ਹੁਣ ਸਿਰਫ਼ 15 ਦਿਨਾਂ ਵਿੱਚ ਮਿਲੇਗਾ ਨਵਾਂ ਵੋਟਰ ਆਈਡੀ ਕਾਰਡ

ਨਵੀਂ ਦਿੱਲੀ, 19 ਜੂਨ – ਜੇਕਰ ਤੁਸੀਂ ਆਪਣਾ ਵੋਟਰ ਆਈਡੀ ਕਾਰਡ ਬਣਾਉਣ ਜਾਂ ਇਸ ਵਿੱਚ ਬਦਲਾਅ ਕਰਨ ਲਈ ਮਹੀਨਿਆਂ ਤੋਂ ਇੰਤਜ਼ਾਰ ਕੀਤਾ ਹੈ, ਤਾਂ ਇਹ ਖ਼ਬਰ ਤੁਹਾਡੇ ਲਈ ਰਾਹਤ ਤੋਂ ਘੱਟ ਨਹੀਂ ਹੈ। ਚੋਣ ਕਮਿਸ਼ਨ ਨੇ ਵੋਟਰ ਕਾਰਡ ਨਾਲ ਸਬੰਧਤ ਪ੍ਰਕਿਰਿਆ ਨੂੰ ਪੂਰੀ ਤਰ੍ਹਾਂ ਬਦਲ ਦਿੱਤਾ ਹੈ। ਹੁਣ ਨਾ ਤਾਂ ਲੰਮਾ ਇੰਤਜ਼ਾਰ ਹੋਵੇਗਾ ਅਤੇ ਨਾ ਹੀ ਅਧਿਕਾਰੀਆਂ ਦੇ ਚੱਕਰ ਕੱਟਣੇ ਪੈਣਗੇ। ਕਿਉਂਕਿ ਹੁਣ ਸਿਰਫ਼ 15 ਦਿਨਾਂ ਵਿੱਚ ਤੁਹਾਡੇ ਹੱਥ ਵਿੱਚ ਇੱਕ ਨਵਾਂ ਜਾਂ ਅੱਪਡੇਟ ਕੀਤਾ ਵੋਟਰ ਆਈਡੀ ਕਾਰਡ ਹੋਵੇਗਾ। ਇਹ ਬਦਲਾਅ ਨਾ ਸਿਰਫ਼ ਨੌਜਵਾਨਾਂ ਲਈ ਸਗੋਂ ਉਨ੍ਹਾਂ ਲੱਖਾਂ ਲੋਕਾਂ ਲਈ ਵੀ ਵੱਡੀ ਰਾਹਤ ਹੈ ਜੋ ਨਾਮਜ਼ਦਗੀ, ਤਬਦੀਲੀ ਜਾਂ ਨਵੀਂ ਰਜਿਸਟ੍ਰੇਸ਼ਨ ਵਿੱਚ ਦੇਰੀ ਕਾਰਨ ਚੋਣਾਂ ਵਿੱਚ ਵੋਟ ਨਹੀਂ ਪਾ ਸਕੇ ਸਨ। ਹੁਣ ਕਮਿਸ਼ਨ ਨੇ ਸਪੱਸ਼ਟ ਕਰ ਦਿੱਤਾ ਹੈ ਕਿ ਅਰਜ਼ੀ ਪ੍ਰਕਿਰਿਆ ਪੂਰੀ ਹੋਣ ਦੇ 15 ਕੰਮਕਾਜੀ ਦਿਨਾਂ ਦੇ ਅੰਦਰ ਵੋਟਰ ਨੂੰ ਕਾਰਡ ਸੌਂਪ ਦਿੱਤਾ ਜਾਵੇਗਾ।

ਨਵੀਂ ਵਿਵਸਥਾ ਵਿੱਚ ਕੀ-ਕੀ ਬਦਲਿਆ?

ਹੁਣ ਤੱਕ ਵੋਟਰ ਕਾਰਡ ਮਿਲਣ ਵਿੱਚ ਹਫ਼ਤਿਆਂ ਤੋਂ ਲੈਕੇ ਮਹੀਨਿਆਂ ਤੱਕ ਦਾ ਸਮਾਂ ਲੱਗਦਾ ਸੀ। ਨਵੀਂ ਵਿਵਸਥਾ ਤਹਿਤ ਡਾਟਾ ਵੈਰੀਫਿਕੇਸ਼ਨ, ਕਾਰਡ ਪ੍ਰੀਟਿੰਗ ਅਤੇ ਡਲਿਵਰੀ ਦੀ ਪ੍ਰਕਿਰਿਆ ਨੂੰ ਪੂਰੀ ਤਰ੍ਹਾਂ ਸਮਾਂਬੱਧ ਕਰ ਦਿੱਤਾ ਗਿਆ ਹੈ। ਇਹ ਬਦਲਾਅ ਸਿਰਫ਼ ਨਵੇਂ ਕਾਰਡ ਲਈ ਨਹੀਂ, ਬਲਕਿ ਨਾਮ, ਪਤਾ, ਫੋਟੋ ਜਾਂ ਉਮਰ ਬਦਲਾਅ ਲਈ ਵੀ ਲਾਗੂ ਹੋਵੇਗਾ।

ਨੌਜਵਾਨਾਂ ਨੂੰ ਹੋਵੇਗਾ ਸਭ ਤੋਂ ਜ਼ਿਆਦਾ ਫਾਇਦਾ

ਹਰ ਸਾਲ, ਭਾਰਤ ਵਿੱਚ ਲੱਖਾਂ ਨੌਜਵਾਨ 18 ਸਾਲ ਦੇ ਹੋ ਜਾਂਦੇ ਹਨ ਅਤੇ ਵੋਟਰ ਬਣਨ ਦਾ ਸੁਪਨਾ ਦੇਖਦੇ ਹਨ। ਪਰ ਪੁਰਾਣੀ ਪ੍ਰਣਾਲੀ ਦੇ ਕਾਰਨ, ਕਈ ਵਾਰ ਉਨ੍ਹਾਂ ਦੇ ਨਾਮ ਸਮੇਂ ਸਿਰ ਅੰਤਿਮ ਵੋਟਰ ਸੂਚੀ ਵਿੱਚ ਸ਼ਾਮਲ ਨਹੀਂ ਕੀਤੇ ਜਾਂਦੇ ਸਨ। ਹੁਣ ਇਹ ਨਵੀਂ ਪ੍ਰਣਾਲੀ ਉਨ੍ਹਾਂ ਲੋਕਾਂ ਲਈ ਵੀ ਸਮੇਂ ਸਿਰ ਵੋਟਰ ਕਾਰਡ ਯਕੀਨੀ ਬਣਾਏਗੀ ਜੋ ਪਹਿਲੀ ਵਾਰ ਵੋਟਰ ਬਣ ਰਹੇ ਹਨ।

ਕਿਵੇਂ ਕਰ ਸਕਦੇ ਹਨ ਅਪਲਾਈ?

https://voters.eci.gov.in ਪੋਰਟਲ ਉਤੇ ਜਾ ਕੇ ਆਨਲਾਈਨ ਅਪਲਾਈ ਕਰੋ। ਜ਼ਰੂਰੀ ਦਸਤਾਵੇਜ ਜਿਵੇ ਉਮਰ ਸਬੂਤ, ਪਤੇ ਦਾ ਸਬੂਤ, ਅਤੇ ਫੋਟੋ ਵਰਗੇ ਲੋੜੀਂਦੇ ਦਸਤਾਵੇਜ਼ ਅਪਲੋਡ ਕਰੋ। ਮੋਬਾਈਲ ਨੰਬਰ ਦਰਜ ਕਰਨਾ ਨਾ ਭੁੱਲੋ, ਤਾਂਜੋ ਸਟੇਟਸ ਅਪਡੇਟ ਮਿਲਦਾ ਰਹੇ। ਅਰਜ਼ੀ ਦੀ ਸਥਿਤੀ SMS ਜਾਂ ਈਮੇਲ ਰਾਹੀਂ ਪਤਾ ਕੀਤੀ ਜਾ ਸਕਦੀ ਹੈ।