ਪੀਐੱਮ ਮੋਦੀ ਦੇ 25 ਸਾਲ ਪੂਰੇ ਹੋਣ ‘ਤੇ ਹਰਿਆਣਾ ‘ਚ ਸ਼ੁਰੂ ਹੋਵੇਗਾ ‘ਸੇਵਾ ਸੰਕਲਪ ਅਭਿਆਨ’

ਚੰਡੀਗੜ੍ਹ, 7 ਸਤੰਬਰ – ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਜਨਤਕ ਜੀਵਨ ਵਿੱਚ ਸੇਵਾ, ਸੁਸ਼ਾਸਨ ਅਤੇ ਸਮਰਪਣ ਦੇ 25 ਸਾਲ ਪੂਰੇ ਹੋਣ ਜਾ ਰਹੇ ਹਨ। ਇਸੇ ਮੌਕੇ ‘ਤੇ ਭਾਰਤੀ ਜਨਤਾ ਪਾਰਟੀ ਨੇ ਪੂਰੇ ਦੇਸ਼ ਦੇ ਨਾਲ-ਨਾਲ ਹਰਿਆਣਾ ਵਿੱਚ ਵੀ ਇੱਕ ਮਹੀਨੇ ਦਾ ਵੱਡਾ ਜਨਸੰਪਰਕ ਅਤੇ ਜਨ-ਸੇਵਾ ਅਭਿਆਨ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। 17 ਸਤੰਬਰ ਤੋਂ 17 ਅਕਤੂਬਰ ਤੱਕ ਚੱਲਣ ਵਾਲੇ ਇਸ ‘ਸੇਵਾ ਸੰਕਲਪ ਅਭਿਆਨ’ ਰਾਹੀਂ ਭਾਜਪਾ ਪਿੰਡ-ਪਿੰਡ ਅਤੇ ਘਰ-ਘਰ ਤੱਕ ਪਹੁੰਚਣ ਦੀ ਤਿਆਰੀ ਵਿੱਚ ਹੈ।

ਅਭਿਆਨ ਦੀ ਸ਼ੁਰੂਆਤ

ਚੰਡੀਗੜ੍ਹ ਵਿੱਚ ਭਾਜਪਾ ਹਰਿਆਣਾ ਪ੍ਰਦੇਸ਼ ਪ੍ਰਧਾਨ ਡਾ. ਅਰਚਨਾ ਗੁਪਤਾ ਨੇ ਸੇਵਾ ਸੰਕਲਪ ਅਭਿਆਨ ਦਾ ਐਲਾਨ ਕੀਤਾ। ਉਨ੍ਹਾਂ ਦੱਸਿਆ ਕਿ ਇਹ ਅਭਿਆਨ 17 ਸਤੰਬਰ ਤੋਂ ਸ਼ੁਰੂ ਹੋ ਕੇ 17 ਅਕਤੂਬਰ ਤੱਕ ਪੂਰੇ ਸੂਬੇ ਵਿੱਚ ਚੱਲੇਗਾ। ਅਭਿਆਨ ਦਾ ਮਕਸਦ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਜਨਤਕ ਜੀਵਨ ਦੇ 25 ਸਾਲਾਂ ਦੀ ਸੇਵਾ ਯਾਤਰਾ ਨੂੰ ਜਨਤਾ ਤੱਕ ਪਹੁੰਚਾਉਣਾ ਅਤੇ ਵਿਕਸਿਤ ਭਾਰਤ-2047 ਦੇ ਸੰਕਲਪ ਨਾਲ ਲੋਕਾਂ ਨੂੰ ਜੋੜਨਾ ਹੈ।

ਪੂਰੇ ਮਹੀਨੇ ਕੀ-ਕੀ ਹੋਵੇਗਾ?

ਇਸ ਅਭਿਆਨ ਨੂੰ ਸਿਰਫ਼ ਰਾਜਨੀਤਿਕ ਪ੍ਰੋਗਰਾਮ ਨਹੀਂ ਸਗੋਂ ਜਨ-ਭਾਗੀਦਾਰੀ ਅਭਿਆਨ ਵਜੋਂ ਤਿਆਰ ਕੀਤਾ ਗਿਆ ਹੈ। ਪੂਰੇ ਇੱਕ ਮਹੀਨੇ ਵਿੱਚ ਵੱਖ-ਵੱਖ ਨਾਵਾਂ ਹੇਠ ਕਈ ਪ੍ਰੋਗਰਾਮ ਆਯੋਜਿਤ ਕੀਤੇ ਜਾਣਗੇ। 17 ਸਤੰਬਰ ਨੂੰ ‘ਆਸ਼ੀਰਵਾਦ ਕਾ ਦੀਆ’ ਅਤੇ ਖੂਨਦਾਨ ਅਭਿਆਨ ਨਾਲ ਸ਼ੁਰੂਆਤ ਹੋਵੇਗੀ। ਭਾਜਪਾ ਵਰਕਰ ਸਕੀਮਾਂ ਦੇ ਲਾਭਪਾਤਰੀਆਂ ਦੇ ਘਰ ਜਾ ਕੇ ਧੰਨਵਾਦ ਦਾ ਦੀਵਾ ਬਾਲਣਗੇ ਅਤੇ ਪੂਰੇ ਸੂਬੇ ਵਿੱਚ ਖੂਨਦਾਨ ਕੈਂਪ ਲਗਾਏ ਜਾਣਗੇ। ਇਸ ਤੋਂ ਬਾਅਦ ਸਕੂਲਾਂ ਵਿੱਚ ‘ਸੇਵਾ ਚਿੱਤਰ’ ਅਭਿਆਨ ਤਹਿਤ ਚਿੱਤਰਕਾਰੀ ਅਤੇ ਭਾਸ਼ਣ ਮੁਕਾਬਲੇ ਕਰਵਾਏ ਜਾਣਗੇ, ਜਦਕਿ ‘ਸੇਵਾ ਸਮਰਣ’ ਰਾਹੀਂ ਨੁੱਕੜ ਨਾਟਕਾਂ ਨਾਲ ਸਰਕਾਰੀ ਸਕੀਮਾਂ ਅਤੇ 25 ਸਾਲਾਂ ਦੀ ਸੇਵਾ ਯਾਤਰਾ ਦੀ ਜਾਣਕਾਰੀ ਪਿੰਡ-ਪਿੰਡ ਪਹੁੰਚਾਈ ਜਾਵੇਗੀ।

ਪਿੰਡ, ਮਹਿਲਾਵਾਂ ਅਤੇ ਨੌਜਵਾਨ ਹੋਣਗੇ ਕੇਂਦਰ ਵਿੱਚ

ਅਭਿਆਨ ਦੌਰਾਨ ‘ਆੰਗਨ ਕਾ ਮਿਲਨ’ ਪ੍ਰੋਗਰਾਮ ਵਿੱਚ ਆਂਗਣਵਾੜੀ ਵਰਕਰਾਂ ਦਾ ਸਨਮਾਨ ਕੀਤਾ ਜਾਵੇਗਾ ਅਤੇ ਮਹਿਲਾਵਾਂ ਨਾਲ ਪੋਸ਼ਣ ਤੇ ਸਿਹਤ ਸਕੀਮਾਂ ‘ਤੇ ਗੱਲਬਾਤ ਹੋਵੇਗੀ। ‘ਕਹਾਨੀ ਬਦਲਾਵ ਕੀ’ ਅਭਿਆਨ ਵਿੱਚ ਸਰਕਾਰੀ ਸਕੀਮਾਂ ਤੋਂ ਲਾਭ ਲੈਣ ਵਾਲੇ ਲੋਕਾਂ ਦੀ ਵੀਡੀਓ ਸਟੋਰੀ ਬਣਾਈ ਜਾਵੇਗੀ। ਭਾਜਪਾ ਹਰ ਸ਼ਕਤੀ ਕੇਂਦਰ ਤੋਂ ਘੱਟੋ-ਘੱਟ 10 ਰੀਲਾਂ ਤਿਆਰ ਕਰਨ ਦਾ ਟੀਚਾ ਲੈ ਕੇ ਚੱਲ ਰਹੀ ਹੈ। ਨੌਜਵਾਨਾਂ ਲਈ ਹੈਕਾਥੌਨ ਅਤੇ ਇਨੋਵੇਸ਼ਨ ਚੈਲੇਂਜ ਆਯੋਜਿਤ ਕੀਤੇ ਜਾਣਗੇ, ਜਿੱਥੇ ਸਟਾਰਟਅੱਪ ਅਤੇ ਵਿਦਿਆਰਥੀ ਆਪਣੇ ਨਵੇਂ ਵਿਚਾਰ ਪੇਸ਼ ਕਰਨਗੇ।

ਸਰਕਾਰ ਆਪਕੇ ਦੁਆਰ ਅਤੇ ਸੇਵਾ ਯਾਤਰਾ

ਭਾਜਪਾ ‘ਸੇਵਾ ਸੇਤੂ ਅਭਿਆਨ’ ਤਹਿਤ ਬਲਾਕ ਅਤੇ ਵਿਧਾਨ ਸਭਾ ਪੱਧਰ ‘ਤੇ ਕੈਂਪ ਲਗਾਏਗੀ, ਜਿੱਥੇ ਲੋਕਾਂ ਨੂੰ ਕੇਂਦਰ ਅਤੇ ਰਾਜ ਸਰਕਾਰ ਦੀਆਂ ਸਕੀਮਾਂ ਦੀ ਜਾਣਕਾਰੀ, ਅਰਜ਼ੀ ਅਤੇ ਲਾਭ ਇੱਕੋ ਥਾਂ ‘ਤੇ ਦੇਣ ਦੀ ਕੋਸ਼ਿਸ਼ ਕੀਤੀ ਜਾਵੇਗੀ। ਇਸ ਦੇ ਨਾਲ ਹੀ ‘ਸੇਵਾ ਜੋਤੀ ਯਾਤਰਾ’ ਪਿੰਡਾਂ ਅਤੇ ਜ਼ਿਲ੍ਹਿਆਂ ਵਿੱਚ ਕੱਢੀ ਜਾਵੇਗੀ ਅਤੇ ‘ਵਡਨਗਰ ਤੋਂ ਵਾਰਾਣਸੀ’ ਪ੍ਰੋਗਰਾਮ ਰਾਹੀਂ ਪ੍ਰਧਾਨ ਮੰਤਰੀ ਮੋਦੀ ਦੀ ਜਨਤਕ ਜੀਵਨ ਦੀ ਯਾਤਰਾ ਅਤੇ ਵਿਕਾਸ ਕਾਰਜਾਂ ਨੂੰ ਜਨਤਾ ਤੱਕ ਪਹੁੰਚਾਇਆ ਜਾਵੇਗਾ।

ਅਭਿਆਨ ਦੀ ਸਮਾਪਤੀ

17 ਅਕਤੂਬਰ ਨੂੰ ਅਭਿਆਨ ਦੀ ਸਮਾਪਤੀ ‘ਜਨਸੇਵਕ ਮਹਾਕੁੰਭ’ ਨਾਲ ਹੋਵੇਗੀ। ਭਾਜਪਾ ਮੁਤਾਬਕ ਪੰਚਾਇਤ ਤੋਂ ਸੰਸਦ ਤੱਕ ਲਗਭਗ 1 ਲੱਖ 25 ਹਜ਼ਾਰ ਜਨਪ੍ਰਤੀਨਿਧੀਆਂ ਦੀ ਭਾਗੀਦਾਰੀ ਹੋਵੇਗੀ। ਪ੍ਰੋਗਰਾਮ ਵਿੱਚ ਸੇਵਾ ਯਾਤਰਾ, ਵੰਦੇ ਮਾਤਰਮ ਅਤੇ ਵਿਕਸਿਤ ਭਾਰਤ-2047 ਦੇ ਸਮੂਹਿਕ ਸੰਕਲਪ ਦਾ ਸੁਨੇਹਾ ਦਿੱਤਾ ਜਾਵੇਗਾ। ਭਾਜਪਾ ਇਸ ਅਭਿਆਨ ਨੂੰ ਸੰਗਠਨ ਅਤੇ ਸਰਕਾਰ ਵਿਚਾਲੇ ਸਿੱਧਾ ਸੰਵਾਦ ਬਣਾਉਣ ਦੀ ਕੋਸ਼ਿਸ਼ ਦੱਸ ਰਹੀ ਹੈ। ਅਗਲੇ ਇੱਕ ਮਹੀਨੇ ਤੱਕ ਪਿੰਡ, ਸ਼ਹਿਰ, ਸਕੂਲ, ਆਂਗਣਵਾੜੀ, ਖੂਨ ਦਾਨ ਕੈਂਪ ਅਤੇ ਜਨ-ਸੇਵਾ ਪ੍ਰੋਗਰਾਮਾਂ ਰਾਹੀਂ ਪਾਰਟੀ ਜਨਤਾ ਦੇ ਵਿਚਕਾਰ ਆਪਣੀ ਪਹੁੰਚ ਵਧਾਉਣ ਦੀ ਰਣਨੀਤੀ ‘ਤੇ ਕੰਮ ਕਰੇਗੀ।