ਜਾਅਲੀ ਦਸਤਾਵੇਜ਼ਾਂ ਨਾਲ AIIMS ‘ਚ ਦਾਖਲਾ ਲੈਣ ਆਈ ਫ਼ੜ ਹੋਈ ਬਿਹਾਰ ਦੀ ਵਿਦਿਆਰਥਣ

ਬਿਲਾਸਪੁਰ, (ਹਿਮਾਚਲ ਪ੍ਰਦੇਸ਼) – ਬਿਲਾਸਪੁਰ ਦੇ ਏਮਜ਼ (AIIMS) ਵਿੱਚ ਐਮ.ਬੀ.ਬੀ.ਐਸ. ਦਾਖਲੇ ਲਈ ਕਾਊਂਸਲਿੰਗ ਦੌਰਾਨ ਇੱਕ ਅਜੀਬ ਮਾਮਲਾ ਸਾਹਮਣੇ ਆਇਆ ਹੈ। ਬਿਹਾਰ ਦੀ ਇੱਕ ਲੜਕੀ ਨੂੰ ਜਾਅਲੀ ਦਸਤਾਵੇਜ਼ਾਂ ਨਾਲ ਪਹੁੰਚਣ ‘ਤੇ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੁਲਿਸ ਪੁੱਛਗਿੱਛ ਦੌਰਾਨ ਪਤਾ ਲੱਗਾ ਹੈ ਕਿ ਲੜਕੀ ਨੇ ਆਪਣੇ ਮੋਬਾਈਲ ‘ਤੇ ਇੱਕ ਐਪ ਦੀ ਮਦਦ ਨਾਲ ਇਹ ਜਾਅਲੀ ਦਸਤਾਵੇਜ਼ ਤਿਆਰ ਕੀਤੇ ਸਨ।

ਕੀ ਹੈ ਪੂਰਾ ਮਾਮਲਾ?

ਵੀਰਵਾਰ ਨੂੰ ਏਮਜ਼ ਬਿਲਾਸਪੁਰ ਵਿੱਚ ਐਮ.ਬੀ.ਬੀ.ਐਸ. ਬੈਚ-2025 ਦੀ ਪਹਿਲੀ ਕਾਊਂਸਲਿੰਗ ਚੱਲ ਰਹੀ ਸੀ। ਇਸ ਦੌਰਾਨ, ਬਿਹਾਰ ਦੀ ਇੱਕ ਲੜਕੀ ਨੇ ਕਾਊਂਸਲਿੰਗ ਲਈ ਇੱਕ ਨੀਟ (NEET) ਰੈਂਕ ਲੈਟਰ ਜਮ੍ਹਾਂ ਕਰਵਾਇਆ, ਜਿਸ ਵਿੱਚ ਉਸਦੇ 700 ਵਿੱਚੋਂ 590 ਅੰਕ ਦਰਸਾਏ ਗਏ ਸਨ। ਜਦੋਂ ਏਮਜ਼ ਕਾਊਂਸਲਿੰਗ ਕਮੇਟੀ ਨੇ ਦਸਤਾਵੇਜ਼ਾਂ ਦੀ ਤਸਦੀਕ ਕੀਤੀ, ਤਾਂ ਉਸਦਾ ਨਾਮ ਅਧਿਕਾਰਤ ਸੂਚੀ ਵਿੱਚ ਨਹੀਂ ਮਿਲਿਆ। ਜਮ੍ਹਾਂ ਕੀਤੇ ਗਏ ਪ੍ਰੋਵੀਜ਼ਨਲ ਅਲਾਟਮੈਂਟ ਲੈਟਰ ਅਤੇ ਸਕੋਰ ਕਾਰਡ ਵਿੱਚ ਵੀ ਕਈ ਅੰਤਰ ਸਨ, ਅਤੇ QR ਕੋਡ ਸਕੈਨ ਕਰਨ ‘ਤੇ ਕੋਈ ਜਾਣਕਾਰੀ ਨਹੀਂ ਮਿਲੀ। ਜਾਂਚ ਦੌਰਾਨ, ਲੜਕੀ ਦੀ ਈ-ਮੇਲ ਆਈਡੀ ਤੋਂ ਅਸਲ ਰੈਂਕ ਲੈਟਰ ਡਾਊਨਲੋਡ ਕੀਤਾ ਗਿਆ, ਜਿਸ ਤੋਂ ਪਤਾ ਲੱਗਾ ਕਿ ਅਸਲ ਵਿੱਚ ਉਸਦੇ ਸਿਰਫ 30 ਅੰਕ ਸਨ ਅਤੇ ਉਸਦਾ ਰੈਂਕ ਲਗਭਗ 20 ਲੱਖ ਸੀ।

ਜਾਅਲੀ ਦਸਤਾਵੇਜ਼ ਬਣਾਉਣ ਲਈ ਮੋਬਾਈਲ ਐਪ ਦੀ ਵਰਤੋਂ

ਪੁਲਿਸ ਦੀ ਪੁੱਛਗਿੱਛ ਦੌਰਾਨ ਲੜਕੀ ਨੇ ਮੰਨਿਆ ਕਿ ਉਸਨੇ ਆਪਣੇ ਮੋਬਾਈਲ ‘ਤੇ ਇੱਕ ਐਪ ਦੀ ਵਰਤੋਂ ਕਰਕੇ ਇਹ ਜਾਅਲੀ ਦਸਤਾਵੇਜ਼ ਬਣਾਏ ਸਨ। ਸਦਰ ਥਾਣੇ ਨੇ ਲੜਕੀ ਖ਼ਿਲਾਫ਼ ਧੋਖਾਧੜੀ ਦਾ ਮਾਮਲਾ ਦਰਜ ਕਰ ਲਿਆ ਹੈ। ਲੜਕੀ ਨੂੰ ਜ਼ਮਾਨਤ ‘ਤੇ ਰਿਹਾਅ ਕਰ ਦਿੱਤਾ ਗਿਆ ਹੈ, ਪਰ ਉਸਦੇ ਖਿਲਾਫ ਕਾਨੂੰਨੀ ਕਾਰਵਾਈ ਜਾਰੀ ਰਹੇਗੀ। ਜੇਕਰ ਅਦਾਲਤ ਵਿੱਚ ਦੋਸ਼ ਸਾਬਤ ਹੋ ਜਾਂਦਾ ਹੈ ਤਾਂ ਲੜਕੀ ਨੂੰ ਸੱਤ ਸਾਲ ਤੱਕ ਦੀ ਸਜ਼ਾ ਹੋ ਸਕਦੀ ਹੈ ਅਤੇ ਭਵਿੱਖ ਵਿੱਚ ਕਿਸੇ ਵੀ ਪ੍ਰੀਖਿਆ ਵਿੱਚ ਬੈਠਣ ਤੋਂ ਰੋਕਿਆ ਜਾ ਸਕਦਾ ਹੈ।