ਲੋਨ ਲੈਣ ਵਾਲਿਆਂ ਲਈ ਖੁਸ਼ਖਬਰੀ, RBI ਨੇ ਘਟਾਇਆ ਰੈਪੋ ਰੇਟ

ਮੁੰਬਈ, 5 ਦਸੰਬਰ – ਕਰੋੜਾਂ ਕਰਜ਼ਦਾਰਾਂ ਲਈ ਸ਼ੁੱਕਰਵਾਰ ਦਾ ਦਿਨ ਵੱਡੀ ਰਾਹਤ ਲੈ ਕੇ ਆਇਆ ਹੈ। ਭਾਰਤੀ ਰਿਜ਼ਰਵ ਬੈਂਕ ਨੇ ਆਪਣੀ ਮੁਦਰਾ ਨੀਤੀ ਦਾ ਐਲਾਨ ਕਰਦਿਆਂ ਰੈਪੋ ਰੇਟ ਵਿੱਚ 0.25 ਪ੍ਰਤੀਸ਼ਤ ਦੀ ਕਟੌਤੀ ਕਰ ਦਿੱਤੀ ਹੈ। ਆਰਬੀਆਈ ਗਵਰਨਰ ਸੰਜੇ ਮਲਹੋਤਰਾ ਨੇ ਤਿੰਨ ਰੋਜ਼ਾ MPC ਮੀਟਿੰਗ ਤੋਂ ਬਾਅਦ ਐਲਾਨ ਕੀਤਾ ਕਿ ਰੈਪੋ ਰੇਟ ਹੁਣ 5.50 ਫੀਸਦੀ ਤੋਂ ਘਟ ਕੇ 5.25 ਫੀਸਦੀ ਹੋ ਗਿਆ ਹੈ। ਦੱਸ ਦੇਈਏ ਕਿ ਇਹ ਫੈਸਲਾ ਰਿਕਾਰਡ ਹੇਠਲੇ ਪੱਧਰ ‘ਤੇ ਪਹੁੰਚ ਚੁੱਕੀ ਮਹਿੰਗਾਈ ਅਤੇ ਵਿਕਾਸ ਦਰ ਨੂੰ ਸਹਾਰਾ ਦੇਣ ਦੇ ਉਦੇਸ਼ ਨਾਲ ਲਿਆ ਗਿਆ ਹੈ, ਜਿਸਦਾ ਸਿੱਧਾ ਫਾਇਦਾ ਆਮ ਆਦਮੀ ਨੂੰ ਸਸਤੀ EMI ਦੇ ਰੂਪ ਵਿੱਚ ਮਿਲੇਗਾ।

ਹੋਮ ਅਤੇ ਕਾਰ ਲੋਨ ਹੋਣਗੇ ਸਸਤੇ

ਰੈਪੋ ਰੇਟ ਘੱਟ ਹੋਣ ਦਾ ਮਤਲਬ ਹੈ ਕਿ ਬੈਂਕਾਂ ਨੂੰ ਹੁਣ RBI ਤੋਂ ਸਸਤਾ ਕਰਜ਼ਾ ਮਿਲੇਗਾ। ਉਮੀਦ ਕੀਤੀ ਜਾ ਰਹੀ ਹੈ ਕਿ ਬੈਂਕ ਜਲਦੀ ਹੀ ਇਸ ਫਾਇਦੇ ਨੂੰ ਆਪਣੇ ਗਾਹਕਾਂ ਤੱਕ ਪਹੁੰਚਾਉਣਗੇ। ਇਸ ਨਾਲ ਹੋਮ ਲੋਨ (Home Loan), ਕਾਰ ਲੋਨ ਅਤੇ ਪਰਸਨਲ ਲੋਨ ਦੀਆਂ ਵਿਆਜ ਦਰਾਂ ਘੱਟ ਹੋ ਜਾਣਗੀਆਂ। ਜੇਕਰ ਕਿਸੇ ਨੇ 50 ਲੱਖ ਰੁਪਏ ਦਾ ਹੋਮ ਲੋਨ 8.5% ਵਿਆਜ ‘ਤੇ 20 ਸਾਲਾਂ ਲਈ ਲਿਆ ਹੈ, ਤਾਂ 0.25% ਕਟੌਤੀ ਤੋਂ ਬਾਅਦ ਉਸਦੀ EMI 43,391 ਰੁਪਏ ਤੋਂ ਘਟ ਕੇ 42,603 ਰੁਪਏ ਹੋ ਜਾਵੇਗੀ। ਯਾਨੀ ਹਰ ਮਹੀਨੇ 788 ਰੁਪਏ ਅਤੇ ਸਾਲਾਨਾ 9,456 ਰੁਪਏ ਦੀ ਬੱਚਤ ਹੋਵੇਗੀ।

ਇਸ ਸਾਲ ਚੌਥੀ ਵਾਰ ਘਟੀਆਂ ਦਰਾਂ

ਪ੍ਰਚੂਨ ਮਹਿੰਗਾਈ ਵਿੱਚ ਲਗਾਤਾਰ ਗਿਰਾਵਟ ਨੂੰ ਦੇਖਦੇ ਹੋਏ RBI ਨੇ ਇਸ ਸਾਲ ਚੌਥੀ ਵਾਰ ਦਰਾਂ ਵਿੱਚ ਕਟੌਤੀ ਕੀਤੀ ਹੈ। ਫਰਵਰੀ ਤੋਂ ਹੁਣ ਤੱਕ ਕੁੱਲ 1.25% ਦੀ ਕਟੌਤੀ ਕੀਤੀ ਜਾ ਚੁੱਕੀ ਹੈ। ਹਾਲਾਂਕਿ, ਪਿਛਲੀਆਂ ਦੋ ਮੀਟਿੰਗਾਂ ਵਿੱਚ ਰੈਪੋ ਰੇਟ ਨੂੰ ਸਥਿਰ ਰੱਖਿਆ ਗਿਆ ਸੀ। ਗਵਰਨਰ ਮਲਹੋਤਰਾ ਨੇ ਦੱਸਿਆ ਕਿ ਦੇਸ਼ ਦੀ ਅਰਥਵਿਵਸਥਾ ਮਜ਼ਬੂਤ ਹੈ ਅਤੇ ਦੂਜੀ ਤਿਮਾਹੀ ਵਿੱਚ ਜੀਡੀਪੀ 8.2% ਦੀ ਦਰ ਨਾਲ ਵਧੀ ਹੈ, ਜਦਕਿ ਅਕਤੂਬਰ ਵਿੱਚ ਪ੍ਰਚੂਨ ਮਹਿੰਗਾਈ 0.25% ਦੇ ਰਿਕਾਰਡ ਹੇਠਲੇ ਪੱਧਰ ‘ਤੇ ਆ ਗਈ ਸੀ, ਜਿਸਨੇ ਵਿਆਜ ਦਰ ਘਟਾਉਣ ਦੀ ਗੁੰਜਾਇਸ਼ ਬਣਾਈ।

ਹਾਊਸਿੰਗ ਡਿਮਾਂਡ ਨੂੰ ਮਿਲੇਗਾ ਹੁਲਾਰਾ

ਵਿਆਜ ਦਰਾਂ ਘੱਟ ਹੋਣ ਨਾਲ ਰੀਅਲ ਅਸਟੇਟ ਸੈਕਟਰ ਨੂੰ ਵੀ ਵੱਡਾ ਹੁਲਾਰਾ ਮਿਲਣ ਦੀ ਉਮੀਦ ਹੈ। ਸਸਤਾ ਕਰਜ਼ਾ ਹੋਣ ਨਾਲ ਹਾਊਸਿੰਗ ਡਿਮਾਂਡ ਵਧੇਗੀ ਅਤੇ ਜ਼ਿਆਦਾ ਲੋਕ ਘਰ ਖਰੀਦਣ ਲਈ ਉਤਸ਼ਾਹਿਤ ਹੋਣਗੇ।