ਦੁਨੀਆ ’ਚ ਚੋਟੀ ਦੇ 20 ‘ਸਭ ਤੋਂ ਵਧੀਆ ਰਹਿਣ ਯੋਗ’ ਸ਼ਹਿਰਾਂ ਦੀ ਸੂਚੀ ’ਚ ਨਿਊਜ਼ੀਲੈਂਡ ਦੇ ਦੋ ਸ਼ਹਿਰਾਂ ਨੇ ਬਣਾਈ ਥਾਂ

ਔਕਲੈਂਡ 26 ਜੂਨ 2025 (ਹਰਜਿੰਦਰ ਸਿੰਘ ਬਸਿਆਲਾ) – ਦੁਨੀਆ ਦੇ ਚੋਟੀ ਦੇ 20 ‘ਸਭ ਤੋਂ ਵਧੀਆ ਰਹਿਣਯੋਗ’ ਥਾਵਾਂ ਦੀ ਤਾਜ਼ਾ ਸੂਚੀ ਦੇ ਅਨੁਸਾਰ ਨਿਊਜ਼ੀਲੈਂਡ ਦੇ ਦੋ ਸ਼ਹਿਰ ਆਪਣੀ ਥਾਂ ਬਨਾਉਣ ਵਿਚ ਫਿਰ ਬਰਕਰਾਰ ਰਹੇ ਹਨ।  ‘ਸਿਟੀ ਆਫ ਸੇਲ’ਜ਼’ (ਔਕਲੈਂਡ) ਨੇ ਇੱਕ ਵਾਰ ਫਿਰ ਓਸਾਕਾ, ਜਾਪਾਨ ਨਾਲ ਆਪਣਾ ਸੱਤਵਾਂ ਸਥਾਨ ਸਾਂਝਾ ਕੀਤਾ ਹੈ, ਜੋ ਪਿਛਲੇ ਸਾਲ ਦੇ ਨੌਵੇਂ ਸਥਾਨ ਤੋਂ ਦੋ ਸਥਾਨ ਉੱਪਰ ਸੱਤ ’ਤੇ ਹੈ। ਦੇਸ਼ ਦੀ ਰਾਜਧਾਨੀ ਵੈਲਿੰਗਟਨ 20ਵੇਂ ਸਥਾਨ ’ਤੇ ਬਰਕਰਾਰ ਰਹੀ। ਦੋਵਾਂ ਸ਼ਹਿਰਾਂ ਨੂੰ ਹਾਲ ਹੀ ਵਿੱਚ ਇਕਨਾਮਿਸਟ ਇੰਟੈਲੀਜੈਂਸ ਯੂਨਿਟ ਦੁਆਰਾ ਸਾਲਾਨਾ ਸੂਚਕਾਂਕ ਵਿੱਚ ਉੱਚ ਦਰਜਾ ਦਿੱਤਾ ਗਿਆ ਸੀ। 2021 ਦੇ ਸੂਚਕਾਂਕ ਵਿੱਚ ਔਕਲੈਂਡ ਨੂੰ ਦੁਨੀਆ ਦਾ ਸਭ ਤੋਂ ਵੱਧ ਰਹਿਣ ਯੋਗ ਸ਼ਹਿਰ ਅਤੇ ਵੈਲਿੰਗਟਨ ਨੂੰ ਚੌਥੇ ਸਥਾਨ ’ਤੇ ਰੱਖਿਆ ਗਿਆ ਸੀ।

ਡੈਨਮਾਰਕ ਦੀ ਰਾਜਧਾਨੀ ਕੋਪਨਹੇਗਨ ਨੇ ਤਿੰਨ ਸਾਲਾਂ ਦੇ ਰਾਜ ਨੂੰ ਖਤਮ ਕਰਦੇ ਹੋਏ, ਨੰਬਰ ਇੱਕ ਸਥਾਨ ਲਈ ਆਸਟਰੀਆ ਦੀ ਰਾਜਧਾਨੀ ਵਿਏਨਾ (ਨੰਬਰ 2) ਨੂੰ ਪਛਾੜ ਦਿੱਤਾ। ਸਵਿਟਜ਼ਰਲੈਂਡ ਦੇ ਜਿਊਰਿਖ ਨੂੰ ਵੀ ਬਰਾਬਰ ਦੂਜਾ ਸਥਾਨ ਮਿਲਿਆ। ਆਸਟਰੇਲੀਆ ਵਿੱਚ, ਮੈਲਬੋਰਨ ਚੌਥੇ ਸਥਾਨ ’ਤੇ ਅਤੇ ਸਿਡਨੀ ਛੇਵੇਂ ਸਥਾਨ ’ਤੇ ਆਇਆ। ਪਰਥ ਅਤੇ ਬ੍ਰਿਸਬੇਨ ਕ੍ਰਮਵਾਰ 15ਵੇਂ ਅਤੇ 16ਵੇਂ ਸਥਾਨ ’ਤੇ ਰਹੇ। ਇਕਨਾਮਿਸਟ ਇੰਟੈਲੀਜੈਂਸ ਯੂਨਿਟ ਦੁਆਰਾ ਬਣਾਏ ਗਏ ਇਸ ਸੂਚਕਾਂਕ ਨੇ ਦੁਨੀਆ ਭਰ ਦੇ 173 ਸ਼ਹਿਰਾਂ ਨੂੰ ਸਥਿਰਤਾ, ਸਿਹਤ ਸੰਭਾਲ, ਸੱਭਿਆਚਾਰ ਅਤੇ ਵਾਤਾਵਰਣ, ਸਿੱਖਿਆ ਅਤੇ ਬੁਨਿਆਦੀ ਢਾਂਚੇ ਵਰਗੇ ਕਾਰਕਾਂ ’ਤੇ ਦਰਜਾ ਦਿੱਤਾ। ਸੀਰੀਆ ਦਾ ਦਮਿਸ਼ਕ ਦੁਨੀਆ ਦਾ ਸਭ ਤੋਂ ਘੱਟ ਰਹਿਣ ਯੋਗ ਸ਼ਹਿਰ ਬਣਿਆ ਰਿਹਾ।

ਰਿਪੋਰਟ ਦੇ ਲੇਖਕਾਂ ਨੇ ਲਿਖਿਆ ਕਿ ਪਿਛਲੇ ਸਾਲ ਸ਼ਾਸਨ ਬਦਲਣ ਦੇ ਬਾਵਜੂਦ, ਸੀਰੀਆ ਦੀ ਰਾਜਧਾਨੀ ਅਜੇ ਵੀ ਸਾਲਾਂ ਦੇ ਘਰੇਲੂ ਯੁੱਧ ਨਾਲ ਪ੍ਰਭਾਵਿਤ ਹੈ ਅਤੇ ਰਹਿਣ-ਸਹਿਣ ਵਿੱਚ ਕੋਈ ਸੁਧਾਰ ਨਹੀਂ ਹੋਇਆ ਹੈ। ਸਭ ਤੋਂ ਵੱਧ ਰਹਿਣ ਯੋਗ ਚੋਟੀ ਦੇ 20 ਸ਼ਹਿਰ ਦੀ ਸੂਚੀ ਇਸ ਪ੍ਰਕਾਰ ਹੈ:-1. ਕੋਪਨਹੇਗਨ, ਡੈਨਮਾਰਕ 2. ਵਿਏਨਾ, ਆਸਟ?ਰੀਆ (ਸਮਾਨ) 2. ਜ਼ਿਊਰਿਖ, ਸਵਿਟਜ਼ਰਲੈਂਡ (ਸਮਾਨ) 4. ਮੈਲਬੋਰਨ, ਆਸਟਰੇਲੀਆ 5. ਜਨੇਵਾ, ਸਵਿਟਜ਼ਰਲੈਂਡ 6. ਸਿਡਨੀ, ਆਸਟਰੇਲੀਆ 7. ਓਸਾਕਾ, ਜਾਪਾਨ (ਸਮਾਨ), 7. ਔਕਲੈਂਡ, ਨਿਊਜ਼ੀਲੈਂਡ (ਸਮਾਨ), 9. ਐਡੀਲੇਡ, ਆਸਟਰੇਲੀਆ, 10. ਵੈਨਕੂਵਰ, ਕੈਨੇਡਾ 11, ਲਕਸਮਬਰਗ, 12. ਟੋਰਾਂਟੋ, ਕੈਨੇਡਾ, 13. ਹੇਲਸਿੰਕੀ, ਫਿਨਲੈਂਡ, 14. ਟੋਕੀਓ, ਜਾਪਾਨ, 15. ਪਰਥ, ਆਸਟਰੇਲੀਆ, 16. ਬ੍ਰਿਸਬੇਨ, ਆਸਟਰੇਲੀਆ, 17. ਫਰੈਂਕਫਰਟ, ਜਰਮਨੀ, 18. ਕੈਲਗਰੀ, ਕੈਨੇਡਾ, 19. ਐਮਸਟਰਡਮ, ਨੀਦਰਲੈਂਡਜ਼, 20. ਵੈਲਿੰਗਟਨ, ਨਿਊਜ਼ੀਲੈਂਡ। ਭਾਰਤ ਦੀ ਗੱਲ ਕਰੀਏ ਤਾਂ ਇਸਦਾ ਕੋਈ ਵੀ ਸ਼ਹਿਰ ਚੋਟੀ ਦੇ 100 ਦੇਸ਼ਾਂ ਦੇ ਵਿਚ ਵੀ ਨਹੀਂ ਸਕਿਆ ਪਰ 173 ਸ਼ਹਿਰਾਂ ਦੀ ਸ਼੍ਰੇਣੀ ਦੇ ਵਿਚ ਦਿੱਲੀ ਅਤੇ ਮੁੰਬਈ ਨੂੰ 141ਵਾਂ ਸਥਾਨ ਹਾਸਿਲ ਹੋਇਆ ਹੈ।