ਅਰਸ਼ਦੀਪ ਤੋਂ ਬਾਅਦ ਇਹ ਖਿਡਾਰੀ ਵੀ ਟੈਸਟ ਚੋਂ ਬਾਹਰ

ਨਵੀਂ ਦਿੱਲੀ, 21 ਜੁਲਾਈ – ਭਾਰਤ ਅਤੇ ਇੰਗਲੈਂਡ ਵਿਚਾਲੇ ਚੌਥਾ ਟੈਸਟ ਮੈਚ 23 ਜੁਲਾਈ ਤੋਂ ਮੈਨਚੈਸਟਰ ਦੇ ਓਲਡ ਟ੍ਰੈਫੋਰਡ ਵਿਖੇ ਖੇਡਿਆ ਜਾਣਾ ਹੈ। ਇਸ ਤੋਂ ਪਹਿਲਾਂ, ਭਾਰਤੀ ਟੀਮ ਦੇ ਚਾਰ ਖਿਡਾਰੀ ਇੱਕ ਤੋਂ ਬਾਅਦ ਇੱਕ ਜ਼ਖਮੀ ਹੋ ਗਏ ਹਨ। ਜਿਸ ਕਾਰਨ ਟੀਮ ਇੰਡੀਆ ਮੁਸੀਬਤ ਵਿੱਚ ਫਸ ਗਈ ਹੈ।

ਅਰਸ਼ਦੀਪ ਤੋਂ ਬਾਅਦ ਰੈੱਡੀ ਵੀ ਟੈਸਟ ਤੋਂ ਬਾਹਰ

ਮੀਡੀਆ ਰਿਪੋਰਟਾਂ ਵਿੱਚ ਖੁਲਾਸਾ ਹੋਇਆ ਹੈ ਕਿ ਤੇਜ਼ ਗੇਂਦਬਾਜ਼ ਅਰਸ਼ਦੀਪ ਤੋਂ ਬਾਅਦ ਹੁਣ ਆਲਰਾਊਂਡਰ ਨਿਤੀਸ਼ ਕੁਮਾਰ ਰੈੱਡੀ ਵੀ ਇੰਗਲੈਂਡ ਵਿਰੁੱਧ ਚੌਥੇ ਟੈਸਟ ਮੈਚ ਤੋਂ ਬਾਹਰ ਹੋ ਗਏ ਹਨ। ਹਾਲਾਂਕਿ, ਭਾਰਤੀ ਕ੍ਰਿਕਟ ਟੀਮ ਨੇ ਅਜੇ ਤੱਕ ਸੱਟ ਦੀ ਪ੍ਰਕਿਰਤੀ ਦੀ ਪੁਸ਼ਟੀ ਨਹੀਂ ਕੀਤੀ ਹੈ, ਪਰ ਇਹ ਸਮਝਿਆ ਜਾ ਰਿਹਾ ਹੈ ਕਿ ਇਹ ਆਲਰਾਊਂਡਰ ਲੜੀ ਵਿੱਚ ਹਿੱਸਾ ਨਹੀਂ ਲਵੇਗਾ। ਪਿਛਲੇ ਹਫ਼ਤੇ ਲਾਰਡਜ਼ ਟੈਸਟ ਮੈਚ ਵਿੱਚ ਵਧੀਆ ਪ੍ਰਦਰਸ਼ਨ ਕਰਨ ਵਾਲੇ ਰੈੱਡੀ ਨੂੰ 20 ਜੁਲਾਈ ਨੂੰ ਗੋਡੇ ਦੀ ਗੰਭੀਰ ਸੱਟ ਲੱਗ ਗਈ ਸੀ। ਰਿਪੋਰਟਾਂ ਅਨੁਸਾਰ, ਰੈੱਡੀ ਨੂੰ ਐਤਵਾਰ ਨੂੰ ਜਿਮ ਸੈਸ਼ਨ ਦੌਰਾਨ ਲਿਗਾਮੈਂਟ ਦੀ ਸੱਟ ਲੱਗ ਗਈ ਸੀ ਅਤੇ ਉਹ ਲੜੀ ਦੇ ਚੌਥੇ ਟੈਸਟ ਮੈਚ ਤੋਂ ਬਾਹਰ ਹੋ ਗਏ ਹਨ।

ਰੈੱਡੀ ਦੀ ਜਗ੍ਹਾ ਪਲੇਇੰਗ ਇਲੈਵਨ ਵਿੱਚ ਸ਼ਾਰਦੁਲ ਦੀ ਹੋ ਸਕਦੀ ਵਾਪਸੀ

ਰੈੱਡੀ ਦੀ ਸੱਟ ਕਾਰਨ ਸ਼ਾਰਦੁਲ ਠਾਕੁਰ ਦੀ ਪਲੇਇੰਗ ਇਲੈਵਨ ਵਿੱਚ ਵਾਪਸੀ ਹੋ ਸਕਦੀ ਹੈ। ਹੈਡਿੰਗਲੇ ਵਿਖੇ ਪਹਿਲੇ ਟੈਸਟ ਮੈਚ ਲਈ ਸ਼ੁਰੂਆਤੀ ਲਾਈਨਅੱਪ ਤੋਂ ਬਾਹਰ ਰਹਿਣ ਤੋਂ ਬਾਅਦ, ਰੈੱਡੀ ਨੂੰ ਭਾਰਤ ਦੀ ਬੱਲੇਬਾਜ਼ੀ ਵਿੱਚ ਡੂੰਘਾਈ ਜੋੜਨ ਲਈ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਸੀ। ਉਸ ਨੇ ਦੂਜੇ ਟੈਸਟ ਵਿੱਚ ਬਹੁਤਾ ਪ੍ਰਭਾਵ ਨਹੀਂ ਪਾਇਆ, ਪਰ ਤੀਜੇ ਟੈਸਟ ਵਿੱਚ ਗੇਂਦ ਨਾਲ ਵਧੀਆ ਕੰਮ ਕੀਤਾ। ਰੈੱਡੀ ਨੇ ਚਾਰ ਪਾਰੀਆਂ ਵਿੱਚ 45 ਦੌੜਾਂ ਬਣਾਈਆਂ ਹਨ, ਜਿਸ ਵਿੱਚ ਉਸ ਦਾ ਸਭ ਤੋਂ ਵਧੀਆ ਸਕੋਰ ਲਾਰਡਜ਼ ਵਿਖੇ ਪਹਿਲੀ ਪਾਰੀ ਵਿੱਚ 30 ਹੈ। ਗੇਂਦਬਾਜ਼ੀ ਵਿੱਚ, 22 ਸਾਲਾ ਖਿਡਾਰੀ ਨੇ ਐਜਬੈਸਟਨ ਅਤੇ ਲਾਰਡਜ਼ ਵਿਖੇ ਖੇਡੇ ਗਏ ਦੋ ਟੈਸਟਾਂ ਵਿੱਚ 3.64 ਦੀ ਇਕਾਨਮੀ ਨਾਲ 17 ਓਵਰ ਸੁੱਟੇ ਹਨ ਅਤੇ ਦੋ ਵਿਕਟਾਂ ਲਈਆਂ ਹਨ, ਦੋਵੇਂ ਇੱਕੋ ਓਵਰ ਵਿੱਚ ਜਦੋਂ ਉਸ ਨੇ ਓਪਨਰ ਬੇਨ ਡਕੇਟ ਅਤੇ ਜੈਕ ਕ੍ਰਾਲੀ ਨੂੰ ਆਊਟ ਕੀਤਾ ਸੀ।

ਇਹ 2 ਖਿਡਾਰੀ ਵੀ ਹੋ ਚੁੱਕੇ ਜਖ਼ਮੀ

ਮੈਨਚੈਸਟਰ ਟੈਸਟ ਲਈ ਆਕਾਸ਼ਦੀਪ ਅਤੇ ਅਰਸ਼ਦੀਪ ਸਿੰਘ ਦੀ ਉਪਲਬਧਤਾ ਅਨਿਸ਼ਚਿਤ ਬਣੀ ਹੋਈ ਹੈ ਕਿਉਂਕਿ ਦੋਵੇਂ ਤੇਜ਼ ਗੇਂਦਬਾਜ਼ ਆਪਣੀਆਂ ਸੱਟਾਂ ਤੋਂ ਠੀਕ ਹੋ ਰਹੇ ਹਨ, ਇਸ ਲਈ ਰੈੱਡੀ ਦੀ ਸੱਟ ਭਾਰਤ ਦੀਆਂ ਮੁਸ਼ਕਲਾਂ ਨੂੰ ਵਧਾਉਂਦੀ ਹੈ। ਐਤਵਾਰ ਨੂੰ, ਤੇਜ਼ ਗੇਂਦਬਾਜ਼ ਅੰਸ਼ੁਲ ਕੰਬੋਜ਼ ਨੂੰ ਇੰਗਲੈਂਡ ਦੇ ਚੱਲ ਰਹੇ ਦੌਰੇ ਲਈ ਭਾਰਤ ਦੀ ਟੈਸਟ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਸੀ, ਕਿਉਂਕਿ ਖੱਬੇ ਹੱਥ ਦੇ ਤੇਜ਼ ਗੇਂਦਬਾਜ਼ ਅਰਸ਼ਦੀਪ ਸਿੰਘ ਨੂੰ ਸਿਖਲਾਈ ਸੈਸ਼ਨ ਦੌਰਾਨ ਗੇਂਦਬਾਜ਼ੀ ਕਰਦੇ ਸਮੇਂ ਹੱਥ ਦੀ ਡੂੰਘੀ ਸੱਟ ਲੱਗ ਗਈ ਸੀ। 24 ਸਾਲਾ ਕੰਬੋਜ਼, ਜਿਸਨੇ ਹਰਿਆਣਾ ਲਈ 24 ਪਹਿਲੇ ਦਰਜੇ ਦੇ ਮੈਚਾਂ ਵਿੱਚ 79 ਵਿਕਟਾਂ ਲਈਆਂ ਹਨ, ਪਿਛਲੇ ਮਹੀਨੇ ਦੋ ਤਿੰਨ-ਦਿਨਾਂ ਮੈਚ ਖੇਡਣ ਵਾਲੀ ਇੰਡੀਆ ਏ ਟੀਮ ਦਾ ਹਿੱਸਾ ਸੀ। ਉਸਨੇ ਦੋਵਾਂ ਮੈਚਾਂ ਵਿੱਚ ਪੰਜ ਵਿਕਟਾਂ ਲਈਆਂ।

ਰਿਸ਼ਭ ਪੰਤ ਦੇ ਲੱਗੀ ਹੋਈ ਸੱਟ

ਰਿਸ਼ਭ ਪੰਤ ਲਾਰਡਜ਼ ਦੇ ਪਹਿਲੇ ਹੀ ਦਿਨ ਜ਼ਖਮੀ ਹੋ ਗਏ ਸੀ। ਉਨ੍ਹਾਂ ਦੀ ਖੱਬੀ ਉਂਗਲੀ ਵਿੱਚ ਸੱਟ ਲੱਗ ਗਈ ਸੀ ਅਤੇ ਉਦੋਂ ਤੋਂ ਉਹ ਵਿਕਟਕੀਪਿੰਗ ਕਰਨ ਤੋਂ ਅਸਮਰੱਥ ਹੈ। ਜਿਸ ਕਾਰਨ ਰਿਪੋਰਟਾਂ ਆ ਰਹੀਆਂ ਹਨ ਕਿ ਧਰੁਵ ਜੁਰੇਲ ਮੈਨਚੈਸਟਰ ਵਿੱਚ ਵਿਕਟਕੀਪਰ ਦੀ ਭੂਮਿਕਾ ਨਿਭਾਉਣਗੇ, ਜਦਕਿ ਰਿਸ਼ਭ ਪੰਤ ਇੱਕ ਪੂਰੇ ਸਮੇਂ ਦੇ ਬੱਲੇਬਾਜ਼ ਵਜੋਂ ਖੇਡਣਗੇ। ਦੱਸ ਦੇਈਏ ਕਿ ਮੌਜੂਦਾ ਲੜੀ ਵਿੱਚ, ਇੰਗਲੈਂਡ ਨੇ ਭਾਰਤ ਉੱਤੇ 2-1 ਦੀ ਬੜ੍ਹਤ ਬਣਾ ਲਈ ਹੈ, ਜਿਸ ਕਾਰਨ ਭਾਰਤ ਲਈ ਮੈਨਚੈਸਟਰ ਵਿੱਚ ਆਉਣ ਵਾਲਾ ਮੈਚ ਜਿੱਤਣਾ ਬਹੁਤ ਮਹੱਤਵਪੂਰਨ ਹੈ।

ਮੈਨਚੈਸਟਰ ਟੈਸਟ ਵਿੱਚ ਭਾਰਤ ਦਾ ਸੰਭਾਵੀ ਪਲੇਇੰਗ-11

ਕੇਐਲ ਰਾਹੁਲ, ਯਸ਼ਸਵੀ ਜੈਸਵਾਲ, ਕਰੁਣ ਨਾਇਰ/ਸਾਈ ਸੁਦਰਸ਼ਨ, ਸ਼ੁਭਮਨ ਗਿੱਲ, ਰਿਸ਼ਭ ਪੰਤ, ਧਰੁਵ ਜੁਰੇਲ (ਵਿਕਟਕੀਪਰ), ਕੁਲਦੀਪ ਯਾਦਵ/ਵਾਸ਼ਿੰਗਟਨ ਸੁੰਦਰ, ਰਵਿੰਦਰ ਜਡੇਜਾ, ਜਸਪ੍ਰੀਤ ਬੁਮਰਾਹ, ਮੁਹੰਮਦ ਸਿਰਾਜ, ਪ੍ਰਸਿਧ ਕ੍ਰਿਸ਼ਨਾ/ਸ਼ਾਰਦੁਲ ਠਾਕੁਰ।