ਚੰਡੀਗੜ੍ਹ ’ਚ 2.96 ਕਰੋੜ ਰੁਪਏ ’ਚ ਵਿਕੇ ਗੱਡੀਆਂ ਦੇ VIP ਨੰਬਰ

ਚੰਡੀਗੜ੍ਹ, 23 ਦਸੰਬਰ – ਚੰਡੀਗੜ੍ਹ ਵਿੱਚ “ਸ਼ੌਂਕ ਵੱਡੀ ਚੀਜ਼ ਹੈ” ਵਾਲੀ ਕਹਾਵਤ ਇੱਕ ਵਾਰ ਫਿਰ ਸੱਚ ਸਾਬਤ ਹੋਈ ਹੈ। ਇੱਥੋਂ ਦੇ ਅਮੀਰਾਂ ਦੇ ਸਿਰ ‘ਤੇ ਵੀਆਈਪੀ ਨੰਬਰਾਂ ਦਾ ਨਸ਼ਾ ਇਸ ਕਦਰ ਚੜ੍ਹਿਆ ਹੈ ਕਿ ਉਹ ਗੱਡੀ ਦੀ ਕੀਮਤ ਤੋਂ ਜ਼ਿਆਦਾ ਪੈਸੇ ਉਸਦੀ ‘ਨੰਬਰ ਪਲੇਟ’ ‘ਤੇ ਖਰਚ ਕਰ ਰਹੇ ਹਨ। ਸੋਮਵਾਰ ਨੂੰ ਟਰਾਂਸਪੋਰਟ ਵਿਭਾਗ ਨੇ ਜਦੋਂ ‘CH01-DC’ ਸੀਰੀਜ਼ ਦੀ ਨਿਲਾਮੀ ਦੇ ਨਤੀਜੇ ਐਲਾਨੇ, ਤਾਂ ਹਰ ਕੋਈ ਹੈਰਾਨ ਰਹਿ ਗਿਆ। 20 ਤੋਂ 22 ਦਸੰਬਰ ਤੱਕ ਚੱਲੀ ਇਸ ਆਨਲਾਈਨ ਨਿਲਾਮੀ ਵਿੱਚ ‘0001’ ਨੰਬਰ ਲਈ ਸਭ ਤੋਂ ਉੱਚੀ ਬੋਲੀ ਲੱਗੀ ਅਤੇ ਇਸਨੂੰ 31.35 ਲੱਖ ਰੁਪਏ ਦੀ ਭਾਰੀ-ਭਰਕਮ ਕੀਮਤ ‘ਤੇ ਖਰੀਦਿਆ ਗਿਆ। ਇਸ ਦੀਵਾਨਗੀ ਨੇ ਸਰਕਾਰੀ ਖਜ਼ਾਨੇ ਨੂੰ ਵੀ ਮਾਲਾਮਾਲ ਕਰ ਦਿੱਤਾ ਹੈ।

ਕਰੋੜਾਂ ਦੀ ਕਮਾਈ ਅਤੇ ‘DC’ ਦਾ ਕ੍ਰੇਜ਼

ਟਰਾਂਸਪੋਰਟ ਵਿਭਾਗ ਦੁਆਰਾ ਜਾਰੀ ਅੰਕੜਿਆਂ ਮੁਤਾਬਕ, ਇਸ ਨਿਲਾਮੀ ਵਿੱਚ ਕੁੱਲ 485 ਫੈਂਸੀ ਨੰਬਰ ਵੇਚੇ ਗਏ, ਜਿਸ ਨਾਲ ਵਿਭਾਗ ਨੂੰ 2.96 ਕਰੋੜ ਰੁਪਏ ਦਾ ਮਾਲੀਆ ਪ੍ਰਾਪਤ ਹੋਇਆ ਹੈ। ਖਾਸ ਗੱਲ ਇਹ ਹੈ ਕਿ ਇਸ ਵਾਰ ਖਰੀਦਦਾਰਾਂ ਵਿੱਚ ‘DC’ ਸੀਰੀਜ਼ ਨੂੰ ਲੈ ਕੇ ਵੱਖਰਾ ਹੀ ਉਤਸ਼ਾਹ ਸੀ, ਸ਼ਾਇਦ ਇਸ ਲਈ ਕਿਉਂਕਿ ‘DC’ ਨੂੰ ਰੁਤਬੇ ਨਾਲ ਜੋੜ ਕੇ ਦੇਖਿਆ ਜਾ ਰਿਹਾ ਹੈ। ਇਹੀ ਕਾਰਨ ਰਿਹਾ ਕਿ ਦੂਜੇ ਨੰਬਰ ‘ਤੇ ਰਹੇ ‘CH01-DC-0009’ ਲਈ ਵੀ 20.72 ਲੱਖ ਰੁਪਏ ਦੀ ਬੋਲੀ ਲਗਾਈ ਗਈ। ਹਾਲਾਂਕਿ, ਸੁਰੱਖਿਆ ਕਾਰਨਾਂ ਕਰਕੇ ਪ੍ਰਸ਼ਾਸਨ ਨੇ ਖਰੀਦਦਾਰਾਂ ਦੀ ਪਛਾਣ ਉਜਾਗਰ ਨਹੀਂ ਕੀਤੀ ਹੈ।

ਜਦੋਂ 70 ਹਜ਼ਾਰ ਦੀ ਸਕੂਟੀ ‘ਤੇ ਲੱਗਾ 15 ਲੱਖ ਦਾ ਨੰਬਰ

ਟ੍ਰਾਈਸਿਟੀ ਵਿੱਚ ਨੰਬਰਾਂ ਲਈ ਲੱਖਾਂ ਉਡਾਉਣਾ ਕੋਈ ਨਵੀਂ ਘਟਨਾ ਨਹੀਂ ਹੈ। ਤੁਹਾਨੂੰ ਯਾਦ ਕਰਵਾ ਦੇਈਏ ਕਿ 3 ਸਾਲ ਪਹਿਲਾਂ ਚੰਡੀਗੜ੍ਹ ਵਿੱਚ ਹੀ ਇੱਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਸੀ ਜਿਸਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਸੀ। ਉਦੋਂ ਐਡਵਰਟਾਈਜ਼ਿੰਗ ਪੇਸ਼ੇ ਨਾਲ ਜੁੜੇ 42 ਸਾਲਾ ਬ੍ਰਿਜ ਮੋਹਨ ਨੇ ਆਪਣੀ 70 ਹਜ਼ਾਰ ਰੁਪਏ ਦੀ ਐਕਟਿਵਾ ਲਈ 15 ਲੱਖ ਰੁਪਏ ਦਾ ਨੰਬਰ ਖਰੀਦਿਆ ਸੀ।

ਗੁਆਂਢੀ ਸੂਬੇ ਹਰਿਆਣਾ ‘ਚ ਕਰੋੜਾਂ ਦੀ ਬੋਲੀ

ਵੀਆਈਪੀ ਨੰਬਰਾਂ ਦੀ ਇਹ ਹੋੜ ਸਿਰਫ਼ ਚੰਡੀਗੜ੍ਹ ਤੱਕ ਸੀਮਤ ਨਹੀਂ ਹੈ। ਗੁਆਂਢੀ ਸੂਬੇ ਹਰਿਆਣਾ ਵਿੱਚ ਵੀ ਇਸਦਾ ਵੱਡਾ ਕ੍ਰੇਜ਼ ਹੈ। ਉੱਥੇ ਹਾਲ ਹੀ ਵਿੱਚ ‘HR88B8888’ ਨੰਬਰ ਲਈ ਬੋਲੀ 1.17 ਕਰੋੜ ਰੁਪਏ ਤੱਕ ਪਹੁੰਚ ਗਈ ਸੀ, ਹਾਲਾਂਕਿ ਭੁਗਤਾਨ ਨਾ ਹੋਣ ‘ਤੇ ਉਸਨੂੰ ਰੱਦ ਕਰ ਦਿੱਤਾ ਗਿਆ ਸੀ। ਇਸ ਤੋਂ ਇਲਾਵਾ ਗੁਰੂਗ੍ਰਾਮ ਵਿੱਚ ਵੀ 0001 ਨੰਬਰ 22.80 ਲੱਖ ਰੁਪਏ ਵਿੱਚ ਵਿਕ ਚੁੱਕਾ ਹੈ।