ਸਿਰਫ਼ 3600 ਰੁਪਏ ਲਈ ਰਾਸ਼ਟਰੀ ਕਬੱਡੀ ਖਿਡਾਰਨ ਦਾ ਕਤਲ

ਮੇਰਠ, 1 ਜੂਨ – ਸਿਰਫ਼ 3600 ਰੁਪਏ ਦੀ ਉਧਾਰੀ ਨਾ ਚੁਕਾਉਣ ‘ਤੇ ਫਾਸਟ ਫੂਡ ਸਟਾਲ ਚਲਾਉਣ ਵਾਲੇ ਨੇ ਰਾਸ਼ਟਰੀ ਕਬੱਡੀ ਖਿਡਾਰਨ ਅਨੁਸ਼ਕਾ ਪਾਲ ਦਾ ਸਿਰ ਵਿੱਚ ਇੱਟ ਮਾਰ ਕੇ ਕਤਲ ਕਰ ਦਿੱਤਾ ਅਤੇ ਰੋਹਟਾ ਰੋਡ ਸਥਿਤ ਨਾਲੇ ਵਿੱਚ ਸੁੱਟ ਦਿੱਤਾ। ਇਸ ਤੋਂ ਬਾਅਦ ਉਹ ਚੰਡੀਗੜ੍ਹ ਭੱਜ ਗਿਆ। ਡੇਢ ਮਹੀਨੇ ਬਾਅਦ ਪੁਲਿਸ ਨੇ ਚੰਡੀਗੜ੍ਹ ਤੋਂ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰਕੇ ਉਸ ਦੀ ਨਿਸ਼ਾਨਦੇਹੀ ‘ਤੇ ਐਤਵਾਰ ਨੂੰ ਨਾਲੇ ਵਿੱਚੋਂ ਅਨੁਸ਼ਕਾ ਦੀ ਗਲੀ-ਸੜੀ ਲਾਸ਼ ਬਰਾਮਦ ਕਰ ਲਈ। ਪਰਿਵਾਰ ਵਾਲੇ ਪੂਰੀ ਤਰ੍ਹਾਂ ਪਛਾਣ ਦੀ ਪੁਸ਼ਟੀ ਨਹੀਂ ਕਰ ਰਹੇ, ਜਿਸ ਕਾਰਨ ਪੁਲਿਸ ਡੀ.ਐੱਨ.ਏ. (DNA) ਟੈਸਟ ਕਰਵਾਏਗੀ। ਦੌਰਾਲਾ ਦੇ ਚਿਰੌੜੀ ਪਿੰਡ ਦੇ ਨਿਵਾਸੀ ਨੇਮਪਾਲ ਦੀ ਧੀ ਅਨੁਸ਼ਕਾ ਪਾਲ ਰਾਸ਼ਟਰੀ ਕਬੱਡੀ ਖਿਡਾਰਨ ਸੀ। 17 ਸਾਲਾ ਅਨੁਸ਼ਕਾ ਨੇ ਇਸੇ ਸਾਲ ਕ੍ਰਿਸ਼ਨਾ ਪਬਲਿਕ ਸਕੂਲ ਤੋਂ 12ਵੀਂ ਪਾਸ ਕੀਤੀ ਸੀ। ਪਿੰਡ ਤੋਂ ਸਕੂਲ ਅਤੇ ਅਭਿਆਸ ਵਾਲੀ ਥਾਂ ਤੱਕ ਆਉਣ-ਜਾਣ ਵਿੱਚ ਦਿੱਕਤ ਹੋਣ ਕਰਕੇ ਉਹ ਨੌਂ ਮਹੀਨਿਆਂ ਤੋਂ ਸ਼ੋਭਾਪੁਰ ਬਾਈਪਾਸ ‘ਤੇ ਕਿਰਾਏ ਦੇ ਮਕਾਨ ਵਿੱਚ ਰਹਿ ਰਹੀ ਸੀ।