ਕਿਸੇ ਵੀ ਵੇਲੇ ਜਾਰੀ ਹੋ ਸਕਦੈ ਹਨ ਸੀਟੈੱਟ ਦੇ ਨਤੀਜੇ

ਨਵੀਂ ਦਿੱਲੀ, 26 ਮਾਰਚ – ਕੇਂਦਰੀ ਅਧਿਆਪਕ ਯੋਗਤਾ ਪ੍ਰੀਖਿਆ (CTET) 2026 ਦਾ ਆਯੋਜਨ 7 ਅਤੇ 8 ਫਰਵਰੀ ਨੂੰ ਕੀਤਾ ਗਿਆ ਸੀ ਅਤੇ ਰੀ-ਐਗਜ਼ਾਮ 1 ਮਾਰਚ ਨੂੰ ਕਰਵਾਇਆ ਗਿਆ ਸੀ, ਜਿਸ ਵਿੱਚ ਲਗਪਗ 25 ਲੱਖ ਉਮੀਦਵਾਰਾਂ ਨੇ ਪ੍ਰੀਖਿਆ ਦਿੱਤੀ ਸੀ। ਹੁਣ ਇਨ੍ਹਾਂ ਸਾਰੇ ਉਮੀਦਵਾਰਾਂ ਨੂੰ ਨਤੀਜੇ ਜਾਰੀ ਹੋਣ ਦਾ ਬੇਸਬਰੀ ਨਾਲ ਇੰਤਜ਼ਾਰ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ ਇਹ ਇੰਤਜ਼ਾਰ ਕਿਸੇ ਵੀ ਸਮੇਂ ਖ਼ਤਮ ਹੋ ਸਕਦਾ ਹੈ। ਸੀਬੀਐੱਸਈ (CBSE) ਵੱਲੋਂ ਜਲਦੀ ਹੀ ਸੀਟੈੱਟ ਦਾ ਨਤੀਜਾ ctet.nic.in ‘ਤੇ ਜਾਰੀ ਕਰ ਦਿੱਤਾ ਜਾਵੇਗਾ।

ਪੇਪਰ 1 ਅਤੇ ਪੇਪਰ 2 ਦਾ ਨਤੀਜਾ ਇੱਕੋ ਸਮੇਂ ਹੋਵੇਗਾ ਜਾਰੀ

ਸੈਂਟਰਲ ਬੋਰਡ ਆਫ਼ ਸੈਕੰਡਰੀ ਐਜੂਕੇਸ਼ਨ (CBSE) ਵੱਲੋਂ CTET ਪੇਪਰ 1 ਅਤੇ ਪੇਪਰ 2 ਦੇ ਨਤੀਜੇ ਇੱਕੋ ਸਮੇਂ ਜਾਰੀ ਕੀਤੇ ਜਾਣਗੇ। ਨਤੀਜਾ ਜਾਰੀ ਹੁੰਦੇ ਹੀ ਅਧਿਕਾਰਤ ਵੈੱਬਸਾਈਟ ‘ਤੇ ਡਾਇਰੈਕਟ ਲਿੰਕ ਪਾ ਦਿੱਤਾ ਜਾਵੇਗਾ। ਤੁਸੀਂ ਹੇਠਾਂ ਦਿੱਤੇ ਗਏ ਸਟੈੱਪਸ ਦੀ ਪਾਲਣਾ ਕਰਕੇ ਆਸਾਨੀ ਨਾਲ ਨਤੀਜਾ ਚੈੱਕ ਕਰਨ ਦੇ ਨਾਲ-ਨਾਲ ਸਕੋਰਕਾਰਡ ਵੀ ਡਾਊਨਲੋਡ ਕਰ ਸਕੋਗੇ:

ਸਭ ਤੋਂ ਪਹਿਲਾਂ ਅਧਿਕਾਰਤ ਵੈੱਬਸਾਈਟ ctet.nic.in ‘ਤੇ ਜਾਓ। ਇਸ ਤੋਂ ਬਾਅਦ ‘ਲੇਟੈਸਟ ਨਿਊਜ਼’ ਵਿੱਚ ਨਤੀਜੇ ਦੇ ਡਾਇਰੈਕਟ ਐਕਟਿਵ ਲਿੰਕ ‘ਤੇ ਕਲਿੱਕ ਕਰੋ। ਹੁਣ ਤੁਹਾਨੂੰ ਨਵੇਂ ਪੇਜ ‘ਤੇ ਆਪਣਾ ਰੋਲ ਨੰਬਰ ਦਰਜ ਕਰਕੇ ਲੌਗਇਨ ਕਰਨਾ ਹੋਵੇਗਾ। ਜਾਣਕਾਰੀ ਸਬਮਿਟ ਕਰਦੇ ਹੀ ਸਕ੍ਰੀਨ ‘ਤੇ ਨਤੀਜਾ ਖੁੱਲ੍ਹ ਜਾਵੇਗਾ। ਇਸ ਤੋਂ ਬਾਅਦ ਤੁਸੀਂ ਨਤੀਜਾ ਚੈੱਕ ਕਰਨ ਦੇ ਨਾਲ-ਨਾਲ ਸਕੋਰਕਾਰਡ ਡਾਊਨਲੋਡ ਵੀ ਕਰ ਸਕਦੇ ਹੋ।

ਕੈਟੇਗਰੀ ਅਨੁਸਾਰ ਕੁਆਲੀਫਾਈਂਗ ਮਾਰਕਸ

ਇਸ ਪ੍ਰੀਖਿਆ ਵਿੱਚ ਪਾਸ ਹੋਣ ਲਈ ਉਮੀਦਵਾਰਾਂ ਨੂੰ ਕੈਟੇਗਰੀ ਅਨੁਸਾਰ ਨਿਰਧਾਰਤ ਕੱਟ-ਆਫ ਅੰਕ ਪ੍ਰਾਪਤ ਕਰਨੇ ਲਾਜ਼ਮੀ ਹੁੰਦੇ ਹਨ, ਤਾਂ ਹੀ ਉਹ ਵੱਖ-ਵੱਖ ਅਧਿਆਪਕ ਭਰਤੀਆਂ ਲਈ ਯੋਗ ਮੰਨੇ ਜਾਂਦੇ ਹਨ:

ਜਨਰਲ (General/UR): 60 ਫੀਸਦੀ

ਓਬੀਸੀ/ ਐੱਸਸੀ/ ਐੱਸਟੀ/ ਪੀਡਬਲਿਊਡੀ: 55 ਫੀਸਦੀ

ਇੱਕ ਵਾਰ ਹੀ ਪ੍ਰੀਖਿਆ ਕਰਨੀ ਹੋਵੇਗੀ ਪਾਸ

ਜੇਕਰ ਤੁਸੀਂ ਨਿਰਧਾਰਤ ਕੱਟ-ਆਫ ਅੰਕ ਪ੍ਰਾਪਤ ਕਰ ਲੈਂਦੇ ਹੋ, ਤਾਂ ਤੁਸੀਂ ਅਧਿਆਪਕ ਬਣਨ ਦੀ ਯੋਗਤਾ ਹਾਸਲ ਕਰ ਲਵੋਗੇ। ਇਸ ਪ੍ਰੀਖਿਆ ਦਾ ਸਕੋਰਕਾਰਡ ਲਾਈਫਟਾਈਮ (ਉਮਰ ਭਰ) ਲਈ ਵੈਲਿਡ ਰਹੇਗਾ।