ਤੂਫਾਨ ਆ ਰਿਹੈ : ਟਰੰਪ; ਡੋਬ ਦਿਆਂਗੇ : ਖਾਮਨੇਈ
ਵਾਸ਼ਿੰਗਟਨ, 1 ਮਈ – ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸੋਸ਼ਲ ਮੀਡੀਆ ‘ਤੇ ਇੱਕ ਫੋਟੋ ਸਾਂਝੀ ਕਰਕੇ ਲਿਖਿਆ ਹੈ, ‘ਇੱਕ ਤੂਫਾਨ ਆ ਰਿਹਾ ਹੈ ਅਤੇ ਜੋ ਆ ਰਿਹਾ ਹੈ ਉਸ ਨੂੰ ਕੋਈ ਨਹੀਂ ਰੋਕ ਸਕਦਾ।’ ਇਸ ਦੌਰਾਨ ਈਰਾਨ ਦੇ ਰਾਸ਼ਟਰਪਤੀ ਮਸੂਦ ਪੇਜ਼ੇਸ਼ਕਿਅਨ ਨੇ ਕਿਹਾ ਕਿ ਅਮਰੀਕੀ ਸਮੁੰਦਰੀ ਨਾਕਾਬੰਦੀ ਸਫਲ ਨਹੀਂ ਹੋਵੇਗੀ। ਈਰਾਨੀ ਬੰਦਰਗਾਹਾਂ ਦੀ ਨਾਕਾਬੰਦੀ ਕਰਨ ਦੀ ਕੋਈ ਵੀ ਕੋਸ਼ਿਸ਼ ਅੰਤ ਵਿੱਚ ਅਸਫਲ ਹੋ ਜਾਵੇਗੀ। ਉਧਰ, ਈਰਾਨ ਦੇ ਸੁਪਰੀਮ ਲੀਡਰ ਮੋਜਤਬਾ ਖਾਮਨੇਈ ਨੇ ਕਿਹਾ ਹੈ ਕਿ ਉਨ੍ਹਾ ਦਾ ਦੇਸ਼ ਆਪਣੀਆਂ ਪ੍ਰਮਾਣੂ ਅਤੇ ਮਿਜ਼ਾਈਲ ਸਮਰਥਾਵਾਂ ਤੋਂ ਪਿੱਛੇ ਨਹੀਂ ਹਟੇਗਾ।
ਉਨ੍ਹਾ ਦਾ ਲਿਖਤੀ ਬਿਆਨ ਈਰਾਨ ਦੇ ਸਰਕਾਰੀ ਟੀ ਵੀ ‘ਤੇ ਉੱਚੀ ਆਵਾਜ਼ ਵਿੱਚ ਪੜ੍ਹਿਆ ਗਿਆ। ਉਨ੍ਹਾ ਕਿਹਾ ਕਿ ਈਰਾਨ ਆਪਣੀ ਪ੍ਰਮਾਣੂ ਅਤੇ ਮਿਜ਼ਾਈਲ ਸ਼ਕਤੀ ਨੂੰ ਦੇਸ਼ ਦੀ ਸੰਪਤੀ ਮੰਨਦਾ ਹੈ ਅਤੇ ਹਰ ਕੀਮਤ ‘ਤੇ ਇਸ ਦੀ ਰੱਖਿਆ ਕਰੇਗਾ। ਉਨ੍ਹਾ ਕਿਹਾ ਕਿ ਹੁਣ ਹਾਰਮੁਜ਼ ਜਲਡਮਰੂ ਵਿੱਚ ਇੱਕ ਨਵਾਂ ਯੁੱਗ ਸ਼ੁਰੂ ਹੋ ਗਿਆ ਹੈ, ਜੋ ਇਸ ਖੇਤਰ ਵਿੱਚ ਸ਼ਾਂਤੀ, ਤਰੱਕੀ ਅਤੇ ਆਰਥਕ ਲਾਭ ਲਿਆਏਗਾ। ਉਨ੍ਹਾ ਕਿਹਾ ਕਿ ਅਮਰੀਕੀ ਫੌਜੀ ਅੱਡੇ ਏਨੇ ਕਮਜ਼ੋਰ ਹਨ ਕਿ ਉਹ ਆਪਣੀ ਰੱਖਿਆ ਵੀ ਸਹੀ ਢੰਗ ਨਾਲ ਨਹੀਂ ਕਰ ਸਕਦੇ ਤਾਂ ਉਹ ਖੇਤਰ ਦੇ ਦੂਜੇ ਦੇਸ਼ਾਂ ਨੂੰ ਸੁਰੱਖਿਆ ਪ੍ਰਦਾਨ ਕਰਨ ਦਾ ਦਾਅਵਾ ਕਿਵੇਂ ਕਰ ਸਕਦੇ ਹਨ?
ਉਨ੍ਹਾ ਕਿਹਾ, ‘ਅਸੀਂ ਅਤੇ ਸਾਡੇ ਗੁਆਂਢੀ ਫਾਰਸ ਦੀ ਖਾੜੀ ਅਤੇ ਓਮਾਨ ਦੀ ਖਾੜੀ ਦੇ ਪਾਣੀਆਂ ਦੇ ਪਾਰ ਇੱਕ ਸਾਂਝੀ ਕਿਸਮਤ ਸਾਂਝੀ ਕਰਦੇ ਹਾਂ। ਵਿਦੇਸ਼ੀ, ਜੋ ਹਜ਼ਾਰਾਂ ਕਿਲੋਮੀਟਰ ਦੂਰ ਤੋਂ ਲਾਲਚ ਅਤੇ ਦੁਸ਼ਟਤਾ ਨਾਲ ਕੰਮ ਕਰਨ ਲਈ ਆਉਂਦੇ ਹਨ, ਉਨ੍ਹਾਂ ਲਈ ਇਸ ਵਿੱਚ ਕੋਈ ਜਗ੍ਹਾ ਨਹੀਂ, ਸਿਵਾਏ ਇਸ ਦੇ ਪਾਣੀਆਂ ਦੇ ਤਲ ‘ਤੇ। ਡੋਨਾਲਡ ਟਰੰਪ ਨੇ ਸੋਸ਼ਲ ਮੀਡੀਆ ‘ਤੇ ਇੱਕ ਸੋਧਿਆ ਹੋਇਆ ਨਕਸ਼ਾ ਸਾਂਝਾ ਕੀਤਾ ਹੈ, ਜਿਸ ਵਿੱਚ ਹਾਰਮੁਜ਼ ਦਾ ਨਾਂਅ ਬਦਲ ਕੇ ‘ਸਟ੍ਰੇਟ ਆਫ ਟਰੰਪ’ ਰੱਖਿਆ ਗਿਆ ਹੈ।
Share this content:
Post Comment