ਨਿਊਜ਼ੀਲੈਂਡ-ਭਾਰਤ ‘ਮੁਕਤ ਵਪਾਰ ਸਮਝੌਤਾ’ ਸਮਝੌਤਾ ਅੰਤਿਮ ਪੜਾਅ ’ਤੇ

….ਵੇ ਮੰਨ ਜਾ ਹਾਣੀਆ, ਮੇਰਾ ਗੇੜੇ ਤੇ ਗੇੜਾ ਲੱਗਿਆ

ਮੰਤਰੀ ਮੈਕਲੇ ਦਿੱਲੀ ਰਵਾਨਾ-ਹੁਣ ਦਰਜਨਾਂ ਤੋਂ ਵੱਧ ਮੀਟਿੰਗਾਂ
-ਭਾਰਤੀ ਮੰਤਰੀ ਨਾਲ 15ਵੀਂ ਵਾਰ ਹੋਵੋਗੀ ਆਹਮੋ-ਸਾਹਮਣੇ ਮੁਲਾਕਾਤ
-ਹਰਜਿੰਦਰ ਸਿੰਘ ਬਸਿਆਲਾ-
ਔਕਲੈਂਡ 11 ਦਸੰਬਰ 2025- ਨਿਊਜ਼ੀਲੈਂਡ ਦੇ ਵਪਾਰ ਅਤੇ ਨਿਵੇਸ਼ ਮੰਤਰੀ, ਟੌਡ ਮੈਕਲੇ, ਭਾਰਤ ਨਾਲ ਲੰਬੇ ਸਮੇਂ ਤੋਂ ਗੱਲਬਾਤ ਦਾ ਵਿਸ਼ਾ ਰਹੇ ‘ਮੁਕਤ ਵਪਾਰ ਸਮਝੌਤੇ’ (ਐੱਫ.ਟੀ.ਏ.)  ਲਈ ਇੰਡੀਆ ਰਵਾਨਾ ਹੋ ਗਏ ਹਨ। ਇਹ ਮੰਤਰੀ-ਪੱਧਰ ਦੀ ਗੱਲਬਾਤ ਹੋਵੇਗੀ ਅਤੇ ਭਾਰਤ ਦੇ ਵਣਜ ਅਤੇ ਉਦਯੋਗ ਮੰਤਰੀ, ਪੀਯੂਸ਼ ਗੋਇਲ, ਪਹਿਲਾਂ ਹੀ ਸੰਕੇਤ ਦੇ ਚੁੱਕੇ ਹਨ ਕਿ ਗੱਲਬਾਤ ਆਖਰੀ ਪੜਾਅ ਵਿੱਚ ਪਹੁੰਚ ਗਈ ਹੈ ਅਤੇ ਜਲਦੀ ਹੀ ਸਮਾਪਤ ਹੋਣ ਦੀ ਉਮੀਦ ਹੈ।
ਗੱਲਬਾਤ ਵਿੱਚ ਤੇਜ਼ੀ: ਮੈਕਲੇ ਦਾ ਗੇੜੇ ’ਤੇ ਗੇੜਾ
ਮੰਤਰੀ ਮੈਕਲੇ ਦਾ ਇਹ ਦੌਰਾ ਨਿਊਜ਼ੀਲੈਂਡ ਵਿੱਚ ਚੋਣਾਂ ਤੋਂ ਬਾਅਦ ਭਾਰਤ ਦਾ ਸੱਤਵਾਂ ਦੌਰਾ ਹੈ, ਜੋ ਇਸ ਸਮਝੌਤੇ ਨੂੰ ਅੰਤਿਮ ਰੂਪ ਦੇਣ ਲਈ ਵੈਲਿੰਗਟਨ ਪਾਰਲੀਮੈਂਟ ਦੀ ਗੰਭੀਰਤਾ ਨੂੰ ਦਰਸਾਉਂਦਾ ਹੈ। ਉਹ ਭਾਰਤੀ ਮੰਤਰੀ ਪੀਯੂਸ਼ ਗੋਇਲ ਨਾਲ ਪੰਦਰ੍ਹਵੀਂ (15ਵੀਂ) ਵਾਰ ਆਹਮੋ-ਸਾਹਮਣੇ ਮੁਲਾਕਾਤ ਕਰਨ ਜਾ ਰਹੇ ਹਨ।
ਉਨ੍ਹਾਂ ਨੇ ਕਿਹਾ, ‘ਜਦੋਂ ਤੋਂ ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ ਅਤੇ ਮੈਂ 21 ਮਾਰਚ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਗੱਲਬਾਤ ਸ਼ੁਰੂ ਕੀਤੀ ਹੈ, ਉਦੋਂ ਤੋਂ ਗਤੀ ਬਣ ਰਹੀ ਹੈ। ਇਸ ਸਾਲ ਮਾਰਚ ਵਿੱਚ ਪ੍ਰਧਾਨ ਮੰਤਰੀ ਲਕਸਨ ਨੇ ਵੀ ਨਿਊਜ਼ੀਲੈਂਡ ਦੇ ਸਭ ਤੋਂ ਵੱਡੇ ਵਪਾਰਕ ਵਫ਼ਦ ਦੀ ਅਗਵਾਈ ਕਰਦਿਆਂ ਭਾਰਤ ਦਾ ਦੌਰਾ ਕੀਤਾ ਸੀ। ਇਸ ਤਾਜ਼ਾ ਦੌਰੇ ਵਿੱਚ ਇੱਕ ਜੰਗਲਾਤ ਵਪਾਰ ਮਿਸ਼ਨ ਦੀ ਅਗਵਾਈ ਕਰਨਾ ਵੀ ਸ਼ਾਮਲ ਹੈ।
ਮੁੱਖ ਟੀਚਾ: ਨਿਰਯਾਤਕਾਂ, ਕਿਸਾਨਾਂ ਅਤੇ ਕਾਮਿਆਂ ਨੂੰ ਲਾਭ
ਮੈਕਲੇ ਦਾ ਕਹਿਣਾ ਹੈ ਕਿ ਇਸ ਸਮਝੌਤੇ ਦਾ ਮੁੱਖ ਮਕਸਦ ਨਿਊਜ਼ੀਲੈਂਡ ਦੇ ਨਿਰਯਾਤਕਾਂ, ਉਤਪਾਦਕਾਂ, ਅਤੇ ਕਾਰੋਬਾਰੀਆਂ ਨੂੰ ਲਾਭ ਪਹੁੰਚਾਉਣਾ ਹੈ। ਇਹ ਸਮਝੌਤਾ ਖਾਸ ਤੌਰ ’ਤੇ ਇਨ੍ਹਾਂ ਵਰਗਾਂ ਦੇ ਹਿੱਤ ਵਿੱਚ ਹੈ:
ਨਿਊਜ਼ੀਲੈਂਡ ਦੇ ਕਿਸਾਨ: ਖਾਸ ਕਰਕੇ ਭੇਡਾਂ ਦੇ ਕਿਸਾਨ ਜਿਨ੍ਹਾਂ ਨੂੰ ਟੈਰਿਫ ਕਾਰਨ ਨੁਕਸਾਨ ਹੋ ਰਿਹਾ ਹੈ।
ਨਿਊਜ਼ੀਲੈਂਡ ਦੇ ਉਤਪਾਦਕ: ਉਹ ਸਾਰੇ ਕਾਰੋਬਾਰ ਜੋ ਭਾਰਤ ਦੇ 1.4 ਬਿਲੀਅਨ (140 ਕਰੋੜ) ਲੋਕਾਂ ਦੇ ਤੇਜ਼ੀ ਨਾਲ ਵਧ ਰਹੇ ਬਾਜ਼ਾਰ ਤੱਕ ਬਿਹਤਰ ਪਹੁੰਚ ਚਾਹੁੰਦੇ ਹਨ।
ਨਿਊਜ਼ੀਲੈਂਡ ਦੇ ਕਾਮੇ: ਮੈਕਲੇ ਦਾ ਅਨੁਮਾਨ ਹੈ ਕਿ ਇੱਕ ਉੱਚ-ਗੁਣਵੱਤਾ ਵਾਲਾ ਸਮਝੌਤਾ ਹਜ਼ਾਰਾਂ ਨੌਕਰੀਆਂ ਪੈਦਾ ਕਰੇਗਾ ਅਤੇ ਨਵੇਂ ਨਿਰਯਾਤ ਮਾਲੀਏ ਵਿੱਚ ਅਰਬਾਂ ਦਾ ਵਾਧਾ ਕਰੇਗਾ, ਜਿਸ ਨਾਲ ਆਰਥਿਕਤਾ ਦਾ ਪੁਨਰ ਨਿਰਮਾਣ ਹੋਵੇਗਾ ਅਤੇ ਮਜ਼ਦੂਰੀ ਵਧੇਗੀ।