ਜਸਟਿਸ ਸੂਰਿਆਕਾਂਤ ਬਣੇ ਦੇਸ਼ ਦੇ 53ਵੇਂ CJI

ਨਵੀਂ ਦਿੱਲੀ, 24 ਨਵੰਬਰ – ਜਸਟਿਸ ਸੂਰਿਆਕਾਂਤ ਭਾਰਤ ਦੇ ਨਵੇਂ ਚੀਫ਼ ਜਸਟਿਸ ਬਣ ਗਏ ਹਨ। ਸੋਮਵਾਰ ਯਾਨੀਕਿ 24 ਨਵੰਬਰ ਨੂੰ ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ ਨੇ ਉਨ੍ਹਾਂ ਨੂੰ CJI ਪਦ ਦੀ ਸਹੁੰ ਚੁਕਵਾਈ। ਉਪਰਾਸ਼ਟਰਪਤੀ ਸੀ.ਪੀ. ਰਾਧਾਕ੍ਰਿਸ਼ਨ, ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਰੱਖਿਆ ਮੰਤਰੀ ਰਾਜਨਾਥ ਸਿੰਘ, ਗ੍ਰਹਿ ਮੰਤਰੀ ਅਮਿਤ ਸ਼ਾਹ, ਲੋਕ ਸਭਾ ਸਪੀਕਰ ਓਮ ਬਿਰਲਾ, ਭਾਜਪਾ ਕੌਮੀ ਪ੍ਰਧਾਨ ਜੇ.ਪੀ. ਨੱਡਾ, ਸਾਬਕਾ ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ ਅਤੇ ਸਾਬਕਾ ਉਪਰਾਸ਼ਟਰਪਤੀ ਜਗਦੀਪ ਧਨਖੜ ਦੀ ਮੌਜੂਦਗੀ ਵਿੱਚ ਉਨ੍ਹਾਂ ਨੇ CJI ਪਦ ਦੀ ਸਹੁੰ ਚੁੱਕੀ।

ਜਾਣੋ ਕਿੰਨੇ ਸਾਲ ਦਾ ਹੋਏਗਾ ਕਾਰਜਕਾਲ

ਜਸਟਿਸ ਭੂਸ਼ਣ ਰਾਮਕ੍ਰਿਸ਼ਨ ਗਵਈ ਦਾ CJI ਵਜੋਂ ਕਾਰਜਕਾਲ 23 ਨਵੰਬਰ, 2025 ਨੂੰ ਖਤਮ ਹੋ ਗਿਆ ਸੀ। ਉਹ ਸਾਡੇ ਛੇ ਮਹੀਨਿਆਂ ਲਈ ਇਸ ਪਦ ‘ਤੇ ਰਹੇ। ਜਸਟਿਸ ਸੂਰਿਆਕਾਂਤ ਦਾ CJI ਵਜੋਂ ਕਾਰਜਕਾਲ ਲਗਭਗ ਡੇਢ ਸਾਲ ਹੋਵੇਗਾ। ਉਹ 9 ਫਰਵਰੀ, 2027 ਨੂੰ ਰਿਟਾਇਰ ਹੋਣਗੇ। ਇਸ ਸਮੇਂ ਉਮਰ 63 ਸਾਲ ਹੈ। ਸੀਜੇਈ ਸੂਰਿਆਕਾਂਤ ਦਾ ਜਨਮ 10 ਫਰਵਰੀ, 1962 ਨੂੰ ਹਰਿਆਣਾ ਦੇ ਹਿਸਾਰ ਵਿੱਚ ਹੋਇਆ ਸੀ। ਉਹ ਇੱਕ ਸਧਾਰਣ ਪਰਿਵਾਰ ਵਿੱਚ ਜੰਮੇ-ਪਲੇ ਅਤੇ ਵੱਡੇ ਹੋਏ। ਸਾਬਕਾ ਸੀਜੇਈ ਬੀ. ਆਰ. ਗਵਈ ਨੇ ਆਪਣੇ ਫੇਅਰਵੈਲ ਦੌਰਾਨ ਜਸਟਿਸ ਸੂਰਿਆਕਾਂਤ ਨਾਲ ਆਪਣੀ ਦੋਸਤੀ ਬਾਰੇ ਦੱਸਿਆ ਸੀ ਅਤੇ ਕਿਹਾ ਸੀ ਕਿ ਦੋਹਾਂ ਹੀ ਕਾਫ਼ੀ ਸਧਾਰਣ ਪਰਿਵਾਰਾਂ ਤੋਂ ਆਉਂਦੇ ਹਨ।

ਜਸਟਿਸ ਗਵਈ ਨੇ ਦੱਸਿਆ ਕਿ ਸੀਜੇਈ ਸੂਰਿਆਕਾਂਤ ਨੇ ਹਿਸਾਰ ਦੇ ਸਰਕਾਰੀ ਸਕੂਲ ਵਿੱਚ ਪੜ੍ਹਾਈ ਕੀਤੀ ਅਤੇ ਉਹਨਾਂ ਨੇ ਮਿਹਰਾਵਤੀ, ਮਹਾਰਾਸ਼ਟਰ ਦੇ ਇੱਕ ਮਿਊਨਿਸਿਪਲ ਸਕੂਲ ਤੋਂ ਵੀ ਪੜ੍ਹਾਈ ਕੀਤੀ। ਸੀਜੇਈ ਸੂਰਿਆਕਾਂਤ ਨੇ 1981 ਵਿੱਚ ਹਿਸਾਰ ਦੇ ਗਵਰਨਮੈਂਟ ਪੋਸਟ ਗ੍ਰੈਜੂਏਟ ਕਾਲਜ ਤੋਂ ਗ੍ਰੈਜੂਏਸ਼ਨ ਕੀਤੀ ਅਤੇ ਫਿਰ 1984 ਵਿੱਚ ਕਾਨੂੰਨ ਵਿੱਚ ਬੈਚਲਰ ਡਿਗਰੀ ਲਈ। ਉਨ੍ਹਾਂ ਨੇ 1984 ਵਿੱਚ ਰੋਹਤਕ ਦੇ ਮਹਾਰਸ਼ੀ ਦਯਾਨੰਦ ਯੂਨੀਵਰਸਿਟੀ ਤੋਂ ਕਾਨੂੰਨ ਦੀ ਪੜ੍ਹਾਈ ਕੀਤੀ। ਇਸ ਤੋਂ ਬਾਅਦ, 1984 ਵਿੱਚ ਹੀ ਹਿਸਾਰ ਵਿੱਚ ਕਾਨੂੰਨੀ ਅਭਿਆਸ ਸ਼ੁਰੂ ਕੀਤਾ ਅਤੇ 1985 ਵਿੱਚ ਉਹ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵਿੱਚ ਪ੍ਰੈਕਟਿਸ ਕਰਨ ਲੱਗੇ। ਸਾਲ 2000 ਵਿੱਚ ਉਹ ਹਰਿਆਣਾ ਦੇ ਸਭ ਤੋਂ ਨੌਜਵਾਨ ਐਡਵੋਕੇਟ ਜਨਰਲ ਬਣੇ। ਸਾਲ 2011 ਵਿੱਚ ਸੀਜੇਈ ਸੂਰਿਆਕਾਂਤ ਨੇ ਕੁਰੁਕਸ਼ੇਤਰ ਯੂਨੀਵਰਸਿਟੀ ਤੋਂ ਕਾਨੂੰਨ ਵਿੱਚ ਮਾਸਟਰਜ਼ ਕੀਤੇ, ਜਿਸਨੂੰ ਉਨ੍ਹਾਂ ਡਿਸਟਿੰਕਸ਼ਨ ਦੇ ਨਾਲ ‘ਫਰਸਟ ਕਲਾਸ ਫਰਸਟ’ ਰੈਂਕ ਨਾਲ ਪਾਸ ਕੀਤਾ। ਉਹ 2018 ਵਿੱਚ ਹਿਮਾਚਲ ਪ੍ਰਦੇਸ਼ ਹਾਈ ਕੋਰਟ ਦੇ ਚੀਫ਼ ਜਸਟਿਸ ਨਿਯੁਕਤ ਹੋਏ ਅਤੇ ਇਸ ਤੋਂ ਬਾਅਦ 2019 ਵਿੱਚ ਉਹ ਸੁਪਰੀਮ ਕੋਰਟ ਦੇ ਜੱਜ ਬਣਾਏ ਗਏ।