ਬਜਟ ਮਗਰੋਂ ਧੜੱਮ ਕਰਕੇ ਡਿੱਗੇ ਸੋਨਾ ਤੇ ਚਾਂਦੀ

ਨਵੀਂ ਦਿੱਲੀ, 2 ਫਰਵਰੀ – ਪਿਛਲੇ ਹਫ਼ਤੇ, ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ਵਿੱਚ ਵੱਡਾ ਉਛਾਲ ਆਉਣ ਤੋਂ ਬਾਅਦ ਦੋਵੇਂ ਕੀਮਤੀ ਧਾਤਾਂ ਇੱਕ ਹੀ ਝਟਕੇ ਵਿੱਚ ਤੇਜ਼ੀ ਨਾਲ ਡਿੱਗ ਗਈਆਂ। ਚਾਂਦੀ ਇੱਕ ਹੀ ਦਿਨ ਵਿੱਚ 30 ਫੀਸਦੀ ਤੋਂ ਵੱਧ ਡਿੱਗ ਗਈ, ਜਦੋਂ ਕਿ ਸੋਨਾ ਵੀ ਲਗਭਗ 17 ਫੀਸਦੀ ਡਿੱਗ ਗਿਆ। ਐਤਵਾਰ ਨੂੰ ਬਜਟ ਵਾਲੇ ਦਿਨ ਐਮ ਸੀ ਐਕਸ ’ਤੇ ਸੋਨੇ ਅਤੇ ਚਾਂਦੀ ਦੇ ਕਾਰੋਬਾਰ ਵਿੱਚ ਮੰਦਾ ਰਿਹਾ। ਬਾਜ਼ਾਰ ਖੁੱਲ੍ਹਦੇ ਹੀ ਸੋਨਾ ਅਤੇ ਚਾਂਦੀ ਫਿਰ ਡਿੱਗ ਗਈ। 1 ਕਿਲੋ ਚਾਂਦੀ ਦੀ ਕੀਮਤ ਅਚਾਨਕ 27,000 ਰੁਪਏ ਤੱਕ ਡਿੱਗ ਗਈ, ਜਦੋਂ ਕਿ ਸੋਨਾ ਵੀ ਚਾਂਦੀ ਵਾਂਗ 13,000 ਤੋਂ ਵੱਧ ਡਿੱਗ ਗਿਆ।

ਧਿਆਨ ਦੇਣ ਯੋਗ ਹੈ ਕਿ ਵੀਰਵਾਰ ਨੂੰ ਚਾਂਦੀ ਨੇ ਪਹਿਲੀ ਵਾਰ 4 ਲੱਖ ਰੁਪਏ ਦਾ ਅੰਕੜਾ ਪਾਰ ਕਰਕੇ ਇਤਿਹਾਸ ਰਚਿਆ ਸੀ ਅਤੇ 5 ਮਾਰਚ ਦੀ ਮਿਆਦ ਪੁੱਗਣ ਦੀ ਤਾਰੀਖ ਵਾਲੀ ਚਾਂਦੀ ਦੀ ਕੀਮਤ 4,20,048 ਰੁਪਏ ਦੇ ਨਵੇਂ ਲਾਈਫ ਟਾਈਮ ਦੇ ਉੱਚ ਪੱਧਰ ‘ਤੇ ਪਹੁੰਚ ਗਈ ਸੀ। ਹਾਲਾਂ ਕਿ, ਅਗਲੇ ਹੀ ਦਿਨ, ਇਹ 1.28 ਲੱਖ ਰੁਪਏ ਡਿੱਗ ਕੇ 2,91,922 ਰੁਪਏ ਪ੍ਰਤੀ ਕਿਲੋਗ੍ਰਾਮ ‘ਤੇ ਆ ਗਈ। ਐਤਵਾਰ ਨੂੰ ਬਜਟ ਵਾਲੇ ਦਿਨ ਇਹ 9 ਫੀਸਦੀ ਡਿੱਗ ਕੇ 2,65,652 ਰੁਪਏ ਪ੍ਰਤੀ ਕਿਲੋਗ੍ਰਾਮ ਰਹਿ ਗਈ। ਸੋਨਾ ਵੀ ਵੀਰਵਾਰ ਨੂੰ ?1,93,096 ਦੇ ਇਤਿਹਾਸਕ ਉੱਚੇ ਪੱਧਰ ਨੂੰ ਛੂਹਣ ਤੋਂ ਬਾਅਦ ਐਤਵਾਰ ਨੂੰ ਜਿਵੇਂ ਹੀ ਐਮ ਸੀ ਐਕਸ ’ਤੇ ਵਪਾਰ ਸ਼ੁਰੂ ਹੋਇਆ, ਇਹ 8.80 ਫੀਸਦੀ ਤੋਂ ਵੱਧ ਡਿੱਗ ਗਿਆ।