ਬਲੱਡ ਕੈਂਸਰ ਦੀ ਪਛਾਣ ‘ਚ ਮਦਦਗਾਰ ਹੈ ਰਾਤ ਨੂੰ ਦਿਸਣ ਵਾਲਾ ਇਹ ਇਕ ਲੱਛਣ
ਨਵੀਂ ਦਿੱਲੀ, 3 ਸਤੰਬਰ – ਕੈਂਸਰ ਇਕ ਗੰਭੀਰ ਬਿਮਾਰੀ ਹੈ ਜੋ ਦੁਨੀਆ ਭਰ ਵਿਚ ਮਹਾਮਾਰੀ ਵਾਂਗ ਫੈਲ ਰਹੀ ਹੈ। ਹਰ ਸਾਲ ਕਈ ਲੋਕ ਇਸ ਖਤਰਨਾਕ ਬਿਮਾਰੀ ਦੀ ਲਪੇਟ ‘ਚ ਆਉਂਦੇ ਹਨ ਅਤੇ ਕਈ ਆਪਣੀ ਜਾਨ ਵੀ ਗਵਾ ਬੈਠਦੇ ਹਨ। ਇਸ ਦੀਆਂ ਕਈ ਕਿਸਮਾਂ ਹਨ, ਜਿਨ੍ਹਾਂ ਵਿਚੋਂ ਇਕ ਬਲੱਡ ਕੈਂਸਰ ਹੈ। ਇਹ ਕੈਂਸਰ ਦੀ ਇਕ ਗੰਭੀਰ ਕਿਸਮ ਹੈ ਤੇ ਇਸ ਲਈ ਇਸ ਬਾਰੇ ਜਾਗਰੂਕਤਾ ਫੈਲਾਉਣ ਦੇ ਟੀਚੇ ਨਾਲ ਹਰ ਸਾਲ ਸਤੰਬਰ ਮਹੀਨਾ ਬਲੱਡ ਕੈਂਸਰ ਅਵੇਅਰਨੈੱਸ ਮੰਥ ਵਜੋਂ ਮਨਾਇਆ ਜਾਂਦਾ ਹੈ। ਇਸ ਮੰਥ ਨੂੰ ਮਨਾਉਣ ਦਾ ਮਕਸਦ ਲਿਊਕੀਮੀਆ, ਲਿੰਫੋਮਾ, ਮਾਇਲੋਮਾ ਤੇ ਇਸ ਨਾਲ ਜੁੜੇ ਵਿਕਾਰਾਂ ਬਾਰੇ ਲੋਕਾਂ ਨੂੰ ਜਾਗਰੂਕ ਕਰਨਾ ਅਤੇ ਇਸ ਦਾ ਜਲਦੀ ਪਤਾ ਲਗਾਉਣ ਲਈ ਲੋਕਾਂ ਨੂੰ ਉਤਸ਼ਾਹਤ ਕਰਨਾ ਹੈ। ਇਸ ਸੰਦਰਭ ‘ਚ ਅਸੀਂ ਇਸ ਲੇਖ ‘ਚ ਬਲੱਡ ਕੈਂਸਰ ਦੇ ਕੁਝ ਸ਼ੁਰੂਆਤੀ ਲੱਛਣਾਂ ਬਾਰੇ ਜਾਣਕਾਰੀ ਦੇਵਾਂਗੇ, ਜਿਨ੍ਹਾਂ ਦੀ ਮਦਦ ਨਾਲ ਤੁਸੀਂ ਇਸ ਬਿਮਾਰੀ ਦਾ ਪਤਾ ਲਗਾ ਸਕਦੇ ਹੋ।
ਅਚਾਨਕ ਰਾਤ ਨੂੰ ਪਸੀਨਾ ਆਉਣ ਤੇ ਬੁਖਾਰ ਚੜ੍ਹਨਾ
ਜੇਕਰ ਤੁਹਾਨੂੰ ਰਾਤ ਨੂੰ ਬਿਨਾਂ ਕਿਸੇ ਕਾਰਨ ਪਸੀਨਾ ਆ ਰਿਹਾ ਹੈ ਜਾਂ ਵਾਰ-ਵਾਰ ਬੁਖਾਰ ਆ ਰਿਹਾ ਹੈ ਤਾਂ ਇਸ ਨੂੰ ਅਣਡਿੱਠਾ ਨਾ ਕਰੋ। ਇਹ ਹੌਜਕਿਨ ਤੇ ਨਾਨ-ਹੌਜਕਿਨ ਲਿੰਫੋਮਾ ਦੋਹਾਂ ਦਾ ਚਿਤਾਵਨੀ ਸੰਕੇਤ ਹੈ। ਕਈ ਵਾਰ ਲਿਊਕੀਮੀਆ ‘ਚ ਵੀ ਅਜਿਹੇ ਲੱਛਣ ਦਿਖਾਈ ਦੇ ਸਕਦੇ ਹਨ।
ਬਿਨਾਂ ਕਾਰਨ ਵਜ਼ਨ ਘਟਣਾ ਤੇ ਭੁੱਖ ਨਾ ਲੱਗਣਾ
ਜੇਕਰ ਕੁਝ ਹਫ਼ਤਿਆਂ ਜਾਂ ਮਹੀਨਿਆਂ ‘ਚ ਅਚਾਨਕ ਤੁਹਾਡਾ ਵਜ਼ਨ ਘਟ ਗਿਆ ਹੈ ਤਾਂ ਇਹ ਸਧਾਰਨ ਨਹੀਂ ਹੈ। ਬਿਨਾਂ ਡਾਇਟਿੰਗ, ਤਣਾਅ ਜਾਂ ਵਰਕਆਉਟ ਦੇ ਜੇਕਰ ਤੁਹਾਡਾ ਵਜ਼ਨ ਘਟ ਰਿਹਾ ਹੈ ਜਾਂ ਤੁਹਾਨੂੰ ਭੁੱਖ ਘੱਟ ਮਹਿਸੂਸ ਹੋ ਰਹੀ ਹੈ ਤਾਂ ਇਹ ਲਿੰਫੋਮਾ ਦੇ ਲੱਛਣਾਂ ਦਾ ਹਿੱਸਾ ਹੈ।
ਬੇਵਜ੍ਹਾ ਥਕਾਵਟ ਜਾਂ ਸਾਹ ਫੁਲਣਾ
ਬਿਨਾਂ ਕਿਸੇ ਕਾਰਨ ਥਕਾਵਟ, ਸਕਿੰਨ ਦਾ ਪੀਲਾ ਹੋਣਾ ਜਾਂ ਕਿਸੇ ਮਿਹਨਤ ਦੇ ਬਿਨਾਂ ਸਾਹ ਫੁਲਣਾ ਜਾਂ ਸਾਹ ਲੈਣ ‘ਚ ਮੁਸ਼ਕਲ ਵੀ ਬਲੱਡ ਕੈਂਸਰ ਦਾ ਚਿਤਾਵਨੀ ਸੰਕੇਤ ਹੋ ਸਕਦੇ ਹਨ। ਲਿਊਕੀਮੀਆ ਹੋਣ ‘ਤੇ ਅਕਸਰ ਨਾਰਮਲ ਬਲੱਡ ਫਾਰਮੇਸ਼ਨ ‘ਚ ਮੁਸ਼ਕਲ ਆਉਂਦੀ ਹੈ, ਜਿਸ ਨਾਲ ਅਨੀਮੀਆ ਹੋ ਜਾਂਦਾ ਹੈ ਅਤੇ ਸਰੀਰ ਵਿਚ ਅਜਿਹੇ ਲੱਛਣ ਦਿਖਾਈ ਦੇਣ ਲੱਗਦੇ ਹਨ।
ਹੱਡੀ ‘ਚ ਦਰਦ ਜਾਂ ਲਗਾਤਾਰ ਪਿੱਠ ਦਰਦ
ਮਲਟੀਪਲ ਮਾਇਲੋਮਾ ਅਕਸਰ ਹੱਡੀ ‘ਚ ਦਰਦ, ਫ੍ਰੈਕਚਰ ਜਾਂ ਪਿੱਠ ਦਰਦ ਦਾ ਕਾਰਨ ਬਣਦਾ ਹੈ, ਜੋ ਠੀਕ ਨਹੀਂ ਹੁੰਦਾ। ਜੇਕਰ ਤੁਹਾਨੂੰ ਵੀ ਲੰਬੇ ਸਮੇਂ ਤੋਂ ਲਗਾਤਾਰ ਸਰੀਰ ‘ਚ ਅਜਿਹਾ ਦਰਦ ਮਹਿਸੂਸ ਹੋ ਰਿਹਾ ਹੈ ਤਾਂ ਇਸ ਨੂੰ ਆਮ ਸਮਝ ਕੇ ਅਣਡਿੱਠਾ ਕਰਨ ਦੀ ਗਲਤੀ ਨਾ ਕਰੋ।
ਬਿਨਾਂ ਰੈਸ਼ੇਜ਼ ਦੇ ਖੁਜਲੀ
ਆਮ ਤੌਰ ‘ਤੇ ਖੁਜਲੀ ਹੋਣਾ ਸਧਾਰਨ ਹੈ ਪਰ ਕਈ ਵਾਰ ਇਹ ਖੁਜਲੀ ਗੰਭੀਰ ਹੋ ਜਾਂਦੀ ਹੈ। ਜੇਕਰ ਤੁਹਾਨੂੰ ਵੀ ਐਸੀ ਕੋਈ ਬਿਨਾਂ ਰੈਸ਼ੇਜ਼ ਵਾਲੀ ਖੁਜਲੀ ਹੋ ਰਹੀ ਹੈ ਤਾਂ ਇਹ ਹੌਜਕਿਨ ਅਤੇ ਨਾਨ-ਹੌਜਕਿਨ ਲਿੰਫੋਮਾ ਦਾ ਇਕ ਜਾਣਿਆ-ਪਛਾਣਿਆ ਲੱਛਣ ਹੈ ਅਤੇ ਜੇ ਇਹ ਖੁਜਲੀ ਲਗਾਤਾਰ ਬਣੀ ਰਹੇ ਤਾਂ ਇਸ ਦੀ ਜਾਂਚ ਕਰਵਾਉਣਾ ਜ਼ਰੂਰੀ ਹੈ।
ਆਸਾਨੀ ਨਾਲ ਸੱਟ, ਨੱਕ ਤੋਂ ਖੂਨ ਜਾਂ ਮਸੂੜਿਆਂ ਤੋਂ ਖੂਨ ਆਉਣਾ
ਲਿਊਕੀਮੀਆ ਕਾਰਨ ਪਲੇਟਲੈਟਸ ਘਟਣ ਨਾਲ ਆਸਾਨੀ ਨਾਲ ਸੱਟ ਲੱਗ ਸਕਦੀ ਹੈ ਜਾਂ ਬਲੀਡਿੰਗ ਹੋ ਸਕਦੀ ਹੈ ਤੇ ਪੇਟੀਕੀਆ (ਛੋਟੇ ਲਾਲ ਡੌਟ) ਹੋ ਸਕਦੇ ਹਨ। ਇਸ ਲਈ ਅਚਾਨਕ ਹੋਣ ਵਾਲੀ ਬਲੀਡਿੰਗ ਨੂੰ ਅਣਡਿੱਠਾ ਨਾ ਕਰੋ, ਖਾਸ ਕਰਕੇ ਜੇ ਇਹ ਨਵੀਂ ਹੋਵੇ।
Share this content:
Post Comment