ਪੰਜਾਬ ਪੁਲਿਸ ਨੇ Fake RTO ਸੰਦੇਸ਼ਾਂ ਅਤੇ ਮਾਲਵੇਅਰ ਨੂੰ ਲੈ ਕੇ ਜਾਰੀ ਕੀਤਾ ਸਾਈਬਰ ਅਲਰਟ

ਚੰਡੀਗੜ੍ਹ, 16 ਦਸੰਬਰ – ਪੰਜਾਬ ਪੁਲਿਸ ਨੇ ਰਾਜ ਦੇ ਨਾਗਰਿਕਾਂ ਨੂੰ ਸਾਈਬਰ ਠੱਗੀ ਤੋਂ ਬਚਾਉਣ ਲਈ ਇੱਕ ਮਹੱਤਵਪੂਰਨ ਸੁਰੱਖਿਆ ਅਲਰਟ ਜਾਰੀ ਕੀਤਾ ਹੈ। ਸਾਈਬਰ ਠੱਗ ਹੁਣ ਖੇਤਰੀ ਟਰਾਂਸਪੋਰਟ ਦਫ਼ਤਰ ਅਤੇ ਹੋਰ ਸਰਕਾਰੀ ਅਧਿਕਾਰੀਆਂ ਦੇ ਨਾਮ ‘ਤੇ ਫਰਜ਼ੀ ਮੈਸੇਜ ਭੇਜ ਕੇ ਲੋਕਾਂ ਨੂੰ ਆਪਣਾ ਸ਼ਿਕਾਰ ਬਣਾ ਰਹੇ ਹਨ। ਪੁਲਿਸ ਨੇ ਚੇਤਾਵਨੀ ਜਾਰੀ ਕਰਦਿਆਂ ਦੱਸਿਆ ਕਿ ਇਨ੍ਹਾਂ ਸੰਦੇਸ਼ਾਂ ਰਾਹੀਂ ਲੋਕਾਂ ਦੇ ਸਮਾਰਟਫੋਨਾਂ ਵਿੱਚ ਖਤਰਨਾਕ ਵਾਇਰਸ ਜਾਂ ਮਾਲਵੇਅਰ  ਭੇਜਿਆ ਜਾ ਰਿਹਾ ਹੈ, ਜਿਸ ਨਾਲ ਉਨ੍ਹਾਂ ਦੀ ਨਿੱਜੀ ਜਾਣਕਾਰੀ ਖਤਰੇ ਵਿੱਚ ਪੈ ਸਕਦੀ ਹੈ।

APK ਫਾਈਲ ਤੋਂ ਹੈਕਿੰਗ ਦਾ ਖਤਰਾ

ਪੁਲਿਸ ਮੁਤਾਬਕ, ਠੱਗ ਮੋਬਾਈਲ ‘ਤੇ ਅਜਿਹੇ ਮੈਸੇਜ ਭੇਜ ਰਹੇ ਹਨ ਜਿਨ੍ਹਾਂ ਵਿੱਚ ਏਪੀਕੇ ਫਾਈਲਾਂ ਅਟੈਚ ਹੁੰਦੀਆਂ ਹਨ। ਅਕਸਰ ਇਹ ਫਾਈਲਾਂ ਚਲਾਨ ਭਰਨ ਜਾਂ ਕਿਸੇ ਸਰਕਾਰੀ ਨੋਟਿਸ ਦੇ ਨਾਮ ‘ਤੇ ਭੇਜੀਆਂ ਜਾਂਦੀਆਂ ਹਨ। ਜੇਕਰ ਕੋਈ ਯੂਜ਼ਰ ਗਲਤੀ ਨਾਲ ਵੀ ਇਨ੍ਹਾਂ ਫਾਈਲਾਂ ਨੂੰ ਡਾਊਨਲੋਡ ਜਾਂ ਓਪਨ ਕਰ ਲੈਂਦਾ ਹੈ, ਤਾਂ ਉਸਦੇ ਫੋਨ ਵਿੱਚ ਜਾਸੂਸੀ ਸਾਫਟਵੇਅਰ ਇੰਸਟਾਲ ਹੋ ਜਾਂਦਾ ਹੈ। ਇਸ ਨਾਲ ਹੈਕਰਾਂ ਨੂੰ ਯੂਜ਼ਰ ਦੇ ਡਿਵਾਈਸ ਦਾ ਰਿਮੋਟ ਐਕਸੈਸ ਮਿਲ ਜਾਂਦਾ ਹੈ ਅਤੇ ਉਹ ਆਸਾਨੀ ਨਾਲ ਤੁਹਾਡਾ ਪਰਸਨਲ ਡੇਟਾ ਅਤੇ ਬੈਂਕਿੰਗ ਜਾਣਕਾਰੀ ਚੁਰਾ ਸਕਦੇ ਹਨ।

ਪੁਲਿਸ ਨੇ ਦੱਸੀ ਬਚਾਅ ਦੀ ਤਰਕੀਬ

ਪੰਜਾਬ ਪੁਲਿਸ ਨੇ ਲੋਕਾਂ ਨੂੰ ਸਖ਼ਤ ਸਲਾਹ ਦਿੱਤੀ ਹੈ ਕਿ ਉਹ ਕਿਸੇ ਵੀ ਹਾਲਤ ਵਿੱਚ ਅਣਜਾਣ ਸਰੋਤਾਂ ਤੋਂ ਆਈਆਂ ਫਾਈਲਾਂ ਨੂੰ ਡਾਊਨਲੋਡ ਨਾ ਕਰਨ। ਜੇਕਰ ਕਿਸੇ ਕੋਲ ਅਜਿਹਾ ਕੋਈ ਸ਼ੱਕੀ ਮੈਸੇਜ ਆਉਂਦਾ ਹੈ, ਤਾਂ ਉਸਨੂੰ ਤੁਰੰਤ ਡਿਲੀਟ ਕਰੋ ਅਤੇ ਭੇਜਣ ਵਾਲੇ (ਸੈਂਡਰ) ਨੂੰ ਬਲਾਕ ਕਰ ਦਿਓ।