ਕਾਇਕੋਹੇ ਸ਼ਹਿਰ ਨੇ ਦੋ ਨਵੇਂ ਪੁਲਿਸ ਅਫਸਰਾਂ—ਮਿਲਨਪ੍ਰੀਤ ਸਿੰਘ ਅਤੇ ਮੈਕਸਿਮਿਲੀਅਨ ਸਟੋਵੈਲ—ਦਾ ਸ਼ਾਨਦਾਰ ਸਵਾਗਤ ਕੀਤਾ

*ਭਾਈਚਾਰੇ ਦੀ ਮਜ਼ਬੂਤੀ ਅਤੇ ਭਾਰਤੀ ਭਾਈਚਾਰੇ ਨਾਲ ਨਵੇਂ ਰਿਸ਼ਤੇ
ਔਕਲੈਂਡ, 20 ਅਗੱਸਤ 2025 (ਹਰਜਿੰਦਰ ਸਿੰਘ ਬਸਿਆਲਾ) – ਔਕਲੈਂਡ ਤੋਂ ਜੇਕਰ ਧਰਤੀ ਦੇ ਇਕ ਸਿਰੇ ਵੱਲ ਜਾਣਾ ਹੋਵੇ ਤਾਂ ਧਰਤੀ ਮੁੱਕਣ ਤੋਂ 1475 ਕਿਲੋਮਟੀਰ ਉਰੇ ਅਤੇ ਔਕਲੈਂਡ ਤੋਂ 232 ਕਿਲੋਮੀਟਰ ਦੂਰ ਸ਼ਹਿਰ ਹੈ ਕਾਇਕੋਹੇ। ਇਸ ਸ਼ਹਿਰ ਨੇ ਦੋ ਨਵੇਂ ਪੁਲਿਸ ਅਫਸਰਾਂ—ਸ. ਮਿਲਨਪ੍ਰੀਤ ਸਿੰਘ ਅਤੇ ਮੈਕਸਿਮਿਲੀਅਨ ਸਟੋਵੈਲ—ਦਾ ਸ਼ਾਨਦਾਰ ਸਵਾਗਤ ਕੀਤਾ। ਇਹ ਸਮਾਗਮ ਮਾਓਰੀ ਸਵਾਗਤੀ ਰਸਮ ਪੌਹਿਰੀ (powhiri) ਰਾਹੀਂ ਮਨਾਇਆ ਗਿਆ, ਜਿਸ ’ਚ ਮਾਉਰੀ ਭਾਈਚਾਰੇ ਦੇ ਲੋਕ, ਸਥਾਨਕ ਨੇਤਾ ਅਤੇ ਵਪਾਰਕ ਭਾਈਚਾਰਾ ਇਕੱਠਾ ਹੋਇਆ। ਇਹ ਸਿਰਫ ਨਵੇਂ ਅਫਸਰਾਂ ਦੀ ਆਮਦ ਨਹੀਂ ਸੀ, ਸਗੋਂ ਕਾਇਕੋਹੇ ਦੀ ਭਾਈਚਾਰੇਕ ਇਕਤਾ ਅਤੇ ਭਾਰਤੀ ਭਾਈਚਾਰੇ ਨਾਲ ਨਵੇਂ ਰਿਸ਼ਤਿਆਂ ਦੀ ਸ਼ੁਰੂਆਤ ਵੀ ਸੀ।

ਸ. ਮਿਲਨਪ੍ਰੀਤ ਸਿੰਘ ਕਾਇਕੋਹੇ ਦੇ ਪਹਿਲੇ ਸਿੱਖ ਪੁਲਿਸ ਅਫਸਰ ਹਨ।  ਉਹ ਪਹਿਲਾਂ ਇਥੇ ਇੱਕ ਸਟੋਰ ਚਲਾਉਂਦੇ ਸਨ, ਜਿਸ ਕਰਕੇ ਉਹ ਸ਼ਹਿਰ ਨਾਲ ਗਹਿਰੀ ਜਾਣ-ਪਛਾਣ ਰੱਖਦੇ ਹਨ। ਉਨ੍ਹਾਂ ਦੀ ਨਿਯੁਕਤੀ ਸਥਾਨਕ ਭਾਈਚਾਰੇ ਲਈ ਮਾਣ ਵਾਲੀ ਗੱਲ ਬਣੀ। ਮੈਕਸ ਅਤੇ ਮਿਲਨਪ੍ਰੀਤ, ਨੌਂ ਨਵੇਂ ਪੁਲਿਸ ਗ੍ਰੈਜੂਏਟਸ ’ਚੋਂ ਹਨ, ਜੋ ਅਪ੍ਰੈਲ ’ਚ ਨੌਰਥਲੈਂਡ ਖੇਤਰ ਲਈ ਚੁਣੇ ਗਏ ਸਨ।
ਕਾਇਕੋਹੇ ਬਿਜ਼ਨਸ ਐਸੋਸੀਏਸ਼ਨ ਦੇ ਮਾਈਕ ਸ਼ਾ ਨੇ ਕਿਹਾ ਕਿ 50 ਅਸਥਾਈ ਪੁਲਿਸ ਅਫਸਰਾਂ ਦੀ ਆਮਦ ਚੰਗੀ ਗੱਲ ਹੈ, ਪਰ ਇਥੇ ਨਿਯੁਕਤ ਸਥਾਈ ਅਫਸਰ—ਮੈਕਸ ਅਤੇ ਮਿਲਨਪ੍ਰੀਤ—ਹੋਰ ਵੀ ਵਧੀਆ ਹਨ। ਸਵਾਗਤ ਦਾ ਮਕਸਦ ਸੀ ਕਿ ਪੁਲਿਸ, ਹਾਪੂ ਅਤੇ ਭਾਈਚਾਰਾ ਮਿਲ ਕੇ ਕਾਇਕੋਹੇ ਨੂੰ ਰਹਿਣ-ਯੋਗ ਅਤੇ ਸੁਰੱਖਿਅਤ ਥਾਂ ਬਣਾਉਣ। ਇਸ ਸਮਾਗਮ ’ਚ ਭਾਰਤੀ ਵਪਾਰੀ ਭਾਈਚਾਰੇ ਦੀ ਭਾਰੀ ਹਾਜ਼ਰੀ ਨੇ ਸਿੱਖ ਪੁਲਿਸ ਅਫਸਰ ਸਿੰਘ ਲਈ ਸਨਮਾਨ ਅਤੇ ਸਹਿਯੋਗ ਦਾ ਪ੍ਰਗਟਾਵਾ ਕੀਤਾ।

ਇਹ ਸਿਰਫ ਸਵਾਗਤ ਨਹੀਂ ਸੀ, ਸਗੋਂ ਭਾਰਤੀ ਭਾਈਚਾਰੇ ਨਾਲ ਰਿਸ਼ਤੇ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਵੀ ਸੀ। ਇਹ ਸਮਾਗਮ ਭਾਈਚਾਰੇ ਦੇ ਵੱਖ-ਵੱਖ ਹਿੱਸਿਆਂ ਨੂੰ ਇਕੱਠਾ ਲਿਆਉਣ ਵਿੱਚ ਸਫਲ ਰਿਹਾ। ਕਾਇਕੋਹੇ, ਜੋ ਕਿ ਨੌਰਥਲੈਂਡ ਖੇਤਰ ਦਾ ਇੱਕ ਇਤਿਹਾਸਕ ਸ਼ਹਿਰ ਹੈ, ਮਾਓਰੀ ਅਤੇ ਭਾਰਤੀ ਭਾਈਚਾਰੇ ਦੀ ਗਹਿਰੀ ਮੌਜੂਦਗੀ ਰੱਖਦਾ ਹੈ। ਇੱਥੇ ਭਾਰਤੀ ਵਪਾਰੀ ਭਾਈਚਾਰਾ ਸਾਲਾਂ ਤੋਂ ਸਥਾਪਿਤ ਹੈ ਅਤੇ ਭਾਈਚਾਰੇ ਦੀ ਤਰੱਕੀ ’ਚ ਯੋਗਦਾਨ ਪਾ ਰਿਹਾ ਹੈ। ਸ. ਮਿਲਨਪ੍ਰੀਤ ਸਿੰਘ ਦੀ ਨਿਯੁਕਤੀ ਸਿਰਫ ਇੱਕ ਨਵਾਂ ਅਫਸਰ ਨਹੀਂ, ਸਗੋਂ ਕਾਇਕੋਹੇ ਦੀ ਨਵੀਂ ਦਿਸ਼ਾ ਵੱਲ ਕਦਮ ਹੈ—ਜਿੱਥੇ ਸੁਰੱਖਿਆ, ਇਕਤਾ ਅਤੇ ਭਾਈਚਾਰੇ ਦੀ ਭਲਾਈ ਮੁੱਖ ਹੈ। ਕਾਊਂਟੀਜ਼ ਮੈਨੁਕਾਓ ਪੁਲਿਸ ਦੇ ਭਾਰਤੀ ਸਲਾਹਕਾਰ ਸ. ਪਰਮਿੰਦਰ ਸਿੰਘ ਨੇ ਇਹ ਖਬਰ ਸਾਂਝੀ ਕਰਦਿਆਂ ਇਸ ਨੌਜਵਾਨ ਅਤੇ ਭਾਰਤੀ ਭਾਈਚਾਰੇ ਨੂੰ ਵਧਾਈ ਦਿੱਤੀ ਹੈ।