ਭਾਜਪਾ ਹੁਣ ਜੈੱਨ ਜ਼ੀ ’ਤੇ ਪਾਵੇਗੀ ਡੋਰੇ…

ਚੰਡੀਗੜ੍ਹ, 24 ਅਗਸਤ – ਭਾਜਪਾ ਵੱਲੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਜਨਮ ਦਿਨ ਮੌਕੇ ਇੱਕ ਮਹੀਨੇ ਲਈ ‘ਸੇਵਾ ਸੰਕਲਪ ਅਭਿਆਨ’ ਸ਼ੁਰੂ ਕੀਤਾ ਜਾਵੇਗਾ ਜੋ ਨਰਿੰਦਰ ਮੋਦੀ ਦੇ ਸਿਆਸਤ ’ਚ ਜਨਤਕ ਅਹੁਦੇ ਦੇ 25 ਸਾਲ ਮੁਕੰਮਲ ਹੋਣ ਨੂੰ ਸਮਰਪਿਤ ਹੋਵੇਗਾ। ਦਿੱਲੀ ਵਿੱਚ ਅੱਜ ਭਾਜਪਾ ਦੀ ਦੂਜੇ ਗੇੜ ਦੀ ਮੀਟਿੰਗ ਚੱਲ ਰਹੀ ਹੈ। ਇਸ ਵਿੱਚ ਪੰਜਾਬ ਭਾਜਪਾ ਦੇ ਪ੍ਰਧਾਨ ਕੇਵਲ ਸਿੰਘ ਢਿੱਲੋਂ ਵੀ ਸ਼ਾਮਲ ਹਨ। ਪੰਜਾਬ ਸਣੇ ਜਿਨ੍ਹਾਂ ਸੂਬਿਆਂ ’ਚ ਵਿਧਾਨ ਸਭਾ ਚੋਣਾਂ ਨਜ਼ਦੀਕ ਹਨ, ਉਨ੍ਹਾਂ ਸੂਬਿਆਂ ’ਤੇ ਇਨ੍ਹਾਂ ਪ੍ਰੋਗਰਾਮਾਂ ਦੌਰਾਨ ਧਿਆਨ ਕੇਂਦਰਿਤ ਰਹੇਗਾ। ਦੱਸਣਯੋਗ ਹੈ ਕਿ ਜੰਤਰ ਮੰਤਰ ’ਤੇ ਜੈੱਨ ਜ਼ੀ ਦੇ ਵਿਰੋਧ ਪ੍ਰਦਰਸ਼ਨ ਮਗਰੋਂ ਭਾਜਪਾ ਦੇ ਤੰਤਰ ਨੂੰ ਝਟਕਾ ਲੱਗਿਆ ਹੈ। ਇਸ ਦੀ ਭਰਪਾਈ ਵਜੋਂ ਹੁਣ ਜੈੱਨ ਜ਼ੀ ਤੱਕ ਭਾਜਪਾ ਦਾ ਸੁਨੇਹਾ ਪਹੁੰਚਾਉਣ ਲਈ ਵਿਸ਼ੇਸ਼ ਮੁਹਿੰਮ ਚੱਲੇਗੀ। ਭਾਜਪਾ ਵੱਲੋਂ ‘ਯੂਥ ਕਨੈੱਕਟ’ ਤਹਿਤ ਨੌਜਵਾਨਾਂ ਨੂੰ ਸਮਾਜ ਸੇਵਾ ਨਾਲ ਜੋੜਨ ਲਈ ਪ੍ਰੇਰਿਤ ਕੀਤਾ ਜਾਵੇਗਾ।

ਇਸ ਵਿੱਚ ਉਹ ਆਪਣੇ ਸੇਵਾ ਕਾਰਜਾਂ ਦੀਆਂ ਵੀਡੀਓਜ਼/ ਰੀਲਾਂ ਬਣਾ ਕੇ ਸੋਸ਼ਲ ਮੀਡੀਆ ’ਤੇ ਸਾਂਝੀਆਂ ਕਰ ਸਕਣਗੇ। ਪੰਜਾਬ ਦੇ ਜੈੱਨ ਜ਼ੀ ’ਤੇ ਵਿਸ਼ੇਸ਼ ਤੌਰ ’ਤੇ ਭਾਜਪਾ ਦਾ ਫੋਕਸ ਰਹੇਗਾ। ਜਦੋਂ ਸਾਲ 2022 ਦੀਆਂ ਚੋਣਾਂ ’ਚ ‘ਆਪ’ ਦੀ ਹੂੰਝਾ ਫੇਰ ਜਿੱਤ ਹੋਈ ਸੀ ਤਾਂ ਉਸ ਵੇਲੇ ਵੀ ਜੈੱਨ ਜ਼ੀ ਦੀ ਵੱਡੀ ਭੂਮਿਕਾ ਰਹੀ ਸੀ। ਪੰਜਾਬ ਦਾ ਜੈੱਨ ਜ਼ੀ ਵੱਖਰੀ ਤਾਸੀਰ ਦਾ ਹੈ ਜੋ ਜ਼ਿਆਦਾ ਦਮਖਮ ਰੱਖਦਾ ਹੈ। ਸੋਸ਼ਲ ਮੀਡੀਆ ਮੰਚਾਂ ’ਤੇ ਭਾਜਪਾ ਵਿਸ਼ੇਸ਼ ਮੁਹਿੰਮ ਚਲਾ ਰਹੀ ਹੈ। ਸਮੁੱਚੀ ਭਾਜਪਾ ਦੇ ਸੀਨੀਅਰ ਆਗੂ ਹੁਣ ਸੋਸ਼ਲ ਮੀਡੀਆ ਖਾਤਿਆਂ ’ਤੇ ਨਜ਼ਰ ਆਉਣਗੇ। ਭਾਜਪਾ ਦੀ ਕੌਮੀ ਪੱਧਰ ਦੀ ਕੱਲ੍ਹ ਦਿੱਲੀ ’ਚ ਹੋਈ ਮੀਟਿੰਗ ’ਚ ਰਣਨੀਤੀ ਤਿਆਰ ਕੀਤੀ ਗਈ ਹੈ। ਇਸ ਤਹਿਤ ‘ਸੇਵਾ ਸੰਕਲਪ ਅਭਿਆਨ’ 17 ਸਤੰਬਰ ਤੋਂ ਸ਼ੁਰੂ ਹੋ ਕੇ 17 ਅਕਤੂਬਰ ਤੱਕ ਚੱਲੇਗਾ।