ਸਪੇਨ ਦੇ ਸਿਊਟਾ ’ਚ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਨਾਕਾਮ: ਮੋਰੱਕੋ ਪੁਲਿਸ ਵੱਲੋਂ 294 ਪਰਵਾਸੀ ਗ੍ਰਿਫ਼ਤਾਰ
ਕੈਸਾਬਲਾਂਕਾ, 18 ਅਗਸਤ – ਮੋਰੱਕੋ ਦੇ ਸੁਰੱਖਿਆ ਬਲਾਂ ਨੇ ਜ਼ਮੀਨ ਤੇ ਸਮੁੰਦਰੀ ਰਸਤੇ ਸਪੇਨ ਦੇ ਇਲਾਕੇ ਸਿਊਟਾ ਪਹੁੰਚਣ ਦੀ ਕੋਸ਼ਿਸ਼ ਕਰ ਰਹੇ ਸੈਂਕੜੇ ਪਰਵਾਸੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਹ ਤਾਜ਼ਾ ਕੋਸ਼ਿਸ਼ ਉਸ ਘਟਨਾ ਦੇ ਦੋ ਹਫ਼ਤੇ ਬਾਅਦ ਹੋਈ ਹੈ, ਜਦੋਂ ਗ਼ਰੀਬੀ ਅਤੇ ਗ਼ਲਤ ਜਾਣਕਾਰੀ ਕਾਰਨ ਹਜ਼ਾਰਾਂ ਪਰਵਾਸੀ ਸਿਊਟਾ ਵੱਲ ਦੌੜੇ ਸਨ, ਜੋ ਇਸ ਇਲਾਕੇ ਦੇ ਸਭ ਤੋਂ ਖ਼ਤਰਨਾਕ ਮਾਈਗ੍ਰੇਸ਼ਨ ਸੰਕਟਾਂ ਵਿਚੋਂ ਇੱਕ ਸੀ। ਅਧਿਕਾਰਤ ਅੰਕੜਿਆਂ ਅਨੁਸਾਰ, ਸਰਹੱਦ ਦੇ ਦੋਵਾਂ ਪਾਸੇ 90 ਲੋਕਾਂ ਦੀ ਮੌਤ ਹੋਈ। ਮੋਰੱਕੋ ਦੇ ਸਰਕਾਰੀ ਬ੍ਰੌਡਕਾਸਟਰ ਮੇਡੀ-1 ਟੀਵੀ ਨੇ ਐਤਵਾਰ ਨੂੰ ਦੱਸਿਆ ਕਿ ਸ਼ਨੀਵਾਰ ਨੂੰ ਸਿਊਟਾ ਵਿਚ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਕਰ ਰਹੇ ਸਬ-ਸਹਾਰਾ ਅਫ਼ਰੀਕਾ ਦੇ 294 ਪਰਵਾਸੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਪਰਵਾਸੀਆਂ ਦੀ ਇਸ ਕੋਸ਼ਿਸ਼ ਵਿਚ ਮਦਦ ਕਰਨ ਦੇ ਦੋਸ਼ ਵਿਚ ਮੋਰੱਕੋ ਦੇ 61 ਨਾਗਰਿਕਾਂ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਸਰਹੱਦ ਪਾਰ ਕਰਨ ਦੀਆਂ ਇਹ ਕੋਸ਼ਿਸ਼ਾਂ ਇੰਟਰਨੈੱਟ ਮੀਡੀਆ ’ਤੇ ਉਨ੍ਹਾਂ ਪੋਸਟਾਂ ਦੇ ਵਧਣ ਤੋਂ ਬਾਅਦ ਹੋਈਆਂ, ਜਿਨ੍ਹਾਂ ਵਿਚ ਪਰਵਾਸੀਆਂ ਨੂੰ ਮੋਰੱਕੋ ਦੇ ਉੱਤਰੀ ਤੱਟ ’ਤੇ ਸਥਿਤ ਸਪੇਨੀ ਸ਼ਹਿਰ ਸਿਊਟਾ ਜਾਣ ਲਈ ਕਿਹਾ ਗਿਆ ਸੀ। ਇਸ ਦੇ ਜਵਾਬ ਵਿਚ, ਮੋਰੱਕੋ ਤੇ ਸਪੇਨ ਦੇ ਅਧਿਕਾਰੀਆਂ ਨੇ ਸੁਰੱਖਿਆ ਵਧਾ ਦਿੱਤੀ ਤੇ ਉਸ ਇਲਾਕੇ ਵੱਲ ਲੋਕਾਂ ਦੀ ਆਵਾਜਾਈ ਨੂੰ ਸੀਮਤ ਕਰ ਦਿੱਤਾ। ਗ੍ਰਹਿ ਮੰਤਰਾਲੇ ਨੇ ਤਾਜ਼ਾ ਗ੍ਰਿਫ਼ਤਾਰੀਆਂ ਜਾਂ ਮਾਈਗ੍ਰੇਸ਼ਨ ਦੀ ਤਾਜ਼ਾ ਕੋਸ਼ਿਸ਼ ਨੂੰ ਰੋਕਣ ਲਈ ਸਰਹੱਦ ’ਤੇ ਤਾਇਨਾਤ ਸੁਰੱਖਿਆ ਮੁਲਾਜ਼ਮਾਂ ਦੀ ਗਿਣਤੀ ਬਾਰੇ ਕੋਈ ਜਵਾਬ ਨਹੀਂ ਦਿੱਤਾ। ਹਾਲਾਂਕਿ, ਮੋਰੱਕੋ ਦੇ ਇੱਕ ਸੀਨੀਅਰ ਰਾਜਦੂਤ ਨੇ ਪਹਿਲਾਂ ਕਿਹਾ ਸੀ ਕਿ ਸਿਊਟਾ ਨਾਲ ਲੱਗਦੀ ਸਰਹੱਦ ’ਤੇ ਹਰ ਦਿਨ 20,000 ਤੋਂ ਵੱਧ ਮੋਰੱਕੋ ਦੇ ਸੁਰੱਖਿਆ ਕਰਮੀ ਤਾਇਨਾਤ ਕੀਤੇ ਜਾਂਦੇ ਹਨ, ਜਿਸ ’ਤੇ ਕਰੋੜਾਂ ਡਾਲਰ ਦਾ ਖ਼ਰਚਾ ਆਉਂਦਾ ਹੈ।
Share this content:
Post Comment