ਬੇਰੁਜ਼ਗਾਰਾਂ ਲਈ ਵੱਡੀ ਖੁਸ਼ਖ਼ਬਰੀ! ਜਲੰਧਰ ਨਗਰ ਨਿਗਮ ‘ਚ 1196 ਨੌਕਰੀਆਂ ਦਾ ਐਲਾਨ

ਜਲੰਧਰ, 31 ਦਸੰਬਰ – ਜਲੰਧਰ ਨਗਰ ਨਿਗਮ ਵਿੱਚ ਬੇਰੋਜ਼ਗਾਰ ਨੌਜਵਾਨਾਂ ਲਈ ਵੱਡੀ ਖੁਸ਼ਖ਼ਬਰੀ ਹੈ। ਨਗਰ ਨਿਗਮ ਜਲੰਧਰ ਵੱਲੋਂ ਕੁੱਲ 1196 ਅਹੁਦਿਆਂ ‘ਤੇ ਭਰਤੀ ਕੱਢੀ ਗਈ ਹੈ। ਨਗਰ ਨਿਗਮ ਦੇ ਕਮਿਸ਼ਨਰ ਸੰਦੀਪ ਰਿਸ਼ੀ (IAS) ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਵੱਖ-ਵੱਖ ਸ਼੍ਰੇਣੀਆਂ ਦੇ ਅਹੁਦਿਆਂ ਲਈ ਅਰਜ਼ੀਆਂ ਮੰਗੀਆਂ ਗਈਆਂ ਹਨ। ਨਗਰ ਨਿਗਮ ਜਲੰਧਰ ਵਿੱਚ ਗਾਰਡਨ ਬੇਲਦਾਰ, ਸਫ਼ਾਈ ਸੇਵਕ, ਸੀਵਰਮੈਨ, ਰੋਡ ਬੇਲਦਾਰ ਅਤੇ ਫਿਟਰ ਕੁਲੀ ਦੇ ਅਹੁਦਿਆਂ ‘ਤੇ ਭਰਤੀ ਕੀਤੀ ਜਾਵੇਗੀ। ਇਨ੍ਹਾਂ ਸਾਰੇ ਅਹੁਦਿਆਂ ਲਈ ਅਰਜ਼ੀ ਪ੍ਰਕਿਰਿਆ 15 ਜਨਵਰੀ 2026 ਤੋਂ ਸ਼ੁਰੂ ਹੋਵੇਗੀ। ਚੁਣੇ ਗਏ ਉਮੀਦਵਾਰਾਂ ਨੂੰ 18 ਹਜ਼ਾਰ ਰੁਪਏ ਮਹੀਨਾਵਾਰ ਤਨਖ਼ਾਹ ਦਿੱਤੀ ਜਾਵੇਗੀ।

ਨਗਰ ਨਿਗਮ ਵੱਲੋਂ ਜਾਰੀ ਕੀਤੀ ਗਈ ਜਾਣਕਾਰੀ ਮੁਤਾਬਕ ਅਹੁਦਿਆਂ ਦਾ ਪੂਰਾ ਵੇਰਵਾ ਇਸ ਤਰ੍ਹਾਂ ਹੈ—
ਗਾਰਡਨ ਬੇਲਦਾਰ: 406 ਅਹੁਦੇ
ਸਫ਼ਾਈ ਸੇਵਕ: 440 ਅਹੁਦੇ
ਸੀਵਰਮੈਨ: 165 ਅਹੁਦੇ
ਰੋਡ ਬੇਲਦਾਰ: 160 ਅਹੁਦੇ
ਫਿਟਰ ਕੁਲੀ: 25 ਅਹੁਦੇ

ਅਰਜ਼ੀ ਜਮ੍ਹਾਂ ਕਰਵਾਉਣ ਦੀ ਪ੍ਰਕਿਰਿਆ

ਭਰਤੀ ਲਈ ਅਰਜ਼ੀ ਫਾਰਮ 10 ਜਨਵਰੀ 2026 ਤੋਂ ਨਗਰ ਨਿਗਮ ਜਲੰਧਰ ਦੀ ਵੈੱਬਸਾਈਟ ਤੋਂ ਡਾਊਨਲੋਡ ਕੀਤੇ ਜਾ ਸਕਣਗੇ। ਭਰੇ ਹੋਏ ਅਰਜ਼ੀ ਫਾਰਮ 15 ਜਨਵਰੀ 2026 ਤੋਂ ਨਗਰ ਨਿਗਮ ਵੱਲੋਂ ਨਿਰਧਾਰਤ ਕੀਤੇ ਗਏ ਸੈਂਟਰਾਂ ‘ਤੇ ਜਮ੍ਹਾਂ ਕਰਵਾਏ ਜਾ ਸਕਣਗੇ। ਅਰਜ਼ੀ ਜਮ੍ਹਾਂ ਕਰਨ ਦੀ ਆਖ਼ਰੀ ਤਾਰੀਖ 27 ਫਰਵਰੀ 2026 ਸ਼ਾਮ 5 ਵਜੇ ਤੱਕ ਨਿਰਧਾਰਤ ਕੀਤੀ ਗਈ ਹੈ।

ਆਰਕਸ਼ਣ ਅਤੇ ਚੋਣ ਪ੍ਰਕਿਰਿਆ

ਇਹ ਭਰਤੀ ਪੰਜਾਬ ਸਰਕਾਰ ਦੇ ਆਰਕਸ਼ਣ ਨਿਯਮਾਂ (ਰੋਸਟਰ ਸਿਸਟਮ) ਅਨੁਸਾਰ ਕੀਤੀ ਜਾਵੇਗੀ। ਚੋਣ ਕਮੇਟੀ ਵੱਲੋਂ ਲਿਆ ਗਿਆ ਫੈਸਲਾ ਅੰਤਿਮ ਮੰਨਿਆ ਜਾਵੇਗਾ। ਭਰਤੀ ਨਾਲ ਸਬੰਧਤ ਕਿਸੇ ਵੀ ਕਿਸਮ ਦਾ ਸ਼ੁੱਧੀਪੱਤਰ ਜਾਂ ਅੱਪਡੇਟ ਸਿਰਫ਼ ਨਗਰ ਨਿਗਮ ਜਲੰਧਰ ਦੀ ਅਧਿਕਾਰਿਕ ਵੈੱਬਸਾਈਟ ‘ਤੇ ਹੀ ਜਾਰੀ ਕੀਤਾ ਜਾਵੇਗਾ।