ਭਾਰਤ ਤੇ ਬਰਤਾਨੀਆ ਦੇ ਵਪਾਰਕ ਸਾਂਝ ਨੂੰ ਹੁਲਾਰਾ: ਇਕ ਅਰਬ ਪੌਂਡ ਦੇ ਨਵੇਂ ਸੌਦਿਆਂ ਦਾ ਐਲਾਨ

ਨਵੀਂ ਦਿੱਲੀ- 13 ਅਕਤੂਬਰ ਦੁਵੱਲੇ ਮੁਕਤ ਵਪਾਰ ਸਮਝੌਤੇ (ਐੱਫ ਟੀ ਏ) ਤੋਂ ਮਿਲਣ ਵਾਲੇ ਲਾਭਾਂ ਨੂੰ ਵਧਾਉਣ ਲਈ ਭਾਰਤ ਪੁੱਜੇ ਪਹਿਲੇ ਵੱਡੇ ਬਰਤਾਨਵੀ ਵਫ਼ਦ ਦੇ ਦੌਰੇ ਦੌਰਾਨ, ਬਰਤਾਨੀਆ ਸਰਕਾਰ ਨੇ ਅੱਜ ਇਕ ਅਰਬ ਪੌਂਡ ਦੇ ਨਵੇਂ ਸਮਝੌਤਿਆਂ ਦੀ ਸ਼ੁਰੂਆਤ ’ਤੇ ਜ਼ੋਰ ਦਿੱਤਾ।

ਬਰਤਾਨੀਆ ਦੇ ਵਪਾਰ ਸਕੱਤਰ ਜੋਨਾਥਨ ਰੈਨੋਲਡਜ਼, ਸਕੌਟਲੈਂਡ ਦੇ ਸਕੱਤਰ ਡਗਲਸ ਐਲੇਗਜ਼ੈਂਡਰ ਅਤੇ ਵਾਤਾਵਰਨ, ਭੋਜਨ ਤੇ ਦਿਹਾਤੀ ਮਾਮਲਿਆਂ ਦੀ ਸਕੱਤਰ ਐਂਜੇਲਾ ਈਗਲ ਦੇ ਨਾਲ ਉੱਤਰੀ ਇੰਗਲੈਂਡ ਦੇ ਸੱਤ ਮੇਅਰਾਂ ਦੀ ਅਗਵਾਈ ਹੇਠ ਵੱਖ-ਵੱਖ ਉਦਯੋਗਾਂ ਦੀਆਂ 100 ਤੋਂ ਵੱਧ ਕੰਪਨੀਆਂ ਭਾਰਤ ਆਈਆਂ ਹਨ। ਇਹ ‘ਗਰੇਟ ਨੌਰਥ’ ਮਿਸ਼ਨ 15 ਜੁਲਾਈ ਨੂੰ ਭਾਰਤ-ਬਰਤਾਨੀਆ ਵਿਆਪਕ ਆਰਥਿਕ ਅਤੇ ਵਪਾਰਕ ਸਮਝੌਤੇ (ਸੀ ਈ ਟੀ ਏ) ਦੇ ਲਾਗੂ ਹੋਣ ਤੋਂ ਲਗਪਗ ਤਿੰਨ ਮਹੀਨੇ ਬਾਅਦ ਹੋ ਰਿਹਾ ਹੈ।

ਰੈਨੋਲਡਜ਼ ਨੇ ਦੌਰੇ ਤੋਂ ਪਹਿਲਾਂ ਜਾਰੀ ਇੱਕ ਬਿਆਨ ਵਿੱਚ ਕਿਹਾ, ‘‘ਭਾਰਤ ਨਾਲ ਸਾਡੇ ਵਪਾਰਕ ਸਮਝੌਤੇ ਨੇ ਰਸਤੇ ਖੋਲ੍ਹ ਦਿੱਤੇ ਹਨ ਅਤੇ ਹੁਣ ਸਾਡੇ ਉੱਤਰੀ ਮੇਅਰਾਂ ਦੀ ਅਗਵਾਈ ਹੇਠ ਖੇਤਰੀ ਕਾਰੋਬਾਰ ਰੁਜ਼ਗਾਰ, ਨਿਵੇਸ਼ ਤੇ ਵਿਕਾਸ ਨੂੰ ਹੁਲਾਰਾ ਦੇਣ ਲਈ ਭਾਈਵਾਲੀ ਬਣਾਉਣ ਦੇ ਰਾਹ ’ਤੇ ਅੱਗੇ ਵਧ ਰਹੇ ਹਨ।’’ ਉਨ੍ਹਾਂ ਕਿਹਾ, ‘‘ਉੱਨਤ ਉਤਪਾਦਨ ਤੋਂ ਲੈ ਕੇ ਸਿੱਖਿਆ ਤੱਕ, ਅਸੀਂ ਦੋਵਾਂ ਦੇਸ਼ਾਂ ਦੇ ਹਰ ਕੋਨੇ ਵਿੱਚ ਕਾਰੋਬਾਰਾਂ ਅਤੇ ਖਪਤਕਾਰਾਂ ਲਈ ਮੌਕੇ ਲਿਆਉਣ ਵਾਸਤੇ ਦੁਨੀਆ ਦੇ ਸਭ ਤੋਂ ਤੇਜ਼ੀ ਨਾਲ ਵਧ ਰਹੇ ਅਰਥਚਾਰਿਆਂ ਵਿੱਚੋਂ ਇੱਕ ਨਾਲ ਸਬੰਧਾਂ ਨੂੰ ਹੋਰ ਮਜ਼ਬੂਤ ਕਰਨਾ ਚਾਹੁੰਦੇ ਹਾਂ।’’