ਖਾਸ ਮੁਲਾਕਾਤ: ਪੰਜਾਬ ਦੀ ਤਰੱਕੀ ਲਈ ਪ੍ਰਵਾਸੀਆਂ ਦਾ ਸਾਥ ਲਾਜ਼ਮੀ– ਨਿਊਜ਼ੀਲੈਂਡ ਪਹੁੰਚੇ ਅਕਾਲੀ ਆਗੂ ਮਿੱਡੂਖੇੜਾ ਨੇ ਖੋਲ੍ਹੇ ਪੱਤੇ

-ਐਨ. ਆਈ. ਆਈਜ਼ ਲਈ ਹੋਣਗੇ ਵਿਆਹ ਵਰਗੇ ਸੰਮੇਲਨ
ਔਕਲੈਂਡ, 25 ਅਪ੍ਰੈਲ 2026 (ਹਰਜਿੰਦਰ ਸਿੰਘ ਬਸਿਆਲਾ) – ਪੰਜਾਬ ਦੀ ਸਿਆਸਤ ਵਿੱਚ ਅਹਿਮ ਸਥਾਨ ਰੱਖਣ ਵਾਲੇ ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਮੀਤ ਪ੍ਰਧਾਨ ਤਜਿੰਦਰ ਸਿੰਘ ਮਿੱਠੂ ਖੇੜਾ ਅੱਜਕੱਲ੍ਹ ਨਿਊਜ਼ੀਲੈਂਡ ਦੇ ਦੌਰੇ ’ਤੇ ਹਨ। ਇਸ ਦੌਰਾਨ ਇੱਕ ਵਿਸ਼ੇਸ਼ ਇੰਟਰਵਿਊ ਵਿੱਚ ਉਨ੍ਹਾਂ ਨੇ ਪ੍ਰਵਾਸੀ ਪੰਜਾਬੀਆਂ (NR9s) ਨਾਲ ਜੁੜੇ ਅਹਿਮ ਮਸਲਿਆਂ, ਪੰਜਾਬ ਦੇ ਮੌਜੂਦਾ ਹਾਲਾਤ ਅਤੇ ਪਾਰਟੀ ਦੇ ਭਵਿੱਖੀ ਏਜੰਡੇ ਬਾਰੇ ਵਿਸਥਾਰਪੂਰਵਕ ਚਰਚਾ ਕੀਤੀ। ਉਨ੍ਹਾਂ ਦਾ ਇਹ ਦੌਰਾ ਵਿਦੇਸ਼ਾਂ ਵਿੱਚ ਬੈਠੇ ਪੰਜਾਬੀਆਂ ਨੂੰ ਸੂਬੇ ਦੀ ਸਿਆਸਤ ਅਤੇ ਵਿਕਾਸ ਵਿੱਚ ਮੁੜ ਸਰਗਰਮ ਕਰਨ ਦੀ ਇੱਕ ਕੋਸ਼ਿਸ਼ ਵਜੋਂ ਦੇਖਿਆ ਜਾ ਰਿਹਾ ਹੈ।

ਪ੍ਰਵਾਸੀਆਂ ਦੀਆਂ ਜਾਇਦਾਦਾਂ ਦੀ ਸੁਰੱਖਿਆ: ਤਕਸੀਮ ਦਾ ਮਸਲਾ ਹੋਵੇਗਾ ਹੱਲ

ਮਿੱਠੂ ਖੇੜਾ ਨੇ ਐਨ.ਆਰ.ਆਈਜ਼ ਦੀ ਸਭ ਤੋਂ ਵੱਡੀ ਚਿੰਤਾ—ਜਾਇਦਾਦਾਂ ਅਤੇ ਸਾਂਝੀਆਂ ਜ਼ਮੀਨਾਂ ਦੀ ਵੰਡ—ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਅਕਾਲੀ ਦਲ ਦੀ ਸਰਕਾਰ ਆਉਣ ’ਤੇ ਇੱਕ

ਵਿਸ਼ੇਸ਼ ਯੋਜਨਾ ਲਾਗੂ ਕੀਤੀ ਜਾਵੇਗੀ:

ਬੂਹੇ ’ਤੇ ਸਰਕਾਰ: ਪਟਵਾਰੀ ਅਤੇ ਤਹਿਸੀਲਦਾਰ ਖੁਦ ਪਿੰਡਾਂ ਵਿੱਚ ਜਾ ਕੇ ਜ਼ਮੀਨਾਂ ਦੀ ਨਿਸ਼ਾਨਦੇਹੀ ਕਰਨਗੇ।

ਸਪੈਸੀਫਿਕ ਮਾਲਕੀ: ਹਰ ਪ੍ਰਵਾਸੀ ਨੂੰ ਉਸ ਦੇ ਹਿੱਸੇ ਦਾ ਸਪੈਸੀਫਿਕ ਕਿੱਲਾ ਨੰਬਰ (ਜਿਵੇਂ ਮੁਰੱਬਾ ਨੰਬਰ 35, ਕਿੱਲਾ ਨੰਬਰ 14) ਦਿੱਤਾ ਜਾਵੇਗਾ।

ਬੁਨਿਆਦੀ ਹੱਕ: ਇਹ ਯਕੀਨੀ ਬਣਾਇਆ ਜਾਵੇਗਾ ਕਿ ਹਰ ਟੁਕੜੇ ਨੂੰ ਰਸਤਾ ਅਤੇ ਪਾਣੀ ਦਾ ਖਾਲਾ ਲੱਗਦਾ ਹੋਵੇ ਤਾਂ ਜੋ ਕੋਈ ਵੀ ਪ੍ਰਵਾਸੀਆਂ ਦੀ ਮਾਨਸਿਕ ਜਾਂ ਆਰਥਿਕ ਲੁੱਟ ਨਾ ਕਰ ਸਕੇ।

ਐਨ. ਆਈ. ਆਈਜ਼ ਲਈ ਹੋਣਗੇ ਵਿਆਹ ਵਰਗੇ ਸੰਮੇਲਨ

ਉਨ੍ਹਾਂ ਯਾਦ ਕਰਵਾਇਆ ਕਿ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਸੁਖਬੀਰ ਸਿੰਘ ਬਾਦਲ ਦੇ ਸਮੇਂ ਐਨ. ਆਰ. ਆਈਜ਼ ਸੰਮੇਲਨ ਕਰਵਾਏ ਜਾਂਦੇ ਸਨ, ਜਿੱਥੇ ਸਾਰੀ ਸਰਕਾਰ ਇੱਕੋ ਛੱਤ ਹੇਠ ਮੌਜੂਦ ਹੁੰਦੀ ਸੀ। ਮਿੱਠੂ ਖੇੜਾ ਨੇ ਵਾਅਦਾ ਕੀਤਾ ਕਿ ਆਉਣ ਵਾਲੇ ਸਮੇਂ ਵਿੱਚ ਅਜਿਹੇ ਪਲੇਟਫਾਰਮ ਮੁੜ ਮੁਹੱਈਆ ਕਰਵਾਏ ਜਾਣਗੇ ਜਿੱਥੇ ਪ੍ਰਵਾਸੀਆਂ ਦੀਆਂ ਸ਼ਿਕਾਇਤਾਂ ਦਾ ਮੌਕੇ ’ਤੇ ਹੀ ਨਿਪਟਾਰਾ ਹੋਵੇਗਾ।

ਨੌਜਵਾਨਾਂ ਲਈ ਰੁਜ਼ਗਾਰ ਦਾ ਬਲੂਪ੍ਰਿੰਟ

ਪੰਜਾਬ ਵਿੱਚ ਵਧਦੀ ਬੇਰੁਜ਼ਗਾਰੀ ’ਤੇ ਚਿੰਤਾ ਪ੍ਰਗਟ ਕਰਦਿਆਂ ਉਨ੍ਹਾਂ ਨੇ ਪਾਰਟੀ ਦੇ ਰੁਜ਼ਗਾਰ ਮਾਡਲ ਨੂੰ ਪੇਸ਼ ਕੀਤਾ:

ਹੁਨਰ ਵਿਕਾਸ: ਸੂਬੇ ਵਿੱਚ ਅਧੁਨਿਕ ਸਕਿੱਲ ਯੂਨੀਵਰਸਿਟੀਆਂ ਖੋਲ੍ਹੀਆਂ ਜਾਣ ਵਾਲੀਆਂ ਹਨ ਤਾਂ ਜੋ ਨੌਜਵਾਨ ਹੁਨਰਮੰਦ ਹੋ ਕੇ ਆਤਮ-ਨਿਰਭਰ ਬਣ ਸਕਣ।
ਵਿਆਜ ਮੁਕਤ ਕਰਜ਼ਾ: ਆਪਣਾ ਕਾਰੋਬਾਰ ਸ਼ੁਰੂ ਕਰਨ ਲਈ 10 ਲੱਖ ਰੁਪਏ ਤੱਕ ਦਾ ਬਿਨਾਂ ਵਿਆਜ ਕਰਜ਼ਾ ਦਿੱਤਾ ਜਾਵੇਗਾ, ਜਿਸ ਦੀ ਵਾਪਸੀ 3 ਸਾਲ ਬਾਅਦ ਸ਼ੁਰੂ ਹੋਵੇਗੀ।
ਪੰਜਾਬੀਆਂ ਲਈ ਰਾਖਵਾਂਕਰਨ: ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਪੰਜਾਬ ਦੀਆਂ ਨੌਕਰੀਆਂ ਸਿਰਫ਼ ਪੰਜਾਬ ਦੇ ਨੌਜਵਾਨਾਂ ਲਈ ਹੀ ਰਾਖਵੀਆਂ ਕੀਤੀਆਂ ਜਾਣਗੀਆਂ।

ਉਦਯੋਗਿਕ ਕ੍ਰਾਂਤੀ ਅਤੇ ਸਿੰਗਲ ਵਿੰਡੋ ਸਿਸਟਮ

ਮਿੱਠੂ ਖੇੜਾ ਨੇ ਕਿਹਾ ਕਿ ਪੰਜਾਬ ਵਿੱਚ ਨਿਵੇਸ਼ ਵਧਾਉਣ ਲਈ ‘ਸਿੰਗਲ ਵਿੰਡੋ ਕਲੀਅਰੈਂਸ’ ਪ੍ਰਣਾਲੀ ਨੂੰ ਮੁੜ ਮਜ਼ਬੂਤ ਕੀਤਾ ਜਾਵੇਗਾ। ਉਨ੍ਹਾਂ ਅਨੁਸਾਰ, ਬਿਜਲੀ ਸਰਪਲਸ, ਚਾਰ-ਮਾਰਗੀ ਸੜਕਾਂ ਅਤੇ ਬਿਹਤਰ ਏਅਰ ਕਨੈਕਟੀਵਿਟੀ ਰਾਹੀਂ ਅਜਿਹਾ ਮਾਹੌਲ ਸਿਰਜਿਆ ਜਾਵੇਗਾ ਕਿ ਵੱਡੀਆਂ ਰਿਫਾਇਨਰੀਆਂ ਅਤੇ ਥਰਮਲ ਪਲਾਂਟ ਪੰਜਾਬ ਆਉਣ, ਜਿਸ ਨਾਲ ਹਜ਼ਾਰਾਂ ਨੌਜਵਾਨਾਂ ਨੂੰ ਰੁਜ਼ਗਾਰ ਮਿਲੇ। ਅੱਜ ਪੰਜਾਬ ਨੂੰ ਇੱਕ ਸੁਰੱਖਿਅਤ ਮਾਹੌਲ ਅਤੇ ਮਜ਼ਬੂਤ ਇਰਾਦੇ ਵਾਲੀ ਸਰਕਾਰ ਦੀ ਲੋੜ ਹੈ। ਅਸੀਂ ਵਾਅਦਾ ਕਰਦੇ ਹਾਂ ਕਿ ਗੈਂਗਸਟਰ ਕਲਚਰ ਨੂੰ ਖਤਮ ਕਰਕੇ ਕਾਨੂੰਨ ਵਿਵਸਥਾ ਬਹਾਲ ਕੀਤੀ ਜਾਵੇਗੀ ਤਾਂ ਜੋ ਸਾਡੇ ਐਨ. ਆਰ. ਆਈ. ਭਰਾ ਬਿਨਾਂ ਕਿਸੇ ਡਰ ਦੇ ਆਪਣੀ ਮਿੱਟੀ ਨਾਲ ਜੁੜ ਸਕਣ।