ਸਫਲ ਜੀਵਨ ਲਈ ਅਨੁਸ਼ਾਸਨ ਬੇਹੱਦ ਜ਼ਰੂਰੀ

ਛੋਟੇ-ਮੋਟੇ ਨਿਯਮਾਂ ਦੀ ਪਾਲਣਾ ਕਰਨਾ ਹੀ ਅਨੁਸ਼ਾਸਨ ਕਹਾਉਂਦਾ ਹੈ ਜਿਸ ਦਾ ਮੁੱਢ ਘਰ ਤੋਂ ਬੱਝਦਾ ਹੈ। ਇਹ ਸੱਭਿਅਕ ਸਮਾਜ ਦੀ ਨੀਂਹ ਹੈ ਤੇ ਸਫਲਤਾ ਦੀ ਪਹਿਲੀ ਪੌੜੀ ਵੀ। ਹਰ ਮਾਤਾ-ਪਿਤਾ ਨੂੰ ਚਾਹੀਦਾ ਹੈ ਕਿ ਉਹ ਬੱਚਿਆਂ ਨੂੰ ਚੰਗੇ ਸੰਸਕਾਰ ਦੇਣ। ਸਮੇਂ ਸਿਰ ਉੱਠਣ, ਸੌਣ ਅਤੇ ਪੜ੍ਹਨ ਦਾ ਸਲੀਕਾ ਸਿਖਾਉਣ। ਧਿਆਨ ਰਹੇ ਕਿ ਬੱਚੇ ਜੋ ਦੇਖਦੇ ਹਨ, ਉਹੀ ਸਿੱਖਦੇ ਹਨ। ਇਹ ਸਭ ਕੁੱਝ ਤਾਂ ਹੀ ਸੰਭਵ ਹੋ ਸਕੇਗਾ ਜੇਕਰ ਮਾਪੇ ਖ਼ੁਦ ਅਨੁਸ਼ਾਸਨ ਵਿਚ ਰਹਿਣਗੇ। ਅਧਿਆਪਕਾਂ ਨੂੰ ਬੱਚਿਆਂ ਦਾ ਰੋਲ-ਮਾਡਲ ਬਣਨਾ ਪੈਂਦਾ ਹੈ। ਇਸ ਦੇ ਲਈ ਸਭ ਤੋਂ ਪਹਿਲਾਂ ਸੰਸਥਾ ਦੇ ਮੁਖੀ ਅਤੇ ਫਿਰ ਅਧਿਆਪਕਾਂ ਨੂੰ ਅਨੁਸ਼ਾਸਨ ਵਿਚ ਰਹਿਣਾ ਹੋਵੇਗਾ। ਵਿਦਿਆਰਥੀ ਵਿੱਦਿਅਕ ਸੰਸਥਾਵਾਂ ਵਿਚ ਮੁਖੀ ਅਤੇ ਅਧਿਆਪਕਾਂ ਨੂੰ ਦੇਖ ਕੇ ਹੀ ਅਨੁਸ਼ਾਸਨ ਵਿਚ ਰਹਿਣਾ ਸਿੱਖਣਗੇ, ਨਾ ਕਿ ਇਸ ਨੂੰ ਜ਼ਬਰਦਸਤੀ ਥੋਪ ਕੇ। ਜੇਕਰ ਵਿੱਦਿਅਕ ਅਦਾਰੇ ਦਾ ਮੁਖੀ ਅਨੁਸ਼ਾਸਿਤ ਹੈ ਤਾਂ ਹਰ ਕਰਮਚਾਰੀ ਅਨੁਸ਼ਾਸਨ ਵਿਚ ਰਹੇਗਾ। ਸਕੂਲਾਂ ਅਤੇ ਕਾਲਜਾਂ ਵਿਚ ਖੇਡਾਂ ਵਿਦਿਆਰਥੀਆਂ ਦਾ ਚਰਿੱਤਰ ਨਿਰਮਾਣ ਕਰਦੀਆਂ ਹਨ। ਇਸ ਲਈ ਖੇਡ ਦੇ ਮੈਦਾਨ ਵਿਚ ਵੀ ਅਨੁਸ਼ਾਸਨ ਬਹੁਤ ਜ਼ਰੂਰੀ ਹੈ। ਖੇਡਾਂ ਵਿਚ ਜਿੱਤ ਤਾਂ ਹੀ ਸੰਭਵ ਬਣ ਸਕਦੀ ਹੈ ਜੇ ਖਿਡਾਰੀ ਅਨੁਸ਼ਾਸਨ ਵਿਚ ਰਹਿ ਕੇ ਖੇਡਣ। ਇੰਜ ਵੀ ਕਹਿ ਸਕਦੇ ਹਾਂ ਕਿ ਖੇਡਾਂ ਅਨੁਸ਼ਾਸਨ ਸਿਖਾਉਂਦੀਆਂ ਹਨ। ਅੱਜ ਦੇ ਬੱਚੇ ਕੱਲ੍ਹ ਦਾ ਭਵਿੱਖ ਹਨ। ਉਨ੍ਹਾਂ ਨੇ ਹੀ ਰਾਸ਼ਟਰ ਦਾ ਨਿਰਮਾਣ ਕਰਨਾ ਹੁੰਦਾ ਹੈ। ਰਾਸ਼ਟਰ ਦਾ ਨਿਰਮਾਣ ਤਾਂ ਹੀ ਸੰਭਵ ਹੈ ਜੇਕਰ ਘਰ, ਸਮਾਜ ਅਤੇ ਦੇਸ਼ ਦੇ ਨਾਗਰਿਕ ਅਨੁਸ਼ਾਸਨ ਵਿਚ ਰਹਿਣਗੇ। ਇਹ ਮੁਸ਼ਕਲ ਜ਼ਰੂਰ ਲੱਗਦਾ ਹੈ ਪਰ ਜੇਕਰ ਆਦਤ ਪੈ ਜਾਵੇ ਤਾਂ ਸਫਲਤਾ ਦੀ ਗਾਰੰਟੀ ਵੀ ਦਿੰਦਾ ਹੈ।