀ ਵਾਲੀ ਗੱਲ ਨਹੀਂ ਸੀ।
ਪਿਛਲੇ ਸਾਲ ਵੀ ਦਿਖਾਇਆ ਕਮਾਲ
ਪਿਛਲੇ ਸਾਲ ਦੱਖਣੀ ਕੋਰੀਆ ਵਿੱਚ ਹੋਈ ਏਸ਼ੀਆਈ ਚੈਂਪੀਅਨਸ਼ਿਪ ਵਿੱਚ ਵੀ ਪੂਜਾ ਨੇ 1.89 ਮੀਟਰ ਦੀ ਛਾਲ ਲਗਾ ਕੇ ਸੋਨ ਤਗ਼ਮਾ ਜਿੱਤਿਆ ਸੀ। ਹਾਲਾਂਕਿ ਪੂਜਾ ਨੇ ਹਾਲ ਹੀ ਵਿੱਚ ਰਾਂਚੀ ਵਿੱਚ ਹੋਏ ਫੈਡਰੇਸ਼ਨ ਕੱਪ ਵਿੱਚ ਹਿੱਸਾ ਨਹੀਂ ਲਿਆ ਸੀ, ਪਰ ਹੁਣ ਇਸ ਸ਼ਾਨਦਾਰ ਛਾਲ ਨਾਲ ਉਨ੍ਹਾਂ ਨੇ 2026 ਰਾਸ਼ਟਰਮੰਡਲ ਖੇਡਾਂ ਲਈ ਮਿੱਥੇ ਗਏ 1.92 ਮੀਟਰ ਦੇ ਕੁਆਲੀਫਾਇੰਗ ਮਾਰਕ ਨੂੰ ਪਾਰ ਕਰ ਲਿਆ ਹੈ।ਸੰਘਰਸ਼ਾਂ ਦਾ ਕੀਤਾ ਸਾਹਮਣਾ
ਹਰਿਆਣਾ ਦੇ ਫਤਿਹਾਬਾਦ ਦੇ ਇੱਕ ਪਿੰਡ ਵਿੱਚ ਰਾਜਮਿਸਤਰੀ ਦੀ ਬੇਟੀ ਪੂਜਾ ਨੂੰ ਆਪਣੇ ਕਰੀਅਰ ਦੀ ਸ਼ੁਰੂਆਤ ਵਿੱਚ ਆਰਥਿਕ ਤੰਗੀ ਦਾ ਸਾਹਮਣਾ ਕਰਨਾ ਪਿਆ ਸੀ। ਉਸ ਨੂੰ ਪਿੰਡ ਦੇ ਖੇਤਾਂ ਵਿੱਚ ਬਾਂਸ ਦੇ ਡੰਡਿਆਂ ਅਤੇ ਤੂੜੀ ਦੀਆਂ ਬੋਰੀਆਂ ਦੀ ਮਦਦ ਨਾਲ ਅਭਿਆਸ ਕਰਨਾ ਪਿਆ ਸੀ। ਦੋ ਦਿਨਾਂ ਦੇ ਮੁਕਾਬਲਿਆਂ ਵਿੱਚ ਭਾਰਤ ਹੁਣ ਤੱਕ ਚਾਰ ਸੋਨ, ਦੋ ਚਾਂਦੀ ਅਤੇ ਦੋ ਕਾਂਸੀ ਦੇ ਤਗ਼ਮੇ ਜਿੱਤ ਚੁੱਕਾ ਹੈ।
Share this content:
Post Comment